1 SAMUEL 28 - DAÜLANGPÜ LAIHING (BSI)

Saul hatü Endor am Thibülanyü

¹ Hathü nyih kü Philistia ami Israel am mü hokhen shingvaishi veshanthü longi thaiteke. Akhish-i David kü, “Nüng hatü nüngei shennyakthü ngelei veshanthü mü omei daihen nyinghahte” shei eshuohteke.

² Davidi, “Nüngei chongphobüi mehe dükaokhen ha nüngi eehen” shei e. Akhish-i jangei, “Meiteke, nüngü ngei yombü vaihühen” shei e.

³ Shaang, Samuel didai. Hanangkü Israel am kemei büpa kü mahng thepei nyu hatü büpayü büpalei jila Ramahlei vüphong. Sauli kahmük kübü thihivam hatü phongyomteipüthü kemei changtük.

⁴ Philistia am thaitü peiyei Shunemlei baümtap ve. Sauli Israel am peü thaihütü Gilboalei baümtap ve.

⁵ Mechem Sauli Philistia am veshanthü eepa, büpa nyemteke, hatü büpalei mong longi kheüteke.

⁶ Mechem Sauli Shembüpa kü phepa, Shembüpai büpa kü mangh mü nevaijü Urim nevaijü Thummim homei nevaijü thibüthü homeiyao jangpü neshuoh.

⁷ Hahepak kü Sauli büpalei chongphobüthü kü, “Phongyomteipü nyüha hük yemkütuh; ngei pinnyü touei peiyei phehen hih” shei e. Büpalei chongphobüthüi büpa kü, “Endorlei hük nyüpüja” shei eshuoh.

⁸ Hanangkü Sauli büpa nyingi büpa nevaipükei lingtü mih-ei ow owtü yanüng büpa mü shennyak nyi mütü hapa thibülanyü touei peiyei, “Ngei kü phongyomshih hatü ngei nüng kü men epü shennyakei laangha nyükkütuh” shei e.

⁹ Hapa nyühai büpa kü, “Sauli mehe dükpa ha nüngi nyingei shiühen; büpai kahmük kübü phongyomteipüthü hatü nyüha thibüthü kemei changtükpeih. Ngei nyemdi shei nüngi mehekei ngelei yangnyu kü tai haennya?” shei e.

¹⁰ Shejao Sauli Shembüpalei men kü pinnyü touei vangei, “Vanyangyem Shembüpalei men kü hapa tata kü shei nüng kü mehe hanghiyao nepeiküpih” shei e.

¹¹ Hahepak kü hapa thibülanyüi, “Üpa kü nyükphahenang?” shei phe. Büpai, “Samuel kü nyükshih” shei e.

¹² Mechem hapa nyühai Samuel eepa, pinnyüi ngeüwong anei vaütü Saul kü, “Mehekei nüngi ngei kü lueilemnya? Nüngü Saul ongpa khih!” shei e.

¹³ Ongpai pinnyü kü, “Nüng tenyem; nüngi mehe eenyüke?” shei phe. Pinnyüi, Saul kü, “Ngei laangha hük kahmong leipü vamkei-i eenyüke” shei e.

¹⁴ Büpai pinnyü kü, “Büpa veiheni mekei khih?” shei phe. Pinnyüi, “Viüpa hük ashak ümtü vamkei-i eenyüke” shei e. Hanangkü Sauli hapayü Samuel khih shei nying hatü büpa kahdokei aümei shatü khüm.

¹⁵ Samueli Saul kü, “Mehekei nüngi ngei kü nyükei hanghihünya?” shei e. Sauli, “Ngei longi mongtok mongshang kü nyunyeih; mehenangkü Philistia ami ngei mü hoknyüke, hatü Kahvang ngei toueipü dhe lepdai; ngei phopjü thibüthü nevaijü mangh homeiyao jangpü neshuohnyu; hanangkü ngei mehe dükhen nyem-epha shei nüng kü nyükpeih” shei e.

¹⁶ Samueli, “Shembüpa nüng toueipü lepdaiphei kü hatü nüngei vepa vaidaiphei kü mehekei nüngi ngei kü phenya?

¹⁷ Shembüpai ngei homei epü keiha nüng kü dükphünyu khihma; Shembüpai nüngei lakmong leipü ongching yah-ei nüngei chingyowpa David kü shuohtükteke.

¹⁸ Mehenangkü nüngi Shembüpalei shah nebang hatü nüngi büpa mongshihpü aimü Amalek am kü nedük; hanangkü shinnyih Shembüpai nüng kü hapa dou dükphünyu khih.

¹⁹ Nyeinya vaishi Shembüpai Philistia amei lak kü Israel am nüngao omshi shuohtükhen; hatü ngenyih nüng hatü anhapeüthü ngei mü nyuhen; Shembüpai Israel am veshanthü Philistia amei lak kü shuohtükhen” shei e.

²⁰ Samueli hathü shah eshuohpü nangkü Sauli ngangahük kü nyemei kahdokei doei yangteke, hatü büpa helu hatü vangnyak meheyao nehahpü nangkü wong kemdai.

²¹ Hapa nyüha Saul touei peiyei veishingkü Saul longi nyempü eeyei pinnyüi büpa kü, “Nüng chongphobüi nüngi epü bangei düktepih. Ngelei yangnyu mahhen kao nenyemi nüngi ngei kü epü bangei düktepih;

²² Hanangkü shaang, nüngi nüng chongphobüi epü kü bangtuh; nüng leilem kü wong kohhen shangmü hahying temphanüng nüngi hapa hahtuh” shei e.

²³ Shejao büpai, “Anyoh, ngei nehahpih” shei e. Shejao büpalei chongphobüi, nyühanyüao omshi hahtuh shei eshuoh, hatü büpai jomphongi epü bang. Büpai kahdok leipü paoei lüng shangei uo.

²⁴ Shaang hapa nyühanyülei shemei nitshüpü mohoh cheha nyu; pinnyüi hapa jü hatü pinnyüi atta yah-ei daw neshih-i aan ling.

²⁵ Pinnyüi hathü temei Saul hatü büpalei chongphobüthü kü shuoh, hatü jomphongi hapa hah. Hapheikü jomphongi layaongei ha ya-üng leidai.