2 JOHAN 1 - DAÜLANGPÜ LAIHING (BSI)

Selam Shah

¹ Behe leipü jelangpü nyüha hatü pinnyülei hapeüthü touei: Am kü ngei hatü ngei mon nevai shahhing nyingpüthü peüi shahhing kü bamnyeih;

² mehenangkü hapa shahhing ham kü nyüke, hatü düngei ham kü nyuhen.

³ Jen touei Opa Kahvang hatü Shembüpa Jisu Khrista, Palei Ha shahhing hatü bampü kü phahji, yahyang hatü chingmeivangmei jen mü nyemnyuma.

Shahhing hatü Bampü

⁴ Jen kü Pa-i epü keiha nüngei hapeüthü hanei shahhing kü kampü eeyei ngei longi mongmeinyeih.

⁵ Shejao shaang, bampü nyühima, ngei nüng kü shahkung ja hük nyangnyu kei ngei nüng kü nephenyih, shejao pangpü mebü jeni mepa shahkung dang, hapa keiha jen hüki hük mü bamteishah.

⁶ Jeni büpalei shahkung aimü kamhen khih; hayü bampü nyüke, hapayü chongpangpülei nüngi danei heihpü shahkung nyüke– nüngi ha kü kamtuh.

⁷ Peileipüthü longi, üami Jisu Khrista phai kü peipeih shei nyingei nelahnya, hathü kahdoknyülei yaüei daiteke; hapa keipü shennyakü peileipa hatü Khrista khüpü nyüke.

⁸ Hami mepa shingvaishi dük, ha nemahtükhen, shejao ammi laklei changshi danghen shingvaishi thaeimaei nyutuh.

⁹ Üpai Khristai nyuhpüvenpü kü nekam, shejao ha peih-ei dainya, büpa kü Kahvang nenyu; üami nyuhpüvenpü kü kam, Pa hatü Ha nyiphen nyüke.

¹⁰ Hapa nyuhpüvenpü neyah-i am touei hanei peiküjema, hathüyü shemeiyao tengoihah, hatü selam teshih.

¹¹ Üami büpa mongongshi yahnya, büpalei mang dou kü hean yahnyüke.

Dohpü Selam

¹² Ngei am kü nyanghen longi nyujao ngei lai hatü shiai yah-ei nenyangnyih, shejao ngei am touei peiyei dhe dhe gongei eteijüang jenei mongong changhühen khih shei monglempü nyüpeih.

¹³ Jelangpü nüngei anaülei hapeüthüi nüng kü selamja.