1 SAMUEL 30 - DAÜLANGPÜ LAIHING (BSI)

Amalek am mü Hokpü

¹ Mechem nyih jempabü kü David hatü büpalei shennyakthüi Ziklag ngoipa, Amalek ami Negeb hatü Ziklag nyi hahtü awi haptük,

² hatü nyühathü hatü halei nyupü longpü maanpü kemei wüpküpei yah-ei lüdai; jomi hükao nejütüki shetei lüdai.

³ Mechem David hatü büpalei shennyakthü ching ngoijapa, chingü awi haptüktü nyüha hapeüthü kemei shetei lüdaitü nyujateke.

⁴ Hahepak kü David hatü büpalei shennyakthü wong kemshi thep.

⁵ Davidei chenyüha Jezreel am Ahinoam hatü Karmel am Nabali tuhphongpü Abigail vaümnyüao wüpküpei deilangtü nyu.

⁶ Davidü longpü vongshüh kü nyu; peüi büpa kü yaongi shükei jühen eteiyei nyu; mehenangkü nanglakthü kemei laophülei nyüha hapeüthü nangkü longi shahyaki deihshi nyu. Shejao Davidi Shembüpa Kahvang leipü wong dangteke.

⁷ Davidi Ahimelekhei cheha Abiathar ngongpa kü, “Ngei kü bhagthuh deikei” shei e. Abiathari büpa kü hapa deiyei shuoh,

⁸ hatü Davidi Shembüpa kü, “Hapa vepathü phei changei ngei dai-üla? Ngei jom yep-üla? shei phe. Büpai büpa kü, ‘Nüngi jom phei changei daituh, hatü hingmei nüngi jom phei thah-aokhen, hatü nüngi wüpküpei deilangpüthü yangaokhen hih’ ” shei e.

⁹ David hatü büpa mü nyupü shennyak jom kho vok layaongei Besor yungyenei ngoiyei haneiyü halei nyu;

¹⁰ mehenangkü shennyak kho nyi yungyen homei daihen nyiudaipü nangkü tuhphongtü Davidi shennyak kho ali mon mütü changei dai.

¹¹ David mü daipüthüi kahlei Ijip am shennyak hük dangei David touei müei lei; jomi büpa kü yinghen yung hatü nük shuoh;

¹² hatü adhajüki lingpü aan, hatü nyalingngupai van hahhen shuoh. Büpai hathü hahtü aeipü meiyei wong koh, mehenangkü nyih jem ya jem thahshi büpai mehe hahyingao nehah-i nyu.

¹³ Davidi büpa kü, “Nüngei shembü üpaang, hatü nüng meleipüang?” shei phe. Büpai, “Ngeiyü Ijip am, Amalek am hükei aa hih. Nyih jem daiteke, ngei tüngjapü nangkü ngelei shembüi ngei yakphongtü lüdaipeih.

¹⁴ Hamphongi Judah heshüphi Kereth am Negeb, hatü Kalebei kahmük hahpeih, hatü Ziklag awi haptükpeih” shei e.

¹⁵ Davidi büpa kü, “Hathü ching hahpüthü nyupü shingei nüngi ngei müei dai-üla?” shei phe. Büpai, “Kahvang men kü nüngi ngei nejütükpih nevaijü ngelei shembü kü yepei neshuohpih shei lahshih, shejema ngei-i nüng müei yiühen” shei e.

¹⁶ Büpai David müei yiüjashingkü Philistia hatü Judah leipü mophimothü longi yah-ei leipü nangkü moeitapei, haheiyingei yaüshi nyuteke.

¹⁷ Davidi nepnüng dhom mebü nyihphei om dhüshi jom mü hok. Nethe jom kho ali ut kü uotü nyaidaipü mü lenei üpayao neyangaok.

¹⁸ Amalek ami yahlangpü lemphü yah-ei lei, hatü chenyüha nyiphen yangei lei.

¹⁹ Hashih nevaijü behe, yeshang nevaijü yiükha, jomi yah-ei daipü dou meheyao nemah.

²⁰ Davidi mi hatü mohohthü kemei nyokei yah, hatü büpalei shennyakthüi lebüthülei yemthü shekü, “Hapayü Davidei hean” shei eshi müei lei.

²¹ Hapheikü Davidi nyiupü nangkü büpa phei nemüaokpüthü hatü Besor yungyenei tuhphongpüthü touei peiteke. Jomphongi David mü pongteinüng jom mü nyupü shennyak mü vamteke. David hatü büpalei shennyakthü leiyei jomphong kü selam shuoh.

²² Shejao David mü daipü nemeipü hatü yahlak neshiüpü shennyakthüi, “Jomphong jen mü nedaipü nangkü laophülei nyüha hatü hapeüthü yahpü mü lenei jeni dangei leipü mophimothü nehanpih” shei e.

²³ Shejao Davidi, “Jeihinaüthü, Shembüpai mehe shuoh hapa kü jeni hapakei nedükpih. Jen khüei peipü vepathü kübü büpai jen yangtü jenei lak kü jom shuohpeih.

²⁴ Amphongi epü kü üpai bangkahenang? Mehenangkü vehok kü daipü hatü nedai-i hahying yungying shüpeikengei nyupüthü peüi hean aihük mü hanhen” shei e.

²⁵ Davidi hapayü shahkungnyü kei ling, hatü Israel kü shaang thahshi hapakei düknyüpeih.

²⁶ Mechem David Ziklagei peipa, büpa büpalei küphü Judah am behethü kü, “Halei Shembüpalei vepathü leipü yahpü douthü hanei amphong kü thintho shomphünyeih” shei e.

²⁷ Hapayü Bethelei nyupüthü Ramoth, Negeb hatü Jatir,

²⁸ Aroer, Siphmoth, Eshtemoa,

²⁹ hatü Ralkal; Jerahmeel jilalei nyupüthü hatü Kenizz;

³⁰ Hormah, Bor-Ashan, Athakh,

³¹ hatü Hebron hatü David hatü büpalei shennyakthüi longteipü shingthü peü touei shomteke.