1 SAMUEL 22 - DAÜLANGPÜ LAIHING (BSI)

Adullam hatü Mizpahlei David Daipü

¹ Davidi Gath leipü daiyei Adullam yopai leipü yaongsha hükei joshi nyu. Mechem büpalei jeihinaüthüi hatü chepalei shem ami ha danpa, jomphongi halei büpa touei pei.

² Mongshang kotü nyupüthü, hang kotü nyupüthü hatü mong neongi nyupüthü kemei büpa touei thai, hatü büpayü jomphongei mübü vaiteke. Büpa mü shennyak kho ali hükshing nyuteke.

³ Haleipü David Moab kahdok Mizpahlei heih-ei Moab ongpa kü, “Kahvangi ngei kü mehe dükhen ha mangnying thahshi nüngi onyü opa am nüng mü tuhhen aoküla?” shei phe.

⁴ Hanangkü David yaongshalei jopü thahshi chenyü chepa nyi Moab ongpa mü tuhteke.

⁵ Hahepak kü Gad thibüi David touei peiyei, “Nüng yaongshalei joshi tenyu; Judah kahdokei lüdaituh” shei e. Hanangkü Davidi haleipü daiyei Hereth phaülei nyu.

Sauli Nob amei Ngongpa Jüpü

⁶ Shaang Sauli David hatü büpalei shennyakthü dangteke shei dan. Saulü phung notü büpalei lakchongbüthüi shonei yahtü Gibeah Kahshangei tamarisk pü phangei uoshi nyu.

⁷ Sauli büpa shonei yaongpü chongphobüthü kü, “Benjamin shennyakthü banghümao! Jesselei chehai amphong peü kü kah hatü nyalingngupai kahthü yahphahen je; büpai amphong kü haja shak kü hatü kho hük shak kü mübü leihühen je?

⁸ Hanangkü am peüi ngei khüei phaüshah shownyu je? Ngelei hapeüi Jesselei cheha mü vangpüshuwpü lingpü üpaiyao ngei kü ne-epha. Shinnyih lingpü keiha ngelei chongphobüi ngei jühen nangkü ngelei hapeüi lem lingpü nang amphong üpaiyao ngei kü mong nemei-i deihtü ha jung ne-epha” shei eteke.

⁹ Edom am Doeg, üpa Saulei lakchongbüthü mü yaongshi nyu, büpai “Ngei Jesselei cheha Noblei Ahitubei cheha Ahimelekh touei peipü eetepih;

¹⁰ Davidi mehe dükhen büpai Shembüpa kü pheteke, hatü büpai David kü hahying hatü Philistia am Goliathlei yanlu yahshuohpü vaai” shei e.

¹¹ Ongpai Ahitubei cheha Ahimelekh ngongpa hatü büpalei shem am kemei hatü Noblei nyupü ngongpathü kemei nyüknüng deishih, hatü jom peü ongpa touei peiteke.

¹² Sauli, “Ahitubei cheha bangtuh” shei e. Büpai, “Ngelei shembü, eshihma” shei e.

¹³ Sauli büpa kü, “Jesselei cheha anjinyi-i ngei khüei mehekei phaüshah shownya? Shinnyihpü keiha büpai ngei khüei yaongei ngei nyemjütük shei mehekei nüngi büpa kü hahying, hatü yanlu shuoh-ei büpa nangkü Shembüpa kü phepa?” shei e.

¹⁴ Ahimelekh-i ongpa kü, “David keiha nüngei chongphobüthü khongkü mong kemei shuohpü, nüngei yiükha yahpü shennyak, nüng yompü veshanthü kü mübü, hatü nüngei ongching kü peüi longi dhüm shuohpü shennyak üpa nyüpa?

¹⁵ Büpa nangkü Shembüpa kü phepeyü ha nyih shongpü je? Nevai! shejao nüng khüei epeih shei epü nangkeyü, ongpai nüngei chongphobü nevaijü büpalei shem am kü tenong; mehenangkü nüngei chongphobü ngei-i hapa nang shei meheyao nenyingangpih” shei e.

¹⁶ Shejao ongpai, “Ahimelekh, nüng hatü am shem kemei dihen” shei e.

¹⁷ Hahepak kü ongpai yaakei büpa toueipü yombüthü kü, “Yaakei leiyei Shembüpalei ngongpathü jütuh; mehenangkü jomphongao David kü sheühnyu khih; jomphongi David lüdaipü nyingtü ha jung ngei kü ngaiyei ne-epeih” shei e. Shejao ongpalei chongphobüthüi Shembüpalei ngongpathü jühen lak neno.

¹⁸ Hanangkü Sauli Doeg kü, “Doeg, nüngi yaakei leiyei jomphong jütuh” shei e. Hanangkü Edom am Doeg-i yaakei leiyei jomphong jütük. Ha nyih büpai ngongpa ow owpü ngongpathü büalipünga jüteke.

¹⁹ Sauli ngongpathülei chingnyü Nob, haleipü nyüha, baha, hashihnaüha, mohoh, gadu hatü mithü kemei jütük.

²⁰ Shejao Ahitubei cheha Ahimelekh, Ahimelekhei cheha Abiathar laongei daiyei yang hatü David mü nyu.

²¹ Büpai David kü Sauli Shembüpalei ngongpathü jütükkemteke shei ejateke.

²² Hahepak kü Davidi Abiathar kü, “Ha nyih Edom am Doeg halei shüpeih, hatü büpai hapa ejashasha shei ngei nyingtepih. Ampa am shem kemei dipeyü ngei tata kü hih.

²³ Ngei mü nyushah; tenyem; nüng jününg shei yempübai ngeiyao jününg shei yemnyu khihma. Nüng ngei mü nyujema yangaokhen” shei eteke.