1 TIMOTI 2 - DAÜLANGPÜ LAIHING (BSI)

Phophen Nang Nyuhpü

¹ Shongpüba kü yüpü, phoppü, mih shing phoppü hatü menvih-ei phoppü peü shing,

² ongthü hatü laphen dok kü vanglem lempüthü shing nyutuh, shejüang jeni Kahvang nyingpü hatü dhüm kohpü kü nenmü hatü chingmei yangnyu nyuaokhen shei ngei nüng kü kangnyeih.

³ Hapayü Kahvang, jen Yemleipüba touei jiüpü hatü yah-aokbenüng nyüke,

⁴ üpai peü yanghen hatü shahhing nyingpü touei peihahhünya.

⁵ Mehenangkü Kahvang hük nyüke hatü Kahvang hi hangku aa kü baong kü shapü hük mon nyüke, hapayü shennyak, Khrista Jisu.

⁶ Büpai laophü nying hangku peü angei leihen bhei shuoh, hatü hapayü jiüpü hepak kü denpü shuohteke.

⁷ Ha shingvaishi ngeiyü shahjang kobü hatü phongshan hük (ngei shahshem nevai shahhing enyeih), hinglempü hatü shahhing kü Kung amei nyuhbü vaihen jeteke.

⁸ Hanangkü shing peü kübü shennyakthüi mongshih nevami nevaijü shah nedaktei-i lak haongei nyemphop shei ngei deihnyüke;

⁹ shao nyühathüi laophü nyingi dhüm kohpü owhiai hatü yemya kü jiüpü büm-ow owtuh, sho aei, nevaijü hon, yüknyü nevaijü bhei wongpü owhiai nevai,

¹⁰ shejao Kahvang kü dhüm shuohpü nyühathü kei jiübenüng doumei-i owtuh.

¹¹ Nyüha hüki nendang nenmü lanei shuoh-ei nyinghahtuh.

¹² Nyüha üpaiyao nenyuhhen, nevaijü baha hük shak kü wong nohen ngei nehannyih; pinnyü nenmü nyuhütuh.

¹³ Mehenangkü shongei Adam ling, hapheikü Ev lingpeih;

¹⁴ hatü Adam shong neluhah, shejao nyüha shong luhah hatü mang shennyak leipeih.

¹⁵ Shejao jomi hinglempü hatü bampü hatü daülangshemshepü kü dei-aei meishi nyujema pinnyü hapeü angpai yanghen.