1 SHÜPPÜKENGPÜ 16 - DAÜLANGPÜ LAIHING (BSI)

Ashakshemei Vangpüshuwpü Pela Tuhpü

¹ Jomphongi Kahvangei Vangpüshuwpü Pela Davidi vepü ashakshem mongei shüei tuh, hatü jomphongi Kahvang kü jakpü moila hatü mongjempü moila shuoh.

² Davidi jakpü moila hatü mongjempü moila shuoh-ei tempheikü Davidi Shembüpalei men kü nanglakthü kü moihiman.

³ Hapheikü büpai Israel am nyüha baha peü kü aan, phai shukpü hatü nyalingngupai vani lingpü aan shuoh.

⁴ Büpai Shembüpalei Pela touei chongphohen, moihiman yühen, menvih shuohhen hatü Israel Kahvang kü men longpü shuohhen nangkü Levi am hanei je:

⁵ Asaph-ü peü mü shopü, nyipabü kü Zekhariah, hapheikü Jeiel, Shemiramoth, Jehiel, Mattithiah, Eliab, Benaiah, Obed-Edom hatü Jeiel nyu. Jomphongü lyre vünghen, Asaph-ü cymbal vünghen,

⁶ hatü Benaiah hatü Jahaziel ngongpa nyiyü Kahvangei Vangpüshuwpü Pela touei nedoh-i amit vünghen jeteke.

⁷ Hapa nyih Davidi shongei Asaph hatü büpa mü sheühteipüthü kü hapa menvih kesho Shembüpa kü men vih-ei lokhen han.

Menvih Kesho

⁸ Shembüpa kü menvih shuohtuh, büpalei men kü nyüktuh; Büpai mehe dük ha jatthü kü nyinghütuh.

⁹ Büpa kü lokeishuoh, büpa kü menvih kesho lokeishuoh; Büpalei yashanyale douthü jung etuh.

¹⁰ Büpalei daülangpü men müknyinshekhang; Shembüpa yempüthülei mongdang mongongtuh.

¹¹ Shembüpa kü veituh hatü büpalei wong kü düngei büpalei dhe yemtuh.

¹² Büpai dükpü thamapü douthü, büpalei yashanyale douthü, hatü büpai shahphenpü deih-ei dangtuh,

¹³ Oh büpa chongphopü Israelei hühihathü, Oh büpai jepü Jakobei hapeüthü.

¹⁴ Büpayü Shembüpa jenei Kahvang; Büpai shahphenpü kahdoknyü peü lemei nyüke.

¹⁵ Büpai vangpüshuwpü düngei deihnyüpeih, büpai epü shahthü denshem haja haja deihnyüpeih,

¹⁶ Büpai Abraham mü vangeishuwpü hatü Isak mü lahteipü deihnyüpeih.

¹⁷ Büpai hapayü Jakob kü shahkung hük keiha, Israel kü nedohnetenpü vangpüshuwpü keiha lingpeih:

¹⁸ Am kü ngei Kanan kahdokü ammei mükjüp vaishi shuohhen.

¹⁹ Mechem jom nanglak bhei-ie maani mon nyupa, maani mon yenpa keiha nyupa,

²⁰ jom jat hük kübü hük shei, hatü ongching hük kübü hük shei longteihampeih.

²¹ Büpai üam kao jom kü shüveihen nehan; hathülei men kü loh-ei e,

²² “Ngei jepüthü kü laki tehong; ngelei thibüthü kü ten tedük.”

²³ Shembüpa kü kesho lokeishuoh kahdoknyü peüi; nyihjeih büpa yemleipü jung baongeishuoh.

²⁴ Jatthü kü büpalei müknyinshekhang; büpalei thamapü douthü jung hangku peü kü nyinghütuh.

²⁵ Mehenangkü Shembüpayü longpü hatü duei-ouhen shangpü; kahvangthü peü shak kü büpa kü dhüm shuohtuh.

²⁶ Mehenangkü jatthülei kahvangthü kemei lajei monha, shejao Shembüpai vangshothü lingpeih.

²⁷ Müknyinshekhang hatü dhüm büpa mü nyüke; wong hatü mongong büpa nyushingei nyüke.

²⁸ Oh jatthü phanghiyang kemei Shembüpa kü men vihtuh, Shembüpalei müknyinshekhang hatü wong kü vihtuh,

²⁹ Büpalei men müknyinshekhang shei Shembüpa kü vihtuh; moila koei büpa touei peikei. Büpa daülangshemshepü müknyinshekhang kü Shembüpa khümtuh.

³⁰ Kahdoknyü peüi büpa touei kheütuh! kahdoknyü-ü wong kohshi chonglingei nyüke; hapa shinei nedaipeih.

³¹ Vangshothü mongongtuh, kahdoknyü mongmeituh; “Shembüpayü Ongpa!” shei jatthüi ehütuh.

³² Yungching hatü halei nyupü lemphüi ngeü antuh; Kah hatü halei nyupü lemphüli mongongtuh!

³³ Yinghilongi mongongpai Shembüpa touei kesho lokhen; mehenangkü büpai kahdoknyü shahphenhen yiükünyüke.

³⁴ Shembüpa kü menvih shuohtuh, mehenangkü büpa meipü nyüke; büpa bampü hüdenhalenshi nyüke.

³⁵ “Ham yangtuh, Oh Kahvang ham yemleipüba; hami nüngei daülangpü men menvih, hatü hami nüng men vih-ei müknyinshekhanghen nangkü jatthü toueipü ham thaiyei leitü yangshih” shei lentuh.

³⁶ Nedohnetenpü kübü nedohnetenpü thahshi Shembüpa, Israel Kahvang kü shaang hatü dohpü neshiüi men longtuh. Hahepak kü nanglak peüi, “Amen” hatü “Shembüpa men longtuh” shei eteke.

Jerusalem hatü Gibeonei Khümpü

³⁷ Davidi Asaph hatü büpa mü sheühteipüthü Shembüpalei Vangpüshuwpü Pela touei nyihjeih nadang aimü düngei chongphohen shingvaishi tuhphong.

³⁸ Büpai shao Obed-Edom hatü büpa mü sheühteipü jom pejempüshet hathü mü chongphohen tuhphong. Obed-Edom Jeduthunei cheha hatü Hosah nyiyü shaden yombü nyuteke.

³⁹ Davidi Zadok ngongpa hatü büpa mü jempü ngongpathü Gibeonei Shembüpalei ashakshem yomei tuhphong.

⁴⁰ Israel am kü shuohpü Shembüpalei shahkung kü nyangei nyupü keiha jomphongi düngei dhom kü, om kü shei Shembüpa kü jakpü moila shuohhen nyu.

⁴¹ Jomphong mü Heman hatü Jeduthun hatü Shembüpa kü menvih shuohhen men nyangei jetükpü aopüthü peü nyuteke; “mehenangkü büpa bampü düngei nyunyeih.”

⁴² Heman hatü Jeduthun nyiyü daülangpü kesho lokpü amit, cymbal hatü lebü kesho lokpü hadirthü vünghen jeyei tuh. Jeduthunei hapeüthü shaden yomhen je.

⁴³ Hapheikü nanglakthü peü laophülei shem yemei leidaikem, hatü Davidao büpalei shem am kü moihimanhen shemei lei.