1 SAMUEL 29 - DAÜLANGPÜ LAIHING (BSI)

Philistia ami David Neyahpü

¹ Philistia ami jomei veshanthü kemei Apheklei thaihü hatü Israel ami Jezreel kahji yunglok vamshingei baümtap ve.

² Philistia am ongthü laophülei veshanthü kho mü haja mü shei mütü daishingkü David hatü büpalei shennyakthüao Akhish ongpa pheikü müshi dai.

³ Philistia am veshan mübüthüi jomphong eeyei, “Hathü Hebrew am hatouei mehe lingnya?” shei phe. Akhish ongpai Philistia am mübüthü kü, “Hapayü Israel ongpa Saulei lakchongbü David nevaipü je? Büpa ngei mü bong kansho hük nyuei heihpeih hatü büpai Saul tuhphongtü peiküpü nyih kübü shinnyih thahshi büpai pungpü shei ngei neheüangpih” shei e.

⁴ Shejao Philistia am mübüthüi büpa kü mongshih-ei, “Hapa shennyak nüngi hanshuohpü shingei nyokei leitüktuh; büpa mekei etao jen mü chemi vehokei nedaiküpih, hei nevaijema büpai vehokei jenei vepa leikahen. Hatouei nyupü shennyakthülei shotao yah-ei leijüang büpai laophülei shembü mü mong shephen nevaipü je?” shei e.

⁵ “Sauli haja jüpeih, Davidi haja an jüpeih” shei jomi phaukteiyei lokpeyü hapa David kü epü nevaipü je? shei jomi eteke.

⁶ Hahepak kü Akhish-i David kü nyükei, “Vanyangyem Shembüpalei men kü ngei enyeih, nüng ngei mü nyupü thahshi shahhing kü nyupeih hatü nüngi ngei mü chemi vehokei daiyei hokhenao ngei mongongshi deihnyeih; mehenangkü nüng ngei touei peiküpü nyih kübü shinnyih thahshi nüng kü nejiüpü meheyao ne-eeangpih, shejoongpa veshan mübüthüi nüngao omshi daihen nemongnyu.

⁷ Hanangkü mongnemangi nyushingei leidaituh; Philistia am ongthü mongmanghen mü meheyao nedükshah” shei e.

⁸ Shejao Davidi, “Ngei mehe dükpa? Ngelei shembü ongpalei men kü daiyei nüngei vepathü mü nehokhen mü ngei nüng touei peiküpü nyih kübü shinnyih thahshi ngei mehe pungpü eeyei nyüpa?” shei phe.

⁹ Akhish-i David kü, “Nüngü Kahvangei phongshan kei ngei veiheni nüng kü eelahen neshiü shei nyingei nyüpeih; Philistia am mübüthüi, ‘Büpa jen mü vehok kü tedeikei’ shei enyüke” shei e.

¹⁰ “Hanangkü ngenep lomi layaongei nüng hatü nüng mü peipü nüngei shembü chongphobüthü müei ngei nüng kü hanphopü shingei vangngaihinüng nyokei leidaishih. Hapakei ten keiha ephopü kü mongei lemhük kei tedeih” shei e.

¹¹ Hanangkü Davidi büpalei shennyakthü mütü dhom mü lomi Philistia kahdok yemei lei, shejao Philistia am Jezreel lemei aongteke.