1 SAMUEL 9 - DAÜLANGPÜ LAIHING (BSI)

Samueli Saul Ong Vaihen Jepü

¹ Benjamin am shemmeipa, shongnyü shennyak hükei meni, Kish shei nyu. Büpayü Benjamin am Aphiahlei cheha Bekorath, Bekorathlei cheha Zeror, Zerorlei cheha Abielei cheha nyuteke.

² Büpalei hapeü meni, Saul shei mentü longi nethe meishi nyu. Israel am khong kü büpa mü nyeishi nethe meipü shennyak hükao nenyu; büpayü lebü peü mü shao lushi nyu.

³ Shaang Saulei chepa, Kishlei gaduthü baüei lüdai. Hanangkü Kish-i cheha Saul kü, “Nüng mü naü hük mütü daiyei hapa gadu yemtuh” shei e.

⁴ Büpai phaüshang kahdok Ephraim homei hatü Shalishah homei dai, shejao jiji-i hathü nedang. Shao jiji-i Shaalim kahdokao homei dai, shejao jiji-i haleiyao nedang. Shao jiji-i Ephraim kahdok homei dai, shejao haleiyao nedang.

⁵ Mechem jiji Zuph amei kahdok ngoipa, Sauli büpa mü deihahpü naü kü, “Ji leidaishah, hei nevaijema opai gaduthü nangkü nevai, ji nangkü mongdok vaihen khih” shei e.

⁶ Shejao naüi büpa kü, “Hapa jilalei Kahvang shennyak hük nyüpeih; büpayü mih peüi longi dhüm kohshi noteinyeih. Büpai epü peü jiüshi khan vamnyuja. Jiyao halei heihshah; üpai nyingpa, ji melemei yemhen ephanüng aokpeih” shei e.

⁷ Shejao Sauli naü kü, “Ji büpalei heihjema mehe noei heihjahen? Jiei khongha leipü aan kemdaiteke. Kahvang shennyak kü shuohhen thintho meheyao neshiü. Jiei lakei mehe nyüpa?” shei e.

⁸ Hapa naüi Saul kü shao, “Veituh, ngelei lakei ngin maanpü hük hüshi nyüpeih. Ji melemei hathü yemei daihen ha nyemephanüng ngei hapa Kahvang shennyak kü shuohhen hih” shei e.

⁹ (Shelei Israel leiyü, shennyak hük Kahvang kü lemhük phehahnüng daijema, büpai, “Kei, veibülei heihshah” shei ehamteke; mehenangkü shaang thibü shei nyükpü kü veibü shei ehamteke.)

¹⁰ Sauli naü kü, “Meiteke, kei, heihshah” shei e. Hanangkü jiji-i Kahvang shennyak nyupü shingei heih.

¹¹ Jiji-i hapa jila lemei vien kü bakei aongjashingkü jiji-i nelathü hanei yung shonüng yiüpü heüei, “Veibü halei nyüla?” shei phe.

¹² Nelathüi, “Büpayü anji sheküang aongdaitih. Moktuh; mehenangkü nanglakthü moidülei moila shuohpü nangkü büpa shinnyih-ang hamei jilalei yiüküpeih.

¹³ Anji jila ngoihinüng, büpa moidülei hahyinghen mangshüdai-i chongkahen hih. Büpa mangngoi thahshi nanglakthüi meheyao hahyingei chongnepanghen; mehenangkü büpai moila kü moihimanhen, hapheikü mon nyükpüthüi hahhen. Aongjatuh, büpa lomi ponghen hih” shei eteke.

¹⁴ Hanangkü jiji jilalei aongei ngoijashingkü moidülei aongnüng shei Samuel jiji lemei heihjaei ee.

¹⁵ Shaang Saul peijahen nyihshong Shembüpai Samuel kü shakei vamei hapa hutüktü nyuteke.

¹⁶ “Ngenyih hapa hepak kü ngei Benjamin kahdok leipü shennyak hük shomphahen. Ngelei Israel nanglakthü shak kü vanglem lemhen thiteiphuei jetuh; büpai ngelei nanglakthü Philistia amei lak kübü yanghen. Ngei ngelei nanglakthü ponghahpü eetepih; mehenangkü jom theppü ngei ngoiteke” shei e.

¹⁷ Mechem Samueli Saul kü veipa, Shembüpai büpa kü, “Ngei nüng kü epü shennyakü hapa hih; büpai ngelei nanglakthü kü vanglem lemhen” shei e.

¹⁸ Hahepak kü Sauli shadenei heih-ei Samuel kü, “Veibülei shem melei nyüpüshang nüngi ephahen hiang?” shei phe.

¹⁹ Samueli, “Veibü-ü ngei hih” shei e. “Ngei shekü nüng moidülei aongei chongkei. Shinnyih nüngü ngei mü hahyinghen, hatü ngenep dhom mü-ang ngei nüng leishihhen, hatü nüngei mongei mehe deihshi nyüpa, hayao nüng kü ephahen.

²⁰ Gaduthü nangü mahpheikü shinnyihpai nyih jem lomteke, hathü nangkü mongteshang; hathüyü dangteke. Shejao Israel nanglak kemei-i longi napeyü nüng hatü am shem am nevaipü je?” shei e.

²¹ Shejao Sauli, “Ngeiyü Benjamin phang kübü; Israel jatthü khongkü peü mü maanpü jat, hatü ham shemü Benjamin phang khong kao peü mü maanpü shem hih. Mehekei ngei kü henüng shah ekünya?” shei e.

²² Hahepak kü Samueli Saul hatü büpa mü nyupü naü nyi shemei müei shüei peipü yen hapüan hükshing uoshi nyupü shelei uohüteke.

²³ Samueli bhaong howbü kü, “Ngei nüng kü hayaoha jaoei tuhtuh shei tuhpü phai ankei” shei e.

²⁴ Hanangkü bhaong howbüi hayaoha tuhpü shüng yah-ei anei Saul touei haü. Samueli, “Hapayü nüng shing tuhpeih, hahtuh; mehenangkü hapayü ngei nyükpü yenthü mü shaang hahhen shingvaishi nüng shing jaoei tuhpeih” shei e. Hanangkü ha nyih Saul-i Samuel mü hahying.

²⁵ Mechem jomphong moidü leipü jilalei yiüpa, shem jaandokei shinshing hük tem, hatü Saul halei paümteke.

²⁶ Mechem vangngaipa, Samueli Saul kü shem adokeipü nyükei, “Temtuh, ngei nüng leishihhen” shei e. Mechem Saul temjapa, büpa hatü Samuel nyi chemi laoei dai.

²⁷ Jomphong chingjung ngoiyaki Samueli Saul kü, “Naü kü nüng shekü kamei nyemnyukününg eyeishuoh” shei e, hatü naü leidai, hatü Samueli, “Kahvang leipü shahjang ngei nüng kü ephanüng nüng kansho hük dankütuh” shei e.