1 TIMOTI 3 - DAÜLANGPÜ LAIHING (BSI)

Attoi Mübü Hükei Dei-aei

¹ Hayü hingshangpü shah: Shennyak hanei-i attoi mübü vaihüjema, büpai doumei kü kennyüke.

² Shaang attoi mübü hükü nepaohneshaipü, nyüha hük mü mon shem yemei nyupü, shümei aokpü, laophü nyingi ungei-aeipü, dhüm kohhahhen mü nyupü, yen kü bampü, nyuh-aokpü,

³ yiü yingpü am nevai, iy-aongmashapü am nevai shejao inyainyempü, nedenelaopü, hatü lop kü nebampü am vaihen vongbong.

⁴ Büpayü laophülei shemong meishi vanglem lemaokpü, laophülei hapeüthü ven bangei dhüm kohshi tuh-aokpü vaihen vongbong.

⁵ Hanei ami laophülei shemong kü dangkao vanglem nelemaokjema, büpai mekei etü Kahvangei attoi jungei aokhen?

⁶ Büpayü vaipü nanglak ja nevaihen khih, hei nevaijema büpa beiyei changmeipai büpaao kahshih keiha nyonghüpü kü vühen.

⁷ Büpa mih-i nenaamhahhen mü hatü kahshihlei tai kü nemanhen shingvaishi attoi haolei nyupüthü touei menmei kohpü vaihen vongbong.

Deacon Hük kü Nyuhen Dei-aei

⁸ Hapa keiha deaconthüao nyingnyoi meipü, shüpünyiükpü, yei nyi nekohpü, yiü neyingpü, lop kü nenempü,

⁹ jomei mongdeih daülangpai hinglempü shahjo kü wongshongi shoungpü vaihen vongbong.

¹⁰ Shongei jomphong kü dokei veitü mon jom kü eela neshiüi dangaokjema, jom deacon dousho kü dükhütuh.

¹¹ Hapa keiha nyühathüao nyingnyoi meipü, mihla ne-epü, shejao shümei aokpü hatü dou peü kü mong shuohpü vaihen vongbong.

¹² Deacon hükü nyüha hükei baha vaihen khih hatü laophülei hapeüthü hatü shemong kü meishi vanglem lemaokpü vaihen vongbong.

¹³ Üami deacon dousho meishi chongphonya, jomi menmei dangnyeih, hatü Khrista Jisu kü hinglempü kü monglongshi eaoknyeih.

Jenei Vaipü Vanglem kü Shahjo

¹⁴ Ngei lomi nüng touei peiyei pongteihen monglemnyeih, shejao ngei ha lai nüng kü venei nyangnyeih.

¹⁵ Shejao ngei pheidaijema, Kahvangei shemong, mepa vanyangyem Kahvangei attoi kü shahhing shemnyü hatü chongnyiam nyüpa, hapa kü mekei shennyakthüi dükhen ha nyinghen vongbong.

¹⁶ Nejü-üi jenei vaipü vanglem kü shahjo longpü nyüpeih: “Büpa phai kü shakei vam, Laangha kü dahshakhü, vangsho phongshanthüi ha ee, Kung am kü ha baongteke, kahdoknyü kempülei hinglem, müknyinshekhang kü shangei anlang.”