1 SAMUEL 25 - DAÜLANGPÜ LAIHING (BSI)

Samuel Didaipü

¹ Shaang Samuel di hatü Israel am kemei thaiyei büpa kü mahng thep, hatü jomi Ramah leipü büpalei shemei mahng vüphong. Hapheikü David layaongei Paran jahpanei dai.

² Karmelei mop longi angpü shemmeipa hük Maon jilalei nyu. Büpalei mi haja jem hatü yum haja hük nyuteke. Büpa Karmelei heih-ei mimum japei nyu.

³ Büpalei menü Nabal hatü chenyühalei menü Abigail nyuteke. Pinnyü-ü kon kohshi hatü nela meishi shiüteke shejao Kaleb am phang chepahayü men-e shennyak nevai hatü monglep nemeipü shennyak nyuteke.

⁴ Nabali mimum japteinyuja shei jahpanei nyushi danei Davidi nethe jom an kü, “Amphong Karmelei aongtuh, hatü Nabal touei peiyei ngelei men kü selam eyeishuoh” shei e.

⁵ Hanangkü Davidi nethethü an shom, hatü Davidi nethethü kü, “Amphong Karmelei aongtuh hatü ngelei men kü Nabal kü selam eyeishuoh” shei e.

⁶ Büpa kü, “Nüng yangnyu shoshoshi nyutuh! Nüng hatü am shem mü chingmei nyiushemmei nyutuh hatü nüngi angpü lemphü kü moihiman nyutuh! shei eyeishuoh.

⁷ Sheyü mimum japhen hepak ngoinyuja shei ngei dannyüke. Nüngei mi yombüthü hamphong mü nyuhampeih hatü hami jomphong kü meheyao nemei-i nedük, hepak yangkemei jom hamphong mü nyu hatü jomphongi meheyao nemahtük.

⁸ Nüngei mi yombüthü kü phejü ephahen hih. Sheyü mo hepak ngoikünyüke, hanangkü nüngi phahjiei nüngei lakei mehe nyu hapa chingmeilemlingei nüngei chongphobüthü hatü nüngei hapeü David kü yahshih shei yüeishuoh” shei etü shom.

⁹ Mechem Davidei shennyakthü hapa shing ngoipa, jomphongi Nabal kü Davidi shompü shah eshuohteke hatü omdanei nyu.

¹⁰ Shejao Nabali Davidei shennyakthü kü, “Hapa David üpaang? Hapa Jesselei chehayü üpaang? Shinnyih ngenyih kü laophülei shembü leipü paüdaipü chongphobüthü longi nyüke.

¹¹ Mehekei ngei ngelei mimum jappüthü kü tempü aan, yung hatü jom shing jüpü phai meleipü peipü nenyingpü shennyakhthü kü mehekei shuohhen?” shei e.

¹² Hanangkü Davidei shennyakthü nyokei leiyei hathü kemei büpa kü eshuohteke.

¹³ Davidi büpalei shennyakthü kü, “Am peüi laophülei yan laaptuh” shei e. Hanangkü jom peüi laophülei yan laap hatü shennyak kho nyi hahying henghen tuhphongtü shennyak kho ali hükshing David phei müei aong.

¹⁴ Shejao Nabalei chenyüha Abigail kü jomei chongphobü khongkü hüki, “Davidi jahpan leipü jenei shembü kü selam koei phongmokbüthü shomjü büpai longi yaüeilungei lohshuohpü vaai shei ejateke.

¹⁵ Jomphongü hamphong mü longi meishi nyuhampeih. Jomphongi meheyao nemei-i nedükpha, hatü hepak yangkemei hamphongü jomphong mü meheyao nemahnechah-i nyupeih.

¹⁶ Nyakhingai kemei kü jomi ham yangei hamphongü jom yopailei mi yomei nyupeih.

¹⁷ Hanangkü ha nyingtuh hatü nüngi mehe dükshuohhen nüngi nyinghahtuh; mehenangkü jenei shembü hatü shem am kemei kü nemei-i dükhen temei nyüke. Büpa ahshi nemeipü nangkü üpaiyao büpa mü shah ne-eteiaoknyu” shei eshuohteke.

¹⁸ Abigaili ajükao ne-angi aan kho nyi, yiü-üm nyi, meishi shoktükpü mi nga, vantükpü nyalingngupai choung kho hük, hatü adhajük vani lingpü aan kho nyi yah-ei gaduthü kü kohütü,

¹⁹ pinnyülei chongphobüthü kü, “Ngei am pheilei mükahen hih, amphong shelei kamei chongkei” shei e. Shejao pinnyüi chepaha Nabal kü hapa nang ne-eshuoh.

²⁰ Pinnyüi gadu kü uotü kahshangla ngoijashing kü David hatü büpalei shennyakthü pinnyü lemei yiüjaei jom mü pongtei.

²¹ “Hapa shennyakei mophimo lemhükao nemahtüki hapa jahpanei tuhpeyü angsha kü veiteihampü khih; ngei mei dükshuohjü büpai ngei kü ten nyokei shuohpü khih.

²² Ngenep vangngaipü thahshi hapa shennyakei yeshang hük dangkao yemmü tuhjema Kahvangi ngei kü nyeinya nemeipü nyemdükpha shei Davidi ehah-ei nyuteke.”

