1 SHÜPPÜKENGPÜ 12 - DAÜLANGPÜ LAIHING (BSI)

Benjamin am David Phei Müpüthü

¹ Kishlei cheha Saul toueipü laongei daiyei nyushi Ziklagei David touei peipü shennyakthü hathü nyu, hatü jomi büpa kü vehok kü sheühteke.

² Jomphongü pülah kaphen nevaijü yaong dungtü laknyong lakdah kü shükhen manpüthü nyu; jomphongü Benjamin jat Saulei shem am nyu:

³ Gibeah am Shemaahlei cheha Ahiezer jomei mübü hatü Joash, Azmavethlei cheha Jeziel hatü Pelet; Anathoth am Berakah hatü Jehu;

⁴ hatü Gibeon am Ishmaiah, Hapüan khongkü wong kohpü, Hapüan khongkü mübü; Gederah am Jeremiah, Jahaziel, Johanan, Jozabad;

⁵ Huphath am Eluzai, Jerimoth, Bealiah, Shemariah hatü Shephatiah;

⁶ Kohath am Elkanah, Isshiah, Azarel, Joezer hatü Jashobeam;

⁷ hatü Gedor leipü Jerohamei cheha Joelah hatü Zebadiah hathü nyuteke.

Gad Jat kübü David Phei Müpüthü

⁸ Bhih kahdok leipü penyüshalei David nyushingkü Gad am hanei David mü om. Jomphongü monglongpü veshan, vehok hokhen temtüktü nyupü, hatü ii hatü phung nohen manpüthü nyu. Jomei dheyü mailangei dhe keiha hatü jomphongü vakhi-ong kü meiyah kei mokaokpüthü nyu.

⁹ Peü mü shopeyü Ezer, nyipabü kü Obadiah, jempabü kü Eliab,

¹⁰ alipabü kü Mishmannah, ngapabü kü Jeremiah,

¹¹ vokpabü kü Attai, nyetpabü kü Eliel,

¹² shetpabü kü Johanan, shüpabü kü Elzabad,

¹³ anpabü kü Jeremiah hatü anpühükpabü kü Makbannai nyuteke.

¹⁴ Hathü Gad amü veshan mübüthü mon nyu; maanpeih shei kho hük shak kü hatü longpeyü haja shak kü mübüthü nyu.

¹⁵ Jordan phang küppei yung longpü kü shongei yung homei heihpeyü jom nyuteke, hatü jomi heong heshü kü kahjilei nyupüthü peü changtük.

Benjamin hatü Judah kübü David Phei Müpüthü

¹⁶ Benjamin am hanei hatü Judah am David touei Penyüshalei heihteke.

¹⁷ Davidi jom mü pongteinüng heih-ei jom kü, “Ammi ngei mü mongjem ponghen, ngei kü sheühhen peiküpü vaijema, ngei am mü mongdang hük leihen; shejao ammi ngelei vepathü touei ngei kü lueilemhen peiküpü vaijema, ngelei laki ten meheyao nedükjao jenei bühipathülei Kahvangi ha eehen hatü am kü shahphenhen.” shei e.

¹⁸ Hahepak kü “Hapüan” khongkü mübü Amasai touei Kahvang laangha pei hatü e: “Hamphongü nüngei, Oh David! Ham nüng mü nyüpeih, Oh Jesselei cheha! Aokpü dangtuh, nüng aokpü dangtuh, hatü nüng kü sheühpüthü aokpü danghütuh! Mehenangkü nüngei Kahvangi nüng kü sheühhen.” Hanangkü Davidi jom yah, hatü büpalei veshanthü shak kü lakchongbüthü leihü.

Manasseh am David Phei Müpüthü

¹⁹ Mechem Saul khüei hokhen shingvaishi Philistia am mü David daipa, hahepak kü Manasseh am hanei David mü shepteke. Büpa hatü veshanthüi Philistia am kü nesheüh; mehenangkü büpai büpalei shembü Saul touei jen deiyei luphahen khih shei jomei ongthüi nyemei deih; hanangkü jomi shah shuohteitü büpa Ziklag lemei shomtük.

²⁰ Mechem David Ziklagei heihpa, hathü Manasseh ami büpa mü shepteke: Adnah, Jozabad, Jediael, Mikhael, Jozabad, Elihu hatü Zillethai. Jom peü Manasseh kü haja dok kü mübüthü nyu.

²¹ Jomi vehok kü David kü sheüh; mehenangkü jom peü monglongpü veshanthü nyu, hatü jomphongü büpalei veshan mübüthü nyu.

²² Kahvangei veshanthü kei veshanthü longi manglei thahshi nyihjeih shennyakthü David touei peiyei sheüh.

Davidei Veshanthü

²³ Shembüpai ehampükei, Saulei ongching David kü shuohtükhen shingvaishi Hebronei lahhilaong changshi kotü hokhen peipü veshanthü bhei-ie hapakei:

²⁴ Judah am jom 6, 800

²⁵ Simeon am 7, 100;

²⁶ Levi am 4, 600,

²⁷ Aaron am shem mübü Jehoiada mü shennyak 3, 700,

²⁸ hatü monglongpü nethe veshan Zadok mü jomei shemdep kübü lakchongbüthü jom hapünyi;

²⁹ hapa shan thahshi Saul kü mong kemei shuohshi nyupü Saulei jeihinaü Benjamin am 3, 000;

³⁰ Benjamin phang kü monglongpü men-e veshanthü 20, 800;

³¹ Heshüphi Manasseh kübü David ong vaihühen nangkü men yepei jepü shennyak 18, 000;

³² Issakhar am hepak vangpan nyingpü hatü Israel ami mepa dükhen nyingpü longpüthü jom 200 mü jom phang kübü shem am peü;

³³ Zebulun am veshan dousho lekei nyingpü hokhen lahhilaong changshi temtü ajükiyao mong aampü neshiüi lanei shuohpü jom 50, 000;

³⁴ Naphtali am lakchongbüthü 1, 000 mü ii hatü phung temei kotü jom 37, 000;

³⁵ Dan am hokhen temtüktü jom 28, 600;

³⁶ Asher am veshan dousho lekei nyingpü hokhen temtüktü jom 40, 000;

³⁷ Jordan heongphi leipü, Reuben, Gad hatü Heongphi leipü Manasseh am lahhilaong lemphüli temtü 120, 000 nyuteke.

³⁸ Hathü veshanthü peü hokhen temtüktü Israel am peü shak kü David ong vaihühen nangkü Hebronei pei. Aopü Israel am peü David ong vaihühen shei mong hük mü nyu.

³⁹ Hathü shennyakthü peü halei nyih jem thahshi David mü hah-ei yingei nyu; mehenangkü jomei shem ami hahying shomteke.

⁴⁰ Shao jomei chingyowthü Issakhar, Zebulun, hatü Naphtali thahshi kübü gadu, ut, koyei hatü mohohthü kü hahying kohütü pei. Halei atta, adhajük, nyalingngupai van, yiü, olive mainga, mohoh hatü mi changshi shuohteke; Israel kü mongongmongle maei nyu.