1 TIMOTI 5 - DAÜLANGPÜ LAIHING (BSI)

Vaipüthü Touei Dükhen Douthü

¹ Nüngi behe kü shahwong te-e, shejao nüngi ampa kü kei etuh, hatü naü-eethü kü jeihinaü kü kei,

² nyüyongthü kü laophülei nyü kü kei, hatü nelathü kü laophülei naüpeü kü kei daülangshemshepai etuh.

³ Hingmei mü vaümnyüthü kü dhüm shuohtuh.

⁴ Shejao hapa vaümnyü mü hapeü hüpeüthü nyujema laophülei shemongei shong vaipü dousho düktuh, hatü hapakei nyühipa, bihibüthü kü nyokei düktuh; mehenangkü hapayü Kahvang touei mongongbenüng.

⁵ Vaümnyü, üpa monha nyu, Kahvang kü monglemnyüke hatü nyakhingai thüngei yüpü hatü phoppü kü nedoh-i nyunyüke;

⁶ shejao vaümnyü üpai phai mongonghen shingvaishi nyunya, pinnyü-ü yemmü nyujao mahngchang khih.

⁷ Mih-i yaühahhen mü jom üpayao nenyuhen shingvaishi nanglakthü kü ha shahkung shuohtuh.

⁸ Üami nenhishen kü hatü shem am kü nejungnelangnya, büpayü vaipü yaktüktü nevaipü am mao nemeipüba leinyüke.

⁹ Vangbong pejem nelompü kü üpayao vaümnyüthü mü omei men tenyang, hatü pinnyü-ü baha hükei nyüha vaihampü vaihen vongbong.

¹⁰ Pinnyülei doumei kü peüi denpü shuoh-aokshampü, hapeüthü meishi longaokpü, yen kü bampü hupü, daülangpüthülei la phuopü, shanghahpüthü kü sheühpü, hatü lem peü kü doumei dükpü kü lanei shuohpü vaihen khih.

¹¹ Shejao vaümnyü naü-eethü omei tenyang; mehenangkü mechem jomei mongkü shem yemhüei leyei peihenshang, jomi Khrista toueipü yandainyüke,

¹² hatü hapa keiha jomi shelei lahtükpü mangpü nangkü jom nyonghüpü dangnyüke.

¹³ Ha mü lenei jomphong nehetnewong, shem kü longteiyei, jom nehetnewongpü mon nevai, shejao mihla eyei, shing nenüngi ne-ehen shah eyei longteinyüke.

¹⁴ Hanangkü vaümnyü naüeethüyü shem yemei, hapeü angei laophülei shemong lingei nyemnyu shei deihnyüke; shejüang vepathüi jen khüei ten ehen lem nedanghen.

¹⁵ Mehenangkü hanei amü kahshih phei mühen lepei lüdaiteke.

¹⁶ Vaipü nyüha hanei jom shemei vaümnyü hanei nyujema, pinnyüi hathü kü jungtuh; hayü attoilei hanggovih nyemtevai, shejüang hapai hingmei monha nyupü vaümnyü kü jungaokhen.

¹⁷ Behethü üami meishi chongphonya, anyei vaishi chongvenpü hatü nyuhpüvenpü dou düknya, jomphongü lat shingnyi nyeishi danghen shangpeih.

¹⁸ Mehenangkü Laihingi, “Hah tenpü mohoh-ei ju kü tuw tethuh” hatü “Dou dükbü-ü nanglat danghen shangpeih” shei enyüke.

¹⁹ Denpü nyi jem nenyupheikü behe hük khüei nyonghühen teyaong.

²⁰ Aopü lebüthüi nyemhen shangmü mang kü nyupüthü kü mih touei ngaiheyei loh-eishuoh.

²¹ Kahvang hatü Khrista Jisu hatü jelangpü vangsho phongshanthü omshi hathü shahkung baong nehani dükhen, hatü loukei bampü neshiüi dükhen ngei nüng kü shahvüng shuohnyeih.

²² Nüngi mih kü laki shünghen ahshi teshülang, hatü mih-ei mang kü hean teyah. Laophü nyingi daülangi nyutuh.

²³ Yung mon yingpü dohtuh, shejao nüngei vom din kü nüng düngei tüngteipü kü yiü maani maani yingtuh.

²⁴ Shennyak haneilei mangü ngaihe-i, shejao jom shekü jomei mang shahphen shingei dainyüke, shejao haneilei mangü pheilei mon eenyüke.

²⁵ Hapa keiha doumeiyao ngaiheyei eenyeih, hatü hathü ngaiheyei ne-eejao joshi nenyuaokpih.