1 SHÜPPÜKENGPÜ 13 - DAÜLANGPÜ LAIHING (BSI)

Kidronei Vangpüshuwpü Pela Leipü

¹ Davidi haja shak kü, kho shak kü veshan mübüthü hatü lakchongbüthü peü mü danteipü longpü nyu.

² Büpai hahepak kü Israel am thaipü khong peü kü, “Am kü ha meipü khih shei deihjema, hatü hapayü Shembüpa, jenei Kahvangi mongpü vaijema, jeni Israel kahdok kemeilei jenei lebü jeihinaüthü hatü jom mü laophü laophülei jila hatü phaümük kü nyupü Levi am peü jen touei omkahen shingvaishi peü kü shah shomshah.

³ Jeni jen touei jenei Kahvangei Vangpüshuwpü Pela leishah; mehenangkü Sauli vanglem lempü hepak kü hapa baong neyemi tuhtükpeih” shei e.

⁴ Thaipü nanglakthü peüi hapa kü mong; mehenangkü hapayü nanglak peüi jiüangke shei deihteke.

⁵ Hanangkü Davidi Israel am peü Ijip leipü Shihor Yungyen kübü Lebo-hamath thahshi Kiriath-Jearim leipü Kahvangei Vangpüshuwpü Pela leihen shingvaishi thaihü.

⁶ David hatü büpa mü Israel am peü cherubim nyi aa kü uoshi nyupü Shembüpa Kahvangei Vangpüshuwpü Pela leihen Judah kahdok Baalahlei (Kiriath-Jearim) aongteke.

⁷ Jomi Kahvangei Vangpüshuwpü Pela Abinadabei shem leipü mohoh khari ja hük kü shihtü Uzzah hi Ahio nyi-i ha mütü lei.

⁸ David hatü Israel am kemei jomei wong kempai Kahvang kü harp, cymbal, phaam hatü amit vüngei kesho lok.

⁹ Mechem jom Kidon leipü hah tenshing ngoipa, mohohbaongi huluh shuohpü nangkü Uzzah-i hapa Vangpüshuwpü Pela kü laki dük.

¹⁰ Shembüpai Uzzah kü mongshih, hatü Vangpüshuwpü Pela kü laki dükpü nangkü büpa jütük. Hanangkü büpa hatou mü Kahvang touei di.

¹¹ Shembüpai mongshihpai Uzzah kü mongshih-ei jütükpü nangkü David mongshih, hatü hapa shingkü shaang thahshi Perez-uzzah shei nyüknyüke.

¹² Ha nyih Davidi Shembüpa kü nyemei, “Mekei etü ngei sheyü hapa Vangpüshuwpü Pela koei leiaokhen?” shei phe.

¹³ Büpai hapa Vangpüshuwpü Pela büpa mü David Chingnyülei koei nelei, shejao Gath am Obed-Edom shei epülei shemei leiyei tuh.

¹⁴ Lenyang jem thahshi hapa Kahvangei Vangpüshuwpü Pela Obed-Edomei shemei tuh, hatü Shembüpai jom shem hatü lemphüli kü moihiman shuohteke.