1 SAMUEL 8 - DAÜLANGPÜ LAIHING (BSI)

Israel ami Ong Yünyüke

¹ Mechem Samuel viüdaipa, büpai büpalei chehathü shahphenbüthü vaihen je.

² Büpalei hashongpalei menü Joel, nyipabü hapeülei menü Abijah nyu, hatü jiji-i Beer-shebalei chongphoei nyu.

³ Shejao cheha nyi-i büpalei lem kü nekam. Jiji-i laophü shümoh meihen lem yemei dai, hatü yawhdou yah-ei shahhing ne-e-i shahphenteke.

⁴ Hanangkü Israel am Ramahlei Samuel touei peiyei,

⁵ jomi büpa kü, “Nüng sheyü viüdaiteke, hatü anhanyi-i nüngei lem kü nekamnyu; hanangkü lebü jatthüi angpükei ham mühen shingvaishi ong hük jeshih” shei e.

⁶ Shejao mechem jomi, “Ham kü müphahen shingvaishi ong hük jeshih” shei eshuohpa, hapai Samuel longi mongmang; hanangkü büpai Shembüpa kü phop,

⁷ hatü Shembüpai büpa kü, “Nanglakthüi nüng kü epü peü bangtuh; jomi nüng yaktüknyu nevai, shejao jomei ong vaipü ngei yaktüknyu khihma.

⁸ Ngei jom Ijip leipü müei leipü nyih kübü shinnyih thahshi ngei yakphongtü lebü kahvangthü khümei ngei kü dükphopü keiha nüng kao jomi dükphahen khihma.

⁹ Hanangkü shaang jomi epü kü bangtuh, shejao jom shak kü vanglem lemhen ongi jom kü mehe dükhen ha jom kü mongkü ponghen mü shahvüng yah-eishuoh” shei e.

¹⁰ Hanangkü Samueli ong yüpü nanglakthü kü Shembüpalei shahthü peü eshuohteke.

¹¹ Büpai, “Am shak kü vanglem lemhen ongpai hapakei dükphahen: ‘Büpai ammei yeshangthü yah-ei büpalei koyei khari hatü koyeithü müteihühen, hatü jomphongü büpalei koyei khari shekü thepju kü deishihhen.

¹² Büpai jom hanei haja shak kü mübü, pinyipüan shak kü mübü, hatü lebüthüyü büpalei kah lingei, hatü hah vethen, hatü nedoh-i haneiyü büpalei vehok phunglang vaihühen hatü büpalei koyei khari kü hadir vaihen.

¹³ Büpai ammei yiükhathüyü vong meipü meli lingpü am leihühen, haneiyü büpalei bhaong howbü hatü an oukpü am leihühen,

¹⁴ büpai ammei meipü kahthü, nyalingngupai kahthü, olive kahthü yah-ei büpalei lakchongbüthü, hatü büpalei ong uoshingei sheühteipüthü kü shuohtükhen.

¹⁵ Büpai ammei hahying hatü nyalingngupai kübü ankhong yah-ei büpalei lakchongbüthü hatü büpa mü nyupüthü kü shuohtükhen,

¹⁶ büpai ammei aathü, meipü mohohthü, gaduthü yah-ei büpa nadang kü noteihen.

¹⁷ Büpai ammei mithü kübü ankhong yahlangphahen hatü amü büpalei aa leihen.

¹⁸ Mechem hathü nyih ngoikahenshang, ammi laophüi jehahpü ong nangkü leneiwonghen, shejao Shembüpai ha nyih am kü nejangphahen’ ” shei e.

¹⁹ Shejao nanglakthüi Samueli epü kü nebangi, “Nevaipih! Hami ong hük nanyüpeih.

²⁰ Shejüang hamao lebü jatthü keiha, ham müphahen hatü ham shekü daiyei vehok hokkahen” shei e.

²¹ Mechem Samueli nanglakthüi epü peü danpa, büpai hapa Shembüpa kü e.

²² Shembüpai jangei, “Jomi epü kü bangtuh, hatü ong hük yah-eishuoh” shei e. Hapheikü Samueli Israel nanglakthü kü laophü laophü nyushingei leidaituh shei e.