1 SHÜPPÜKENGPÜ 10 - DAÜLANGPÜ LAIHING (BSI)

Saul Ongpa Dipü

¹ Shaang Philistia ami Israel am khüei hok; Israel am thepju kübü nyai hatü Gilboa Kahshangei longi mah.

² Philistia ami Saul hatü chehathü phei thah, hatü jomi Saulei cheha Jonathan, Abinadab hatü Malkishua hathü jü.

³ Saul shonei vehok longi mangshi hok hatü vepathüi lah kaptü nemei-i ma yahhü.

⁴ Saul-i büpalei lahhilaong kobü kü, “Nüngei yan yah-ei ngei jütüktuh; hei nevaijema nejaptükpüthü peiyei ngei kü deyeinaamei lingphahen khih” shei e. Shejao büpalei lahhilaong kobüi nyemei deih, hatü ha nedükshuoh; hanangkü Sauli laophü nyingi yan yah-ei baphahtü di.

⁵ Mechem lahhilaong kobüi Saul dipü eepa, büpaiyao büpalei yan yah-ei baphahtü di.

⁶ Hanangkü Saul hatü chehathü jom jemphen hatü büpalei shem am peü chemi di.

⁷ Mechem kahjilei nyupü Israel am peüi veshanthü nyaidaipü hatü Saul hatü chehathü didaipü eepa, jomi laophülei jilathü tuhtü nyaidaikem, hatü Philistia am peiyei kaamlang.

⁸ Nyihphei, mechem Philistia ami dipü mahngthü leipü büm bomei yahhen peijapa, jomphong kü Saul hatü chehathü Gilboa Kahshangei diyei shükshi chongjateke.

⁹ Jomi büm kemei bomei yah hatü büpalei shangjing dakei lahhilaong peü yahtü Philistia kahdok peü lemei jomei lajei hatü nanglakthü touei hapa shahjang koei shahjang kobüthü shom.

¹⁰ Jomi büpalei lahhilaong jomei kahvangei phopshemei tuh, hatü büpalei shangjing Dagon kahvang khümshemei sheüshi tuh.

¹¹ Mechem Jabesh-gileadei nyupüthüi Saul kü Philistia ami dükpü jung lemphü danpa,

¹² jomei monglongpü veshanthü heih-ei Saul hatü chehathülei mahng Jabeshlei yahei leiteke. Hapheikü jomi hathülei mahng longkhampü phangei vüei tuh hatü nyih nyet shüaeiyungle.

¹³ Saul-ü Shembüpa kü hingnelempü nangkü di; büpai Shembüpai epü shah nebang; büpai lem müpü danghen yimpi laang kü pheteke,

¹⁴ shejao Shembüpa kü nephe. Hanangkü Shembüpai büpa jütüktü Jesselei cheha David kü ongching shuohtük.