1 TIMOTI 4 - DAÜLANGPÜ LAIHING (BSI)

Shahshem Nyuhbüthü

¹ Pheilei hanei ami vaipü tuhphongtü lupülempü laanghathü hatü shepe-i nyuhpüvenpü kü mong shuoh-ei mühen shei shaang Laanghai ngaiheyei enyüke.

² Hapa keipü nyuhpüvenpeyü nyiamshami ooktükpü akhümmong-üm shahshem mongdeih kübü vamnyüke.

³ Jomi mih kü shem neyemhen, hatü hinglempüthü hatü shahhing nyingpüthüi menvih shuoh-ei hahhen shingvaishi Kahvangi lingpü hahying nehahhen enyüke.

⁴ Mehenangkü Kahvangi lingpü lemphü meiangpeih, hatü menvih shuoh-ei hahphei keyü tükhen meheyao neshiü;

⁵ mehenangkü hayü Kahvangei shah-i hatü phoppai daütükteke.

Jisu Khrista Chongphobü Meipü Hük

⁶ Nüngi ha nyuhpüvenpüthü jeihinaü hatü nyahinaüthü kü shuohjema, nüngü hinglempü shahthü, hatü nüngi yahpü nyuhpüvenpü meipai haümei longpü Khrista Jisulei chongphobü hük leihen.

⁷ Sheihdaipü bütet shahthü hatü nyü changthülei yimpila kübü yantuh, shejao Kahvang nyingshi nyuhen nüng nyingi nyuhhahtuh.

⁸ Büm shing aülaüei dükpü kü nanglei maani nyüpeih, shejao Kahvang nyingpü kü lem peü kü shaang hatü ngoikahen yangnyu shingvaishi lahpü nyüpeih.

⁹ Hapa epeyü hingshangpü hatü dhao mü yahhen shangpü nyüke.

¹⁰ Ha tata kü hami ponghah-ei dou düknyeih; mehenangkü ham monglempeyü hangku peü, anyei vaishi büpa kü hinglempüthü yemleipüba vanyangyem Kahvang kü tuh-ei nyüpeih.

¹¹ Ha douthü nüngi shahkung shuohtuh hatü nyuhtuh.

¹² Nüngei nethe yangnyu kü üpaiyao ne-ienelemi tenohah, shejao epü kü, dükpü kü, bampü kü, hatü daülangshemshepü kü lappü hük nyutuh.

¹³ Ngei mangpei thahshi banghnyüha touei Laihing iepü kü, chongvenpü hatü nyuhpü kü mong shuohtuh.

¹⁴ Nüng kü nyupü laangha thintho mepa thihivam shah homei hatü behethüi laki shüngei shuohpa, ha nenotei-i tetuhphong.

¹⁵ Hathü dou leiyei düktuh; peüi nüng shehongei daipü eehen shingvaishi nüngi hathü kü mong shuohtuh.

¹⁶ Nüngi laophülei yangnyu, hatü nüngi nyuhpüvenpü kü kenhingtuh. Hathü dou nedoh-i düktuh; mehenangkü nüngi hathü dükjema, nüng hatü nüngi epü bangpüthü nyiphen yanghen.