1 SHÜPPÜKENGPÜ 5 - DAÜLANGPÜ LAIHING (BSI)

Reubenei Hühihathü

¹ Jakobei hashongpa Reubenei hühihathü. “Mehenangkü Reubeni chepalei yiükphü hük mü mükbongjuyungpü nangkü jeiyongpa heanü Joseph kü shuohtükpeih. Hanangkü bülem itpülei büpayü bühpü aimü jeiyongpa hean kü itei nenyangnyih,

² hatü Judah amao jeihinaüthü khongkü wong kohpüba hatü vanglem lempü jom kübü vamjao jeiyongpa heanü Joseph kü shuohtükpeih.”

³ Jakobei hashongpa Reubenei hapeüthü: Hanokh, Pallu, Hezron hatü Karmi.

⁴ Joelei hapeüthü bü kü hü dheanpü bülem: Shemaiah, Gog, Shimei,

⁵ Mikah, Reaiah, Baal,

⁶ Beerah, büpayü Assyria ongpa Tiglath-Pileseri wüpküpei müei deilangpeih. Beerah-ü Reuben phang kü mübü hük nyuteke.

⁷ Reuben jat bülem nyangpü kü hathü phang mübüthü nyangei nyüke: Jeiel, Zekhariah,

⁸ hatü Bela, hathüyü Azazlei hapeüthü hatü Shemalei hüpeüthü Joel phang am. Jomü Aroer kübü Nebo hatü Baal-Meon thahshi nyu.

⁹ Heongphi kü jomi bhih kahdok kübü heihdaipü Euphrates yungyen thahshi kahdok kaamteke; mehenangkü Gilead kahdokei jomei yemhimakthü longi da.

¹⁰ Saul ongpa hepak kü jomi Hagar am hahteke hatü jom jütüktü Gilead heongphi kahdok kemei kaamlang.

Gadlei Hühihathü

¹¹ Gadlei hühihathü Bashan kübü heihdaipü Salekah thahshi Reuben am mü dheanei nyu.

¹² Joel amü peü mü longpü phang, Shapham am nyipabü, hapheikü Janai hatü Shaphat amü Bashanei nyu.

¹³ Shemdep aimü jomei phangthü hapakei: Mikhael, Meshullam, Sheba, Jorai, Jakan, Zia hatü Eber peüshep jom nyet.

¹⁴ Hathüyü Hurilei cheha Abihailei hapeüthü nyuteke hatü jomei bühipathüyü hapakei: Abihail, Huri, Jaroah, Gilead, Mikhael, Jeshishai, Jahdo, Buz.

¹⁵ Abdielei cheha Ahi, Gunilei chehüyü jomei phang kü shangjing nyu.

¹⁶ Gad amü Gilead, Bashan hatü haleipü jilathü hatü Sharon kahdokthülei nyu.

¹⁷ Hathü bülem kemei Judah ongpa Jotham hatü Israel ongpa Jeroboam nyilei hepak kü nyangei tuhteke.

Heong Jatthülei Veshanthü

¹⁸ Reuben, Gad hatü bhaosheipü Manasseh jat hathülei veshanthü 44, 760 thahshi ii, yanlu hatü lahhilaong mekei nohen meishi nyuh-ei mantüktü nyuteke.

¹⁹ Jomi Hagar, Jetur, Naphish hatü Nodab jatthü khüei hok.

²⁰ Hathü khüei hokhen shingvaishi Kahvangi jom kü sheüh, hatü Kahvangi Hagar hatü jom kü khüambakpüthü peü jomei lak kü shuoh; mehenangkü jomi vehok shingkao Kahvang kü len, hatü büpai jom kü jang.

²¹ Jomi Hagar amei yemhimakthüut haja 50, 000, mi 250, 000, hatü gadu 2, 000 yahteke. Jomi shennyak 100, 000 thahshi yepei lei,

²² hatü vehokpa Kahvangei vaipü nangkü vepathü longi jüteke, hatü wüpküpei mangdai thahshi jomi hapa kahdokei nyu.

Bhaosheipü Manasseh Jat

²³ Bhaosheipü Manasseh amü nanglak longi da; jomü Bashan kahdok kübü Baal-hermon, Senir hatü Hermon Kahshang thahshi chingchingei nyu.

²⁴ Hathüyü jomei phangthü kü shangjingthü nyuteke: Epher, Ishi, Eliel, Azriel, Jeremiah, Hodaviah hatü Jahdiel. Jomphongü monglongpü veshan, men-e shennyak hatü phangthü kü shangjingthü nyuteke.

Heong Chingling Wüpküpei Daipü

²⁵ Shejao jomi chebü chepalei Kahvang touei mang thah, hatü Kahvangi jom toueipü mangtükpü hapa kahdokei nyupü nanglakthülei kahvangthü kü khümteke.

²⁶ Hanangkü Israel Kahvangi Assyria am Pul (Tiglath-Pileser) ongpa vamhü hatü Reuben, Gad hatü bhaosheipü Manasseh am jat wüpküpei müei dai. Büpai hathü Halah, Habor, Hara hatü Gozan yungyenei ha nyih mü pangei tuhteke.