1 SHÜPPÜKENGPÜ 21 - DAÜLANGPÜ LAIHING (BSI)

Davidi Shangkuk Iepü

¹ Israel am khüei Kahshih yaong, hatü Israel amei shangkuk iehen Davidei mong kü peihü.

² Hanangkü Davidi Joab hatü veshan mübüthü kü, “Daituh hatü Beer-sheba kübü Dan thahshi Israel am ietuh. Hapheikü mon meshük nyüpa ngei nyinghen shingvaishi shah-om koei leikei” shei e.

³ Shejao Joabi jangei, “Shembüpai büpalei veshanthü shao kho hükpa nyeinya nyemdahüma. Ngelei shembü ongpa, hathü kemei ngelei shembülei nanglak nevaipü je? Mehekei ngelei shembüi hapa dou dükhüpa? Mehekei büpai Israel jat kemei kü mang vamhünya?” shei e.

⁴ Shejao Joabi epü kü ongpalei shah-i neü; hanangkü Joabi Israel kemeilei daitü Jerusalemei nyokei lei.

⁵ Joabi Israel kü veshan vaiaokhen shennyak 1, 100, 000 hatü Judah kü 470, 000 nyüke shei shah-om shuoh.

⁶ Shejao Joabi Levi hatü Benjamin am bhei-ie kü neom; mehenangkü ongpalei ngeükhüam Joabi nelümi deih.

⁷ Hapa ngeükhüam Kahvang touei mang nyuteke; hanangkü büpai Israel am kü hanghi shuoh.

⁸ Hapheikü Davidi Kahvang kü, “Ngei hapa dou dükpai longi mang thahteke. Shaang ngei nüng kü khümei enyeih, nüngei chongphobüi pungpü mang yahlangshih. Ngei ahshi-üng ngadou dükteke” shei e.

⁹ Shembüpai Davidei thibü, Gad kü,

¹⁰ “Daiyei David kü Shembüpai hapakei enyüke shei etuh: Ngei nüng kü jehen dou jem shuohnyeih. Nüng khüei ngei dükhen shingvaishi hathü khongkü hük jetuh” shei e.

¹¹ Hanangkü Gad daiyei David kü, “Shembüpai hapakei enyüke: Nüngi hathü hük jetuh:

¹² Münghishaü bong jem thahshi yahhen hi, nevaijü vepathü kü nyemei bong jem nyaiteihen hi, nevaijü nyih jem kam kü Shembüpai laophülei yanlu noshi am jüei, hatü kahmük kempülei cham peihüei Israel kempülei büpalei vangsho phongshanthüi shennyakthü jühen yahhüpa? Ngei mehe shahnyok koei leijahen?” shei e.

¹³ Davidi Gad kü, “Ngei longi mongshangnyüke. Shejao ngeiyü shennyakei lak kü nelomohhüang. Shembüpa, büpaiüng ngei kü hanghi nyemyahpha; mehenangkü büpayü phahjinyeih” shei e.

¹⁴ Hanangkü Shembüpai Israel am kü cham shomei Israel kü shennyak 70, 000 thahshi dihü,

¹⁵ hatü Kahvangi Jerusalem am mahtükhen vangsho phongshan hük shom. Vangsho phongshani hapa dou dükei nyushingkü Shembüpai hapa lomoh aühaü pongpü eeyei mong kü tüngei vei, hatü hapa nanglakthü jüpü vangsho phongshan kü, “Hajük-üng! nüngei lak teno” shei e. Vangsho phongshan hahepak keyü Jebus am Araunahlei hahten shingei yaongshi nyuteke.

¹⁶ David ngangei veishuoh shingkü phumshang jiamei vangsho phongshani yanlu notü Jerusalem tentükhen lak yiüei ee. Hahepak kü David hatü mübüthüi dhoila ashak ümtü dhe shüshi lemteke.

¹⁷ Davidi Kahvang kü, “Veshanthü shangkuk iehen ngeükhüamü ngei shuohpeih. Mang thahpü hatü nejiüpü dou dükpeyü ngei hih. Shejao hapa mithüi mehe pungpü dükpa? Oh Shembüpa ngelei Kahvang, ngei hatü ham shem kü mon nüngei lak notuh, shejao hapa cham nüngei nanglakthü kü tehethü” shei phop.

¹⁸ Hahepak kü vangsho phongshani Gad kü aongtuh hatü David kü Jebus am Araunahlei hahten shingei Shembüpa kü moidü hük linghen etuh shei e.

¹⁹ Hanangkü Shembüpalei men kü Gad-i epü shah bangei David halei aong.

²⁰ Mechem Araunah-i hah tenei nyupa, büpa yaakei veishuohjü vangsho phongshan ee; büpa mü nyupü hapeüthü peü jodaikem.

²¹ Hapheikü David hatou ngoi; Araunah-i veishuohjü büpa eeyei hahten shing leipü heih-ei büpalei dhe kahdok kü shüshi aümei sha.

²² Davidi büpa kü, “Nanglakthü kü cham ngoipü dohhen shingvaishi ngei Shembüpa kü moidü hük vekününg nüngei hahten shing lop kü yushih” shei e.

²³ Araunah-i David kü, “Yahhahtuh! Ngelei shembü ongpai mehe lümpüshang ha dükhahtuh. Veituh, ngei hah tenteipü mohohbaong nyi jakpü moila vaihen yahphahen hih, hatü hahlüng kemei pü vaihen, hatü haleipü wheat hahying moila vaishi yahphahen hih. Hathü peü yahphahen hih” shei e.

²⁴ Shejao David ongpai Araunah kü, “Hei nevai, lop kü yahshih shei e. Ngei nüngei dou yah-ei Shembüpa kü shuohhen neyahpih, nevaijü moila neshuohpih” shei e.

²⁵ Hanangkü Davidi hapa hah tenshing nangkü Araunah kü hon kho vok shuoh.

²⁶ Davidi halei Shembüpa kü moidü hük ve, hatü halei jakpü moila hatü mongjempü moila shuoh. Büpai Shembüpa kü nyük, hatü Shembüpai jakpü moila shuohpü moidülei vangsho leipü aw yüshih-ei jangpü shuoh.

²⁷ Hapheikü Shembüpai vangsho phongshan kü e, hatü büpai laophülei yanpishungei yan hülang.

²⁸ Hahepak kü mechem Davidi Jebus am Araunahlei hahten shingei Shembüpai büpa kü jangteke shei nyingpa, büpai halei jakpü moilathü shuoh.

²⁹ Jahpanei nyushi Mosai lingpü Shembüpalei ashakshem, hatü jakpü moila shuohteipü moidü hahepak keyü Gibeonei khümshingei tuh-ei nyu.

³⁰ Shejao Davidi halei Kahvang kü khümhen ne-aongaok; mehenangkü büpayü vangsho phongshanei yanlu kü nyemei nyu.