1 SAMUEL 5 - DAÜLANGPÜ LAIHING (BSI)

Philistia am hatü Vangpüshuwpü Pela

¹ Mechem Philistia ami Kahvangei Vangpüshuwpü Pela yahpa, jomi Ebenezar leipü Ashdodlei koei lei.

² Jomi hapa Kahvangei Vangpüshuwpü Pela koei leiyei Dagon kahvang khümshemei Dagon lajei touei haüshi tuh.

³ Mechem Ashdodlei nyupü shennyakthüi nepphei paoei veishuohpa, Dagon kahvang lajeiyü Shembüpalei Vangpüshuwpü Pela tüngei dhe kahdok kü shüshi doei chongjateke. Hanangkü jomi hapa Dagon phukei hapalei shingei haüphong.

⁴ Shejao mechem jomi nepphei paoei veipa, hapa Dagonü kahdokei dhe shüshi Shembüpalei Vangpüshuwpü Pela touei doei chongjateke, hatü Dagonei shangjing hatü lak nyiphen bhagei shaden tüngei shükshi chongjateke; Dagonei büm mon haüshi nyu.

⁵ Hanangkü shinnyih thahshi Dagonei ngongpathü nevaijü ha kü khümpüthü üami Ashdodlei Dagon khümshemei shünya, peüi nekami khamei shünyüpeih.

⁶ Shembüpalei lak Ashdodlei nyupü shennyakthü kü vihyaki no, hatü büpai Ashdod hatü hapa kü ngeihpü shonpü shennyakthü longi nyempü, hanghi shuoh, hatü büm daoeipoukei tünghü.

⁷ Mechem Ashdod ami hapa vampü eepa, jomi, “Israel Kahvangei Vangpüshuwpü Pela hapakei jen mü netuhshah; mehenangkü büpai jen hatü jenei Dagon kahvang kü lak vihyaki nonyüke” shei etei.

⁸ Hanangkü jomi Philistia am vanglem lembüthü peü nyükei thaihütü jomphong kü, “Israel Kahvangei Vangpüshuwpü Pela nang mekei eteihenang?” shei phe. Jomi jangei, “Israel Kahvangei Vangpüshuwpü Pelayü Gathlei deitüktuh” shei e. Hanangkü jomi Israel Kahvangei Vangpüshupü Pela Gathlei deitük.

⁹ Shejao jomi hapa Gathlei deitükphei kao Shembüpalei lak hapa chingnyü kü vihyaki no; longi shanghah ponghüteke. Büpai hapa chingnyü kübü behe hashih peü büm poukei hanghihü.

¹⁰ Hanangkü jomi Kahvangei Vangpüshuwpü Pela Ekronei deishihtük. Shejao mechem Kahvangei Vangpüshuwpü Pela Ekron ngoijapa, Ekron ami leneiwongei, “Hathüi jen hatü jenei nanglakthü nyemjütük shei Israel Kahvangei Vangpüshupü Pela koei deikünyüke” shei e.

¹¹ Hanangkü jomi Philistia am vanglem lembüthü peü nyükei thaihütü, “Israel Kahvangei Vangpüshuwpü Pela leitüktuh; hapalei shingei leitüktuh, hei nevaijema jen hatü jenei nanglakthü mahkemhen khih” shei e. Mehenangkü hapa chingnyü kü dihen mü shangpong yakying longi nyu, hatü Kahvangei lak vihyaki nyuteke.

¹² Nedipüthüao büm daoeipoukei tüng, hatü chingnyü kü theppüyoungpü vang mü vüngshi aong.