1 SAMUEL 31 - DAÜLANGPÜ LAIHING (BSI)

Saul hatü Chehathü Dipü

¹ Shaang Philistia ami Israel am khüei hok; Israel am jom toueipü nyai, hatü Gilboalei longi jüteke.

² Shejao Philistia ami Saul hatü büpalei chehathü Jonathan, Abinadab hatü Malkishua yepei jütük.

³ Saul shinei longi nemei-i hokteke, hatü vepalei phungi büpa kü sheütü longi nemei-i ma yah.

⁴ Büpai büpalei vehok phunglang kopü nethepa kü, “Hathü Kahvang neshiüpü nejaptükpü Philistia ami ngei kü nyieneinyangei angtü jüphümangi nüngi nüngei yan yah-ei ngei kü bapshih” shei e. Shejao büpalei vehok phunglang kobüi hapayü nedükhü; mehenangkü büpai nyemei deih. Hanangkü Sauli laophü nyingi büpalei yan yah-ei vethahteke.

⁵ Mechem büpalei vehok phunglang kobüi Saul didaiteke shei nyingpa, büpai laophülei yani vethahtü büpa mü chemi didai.

⁶ Hanangkü Saul, büpalei hapeüthü jom jem, hatü büpalei vehok phunglang kobü hatü büpalei shennyakthü nyihcha hük kü mahkem.

⁷ Mechem Kahji hatü Jordan yungdangei nyupü Israel ami Israel veshanthü nyemei nyaiteke hatü Saul hatü chehathü mahteke shei danpa, laophülei ching yakphongtü nyaidai, hatü Philistia am peiyei hathü shingthü khüamei yahlang.

⁸ Nyihphei, mechem Philistia ami mahng leipü dou bomhen heihpa, Saul hatü büpalei chehathü jom jemphen Gilboa Kahshangei diyei shükshi chongjateke.

⁹ Jomi büpalei shangjing dakei, büm kübü büm-ow nyiukei yah, hatü Philistia kahdok peü lemei jomei lajeithü hatü nanglakthü touei shahjangmei koei phongmokbüthü shom.

¹⁰ Hatü jomi büpalei vehok ow Artarte kahvang khümshemei tuh, hatü jomi büpalei büm Beth-Shean chingnyü bhamba kü sheüshi tuh.

¹¹ Shejao mechem Jabesh-Gilead ami Saul kü Philistia ami dükpü jung danpa,

¹² wong kohpü vehokbüthü kemei layaongei vangnyak daiyei Saul hatü chehathülei mahng Beth-Shean chingnyü bhamba leipü yah. Jomi Jabeshlei leiyei hatouei aw kü jaktük.

¹³ Hatü jomi hathülei vangthü yah-ei Jabeshlei tamarisk pü phangei vüphong, hatü nyih nyet thahshi shüaeiyungleyei nyu.