1 SAMUEL 4 - DAÜLANGPÜ LAIHING (BSI)

Vangpüshuwpü Pela

¹ Samueli epü shah Israel am peü kü peiteke. Hathü nyih kü Philistia ami Israel am khüei hokhen thai. Hanangkü Israel amao jom mü hokhen layaongei dai, hatü jomi Ebenezerlei baümtap ve, hatü Philistia ami Apheklei baümtap ve.

² Philistia ami Israel am khüei thepju kü yaonghen veshanthü show kü uoteke, hatü hokei heihshingkü Philistia ami Israel am kü neü, hatü thep pongshingei shennyak haja ali thahshi mah.

³ Mechem veshanthü baümtapei leijapa, Israel am behethüi, “Mehekei shinnyih Shembüpai jen kü Philistia ami-ang aokhüpa yo? Hanangkü jeni Shiloh leipü Shembüpalei Vangpüshuwpü Pela yah-ei leishah, shejüang büpa jen mü omshi daikahen hatü vepathülei lak kübü jen yangphahen” shei e.

⁴ Hanangkü nanglakthüi Shilohlei shennyakthü shomei deishih-ei cherubim shangkü haüshi nyupü Jeiyong Shembüpalei Vangpüshuwpü Pela koei lei, hatü Elilei cheha Hophni hatü Phinehas nyiao Shembüpalei Vangpüshuwpü Pela mü müei lei.

⁵ Mechem Shembüpalei Vangpüshuwpü Pela leiyei baümtapei shüpa, Israel am peü yaongei kahdokao jenshi lenteke.

⁶ Hapa vaakpü danei, “Hebrew amei baümtap leiyü mehe ngeüang yo?” shei Philistia ami phetei. Mechem jomi Shembüpalei Vangpüshuwpü Pela baümtapei leiyei nyüpüja shei danpa,

⁷ jom longi nyem. “Kahvang hük jomei baümtapei leiyei nyüpüja” shei etei. “Jen lomohshasha khih! Hapakei chemao shelei nevamangpih;

⁸ jen lomohhen khih! Hapakei wong kohpü kahvangthülei ngan kübü üpai jen yangphahenang? Jahpanei nyushi Ijip am kü chamhilem lemmü lemmü vamei ponghüpeyü ha kahvangthü hih.

⁹ Monglongtuh, Oh Philistia am, bapeühapeü khihma, hei nevaijema, jom jenei aa vaipükei, jenao jomei aa vaidaihen khih. Hanangkü bapeühapeü leshi hoktuh” shei e.

¹⁰ Philistia ami monglongshi hok, hatü Israel amü neneüi laophü laophülei baümtapei nyaiyei lei. Shennyak longi mah. Israel am la mü hokpü veshan haja hapüan mah.

¹¹ Kahvangei Vangpüshuwpü Pela omei yahlang; hatü Elilei cheha Hophni hatü Phinehas nyiyao jütük.

Eli Dipü

¹² Ha nyih Benjamin am shennyak hük thepju kübü büpalei ashak shaktüktü, hatü shangjing kü kahdok nyiotü Shilohlei leiteke.

¹³ Mechem büpa ngoijapa, Eli-ü lem philei veishi uoshi nyu; mehenangkü büpai Kahvangei Vangpüshuwpü Pela nang deih-ei nyuteke. Mechem hapa shennyak ching ngoiyei mehe vampa ha jung ejashingkü ching kemei leneiwong.

¹⁴ Mechem Eli-i hapa lenpüwongpü danpa, büpai, “Hapayü mehe kü lenteikünya?” shei phe. Hahepak kü hapa shennyaki mokei heih-ei Eli kü ha shahjang eshuoh.

¹⁵ Shaang Eliyü nyübüh bong büalipüanpüshet nyu, hatü sheyü müki lanshei ne-ee-i nyuteke.

¹⁶ Büpai Eli kü, “Ngeiyü shaangüng thepju kübü leiküpeih, shinnyih-üng ngei haleipü laongei leiküpeih” shei e. Eli-i, “Hapeü, mekei mekei vampa?” shei phe.

¹⁷ Shahjang koei leipü shennyaki jangei, “Israel am peü Philistia am kü nyemei nyaipeih, hatü veshanthü longi mahdaitih, hatü nüngei anha Hophni hatü Phinehas nyiyao mahdai, hatü Shembüpalei Vangpüshuwpü Pela-ao yahlangtih” shei e.

¹⁸ Mechem büpai Vangpüshuwpü Pela jung omei ejapa, Eli-i büpa uopü uoshing ngaümphei phi lemei doei shatüngei shük hatü büpa ngaümchong mangtük, hatü büpa hammü di; mehenangkü büpayü vüdaipü nangkü laknolathan neaoki nyu. Büpai Israel am bong pinyi thahshi müteke.

¹⁹ Shaang chehalei shembünyü, Phinehaslei chenyüha büm nekongi hapeü anghen hepak ngoidaitü nyu. Mechem pinnyüi Kahvangei Vangpüshuwpü Pela yahlangpü, hatü chepahalei chepa hatü chepahayao didaipüja shei danpa, pinnyü kü shaang tou aa kü tüngpü peiyei naü büh.

²⁰ Sheyü pinnyü didaihen mü nyushi, pinnyü kü jungpü nyühathüi pinnyü kü, “Nüng mong temaan, yeshang hük nüngi bühteke” shei e. Shejao pinnyüi ha kü ngangei thaungei nevei.

²¹ Pinnyüi hapa naü kü Ikabod, lappai, “Israel kübü müknyinshekhang yandaiteke” shei men; mehenangkü Kahvangei Vangpüshuwpü Pela yahlang; chepahalei chepa hatü chepahayao didai.

²² Pinnyüi, “Israel kübü müknyinshekhang yandaiteke; mehenangkü Kahvangei Vangpüshuwpü Pela yahlangteke” shei e.