²³ Mechem Abigaili David eepa, pinnyü shülangi gadu dokshang leipü shüh-ei kahdok kü dhe shüshi David touei aümei sha.

²⁴ Pinnyüi büpalei la tüngei doei lemtü, “Ngelei shembü, ten kemei ngei mon koshah; chingmeilemlingei nüngei chongphobüi nüng kü ephüshah, hatü nüngei chongphobüi epü banglangshih.

²⁵ Ngelei shembü, hapa nyingnyoi deiaei nemeipü shennyak Nabali epü kü meheyao shihlangei tedeih; büpayü büpalei men kei-üng nyüpeih; büpalei menü Nabal khih, büpa kü hapa ngapüyoipü lüpshi nyüpeih; shejao ngelei shembü, nüng chongphobüi nüngi shompü nethethü ne-eeangpih” shei eteke.

²⁶ “Hanangkü shaang ngelei shembü, nüngei laki bhüh yemei iy yenhen kübü Shembüpai shoungei tuhpü khih. Nüngei vepathü üami nüng kü nemeipü dükhen yemnya, jomphongao Nabal kei hanghihen.

²⁷ Hatü nüng chongphobüi nüng kü koei peiküpü hapa thintho yah-ei nüng mü nyupü nethethü kü shuohtuh.

²⁸ Nüngei chongphobüi pungpü kü chingmeilemlingei mang tükshih; mehenangkü hingmei Shembüpai nüng kü nemahnechahpü ongching hük linghen; mehenangkü nüngi Shembüpalei med kü hoknyüpeih. Nüng yemmü nyupü thahshi mehe pungpüshaipao nevamhühen.

²⁹ Hanei ami nüng kü changlangmao hatü nüng jütüknüng yemlangmao Shembüpa, nüngei Kahvangi büpalei kaokphang yangphangi jümshi yanglanghen, shejao nüngei vepathüyü büpai nyeikaunglah kübü yaongphaang kapei deitükpükei yaktükhen.

³⁰ Mechem Shembüpai nüng kü lahpü doumeithü kemei dükpa, hatü Israel kü ong vaihen jepa,

³¹ ngelei shembüi mechemao baong nedangi bhüh yemei iy yenpai mong kü hanggovih nevaijü mongshang nepeihahhen. Mechem Shembüpai nüng kü moihimanphahen ngei tebetükma” shei e.

³² Davidi Abigail kü, “Ngei mü pongteinüng shinnyih nüng shompü Shembüpa, Israel amei Kahvang men longtuh!

³³ Nüng kenhingmonghahpü hatü ngei ngelei laki bhüh yemei shinnyih iy yenhen nyupü kübü yangpü kü men longtuh.

³⁴ Hei nevailangmeyü nüng paoh ngei mü pongteinüng lomi nepeilangmeyü ngenep vangngaipü thahshi Nabalei yeshang hükao yemmü netuhhen ngei Shembüpa, Israel Kahvang kü vangtüktü nyupeih” shei e.

³⁵ Hapheikü Davidi büpa kü mehe pinnyüi koei pei, hapa yahtü, “Mongongshi shemei leituh; nüngei shahthü ngei danteke hatü nüngi khümpü kü ngei mongongnyüpeih” shei eteke.

³⁶ Mechem Abigaili Nabal yemei leijapa, büpayü shemei ongpa kei moei chongjateke. Büpayü yiüi chokdaitü mongnyü mongha ongshi chongjateke, hanangkü pinnyüi büpa kü vang mangngai thahshi meheyao ne-eshuoh.

³⁷ Nepnüng dhom mü büpa monghingei leipheikü chenyühai büpa kü peü ejashingkü mong mah-ei büpa yaong keiha leidai.

³⁸ Nyih an hükshing daipheikü Shembüpai Nabal kü bhei hatü büpa didai.

³⁹ Nabal didaiteke shei mechem Davidi danpa, büpai, “Ngei kü yaüeilungei epü Nabal kü ngei leimao Shembüpai bhüh yempü kü Shembüpa men longtuh. Ngei nejiüi dükhen kübü büpai ngei yangpeih hatü Nabali laophülei mang tata kü Shembüpai hanghi shuohteke” shei e. Hapheikü Davidi Abigail mü shem yemhen pheteke.

⁴⁰ Büpalei chongphobü Karmelei heih-ei Abigail kü, “Davidi nüngü büpalei nyüha vaihen müei leikei shei epha-i heihküpeih” shei e.

⁴¹ Abigail kahdokei aümei shatü “Nüngei chongphobü ngei hamü nyüpeih nüng chongphobü hatü nüngei chongphobüthülei la phuhen mongei nyüpeih” shei e.

⁴² Abigaili shülangi gadu dokshangei uo, hatü pinnyülei chongphobüthü jom nga omshi Davidei phongmokbüthü mü dai, hatü pinnyü büpalei nyüha vaiteke.

⁴³ Davidi Jezreel am Ahinoam mao shem yemteke hatü jijiphen büpalei shembünyü vaiteke.

⁴⁴ Shejao Sauli büpalei yiükha Mikhal, Davidei chenyüha Gallim leipü Laishlei cheha Paltiel kü shuohtük.