1 SAMUEL 21 - DAÜLANGPÜ LAIHING (BSI)

David Noblei Nyupü

¹ David Noblei nyupü ngongpa Ahimelekh touei pei. Ahimelekh-i kheüyaki büpa mü heüteiyei, “Nüng monha mekei peiküpa? Nüng mü mehekei üpayao nemüpa?” shei phe.

² Davidi Ahimelekh ngongpa kü, “Ongpai ngei hayaoha dousho hük kü shompeih hatü hapa nang üpa kao tenyinghü shei ephopeih, hatü ngei ngelei shennyakthü mü shing haneilei pongteipeih.

³ Shaang nüngei lakei meheyao hahhen nyüla? Nyujema aan nga nevaijü lebü mehe mehe nyüpa yahshih” shei e.

⁴ Shejao ngongpai David kü, “Ngelei lakei lebü aan payü neshiüang shejao daülangpü aan mon nyüpeih. Hapayü nethethüi jom nying kü nyühathü mü yanei nyuaokjema hapa hahhen aok” shei e.

⁵ Davidi ngongpa kü, “Ngelei shennyakthü peü henüng kübü daülangi nyüpeih; hami düngei hapakei nevaipü kangpü dousho kü daijü dangkao daülang daülangi dainyeih, shinnyih-ü hayaoha kangpü dousho kü dainyu vütei-i daülangi nyüpeih” shei e.

⁶ Hanangkü ngongpai büpa kü daülangpü aan shuoh; mehenangkü Kahvang kü moila shuohtükpü aan mü lenei lebü nenyu; Hapayü Shembüpa kü moilatükpü aan ja jeihen hepak kü ngaipü nyuteke.

⁷ Shaang hatouei Saulei mi yombüthü khong kü longpü, Edom am meni Doeg, büpaao Shembüpa touei daühühen shingvaishi danei nyu.

⁸ Davidi Ahimelekh kü, “Nüngei lakei phung nevaijü yan nyüla? Ongpai ahshi shülangi epü nangkü yan nevaijü lebü hadir yahhenao nang nedangi daiküpeih” shei e.

⁹ Ngongpai, “Nüngi Elah kahjilei jüpü Philistia am Goliathlei yanlu mon ashaki jümtü bhagthuh shangei haüshi shüpeih. Ha mü lenei lebü yan neshiü; nüngi najema ha yahhahtuh” shei e. Davidi, “Henüng yempü-ü! Hapa keipü lebü neshiüpih, yahshih” shei e.

David Gathlei Daipü

¹⁰ Ha nyih Davidi Saul toueipü layaongei daiyei Gath am Akhish ongpa touei pei.

¹¹ Akhish ongpalei chongphobüthüi büpa kü, “Hapayü hapa kahdok kü ongpa, David nevaipü je? Nyühathüi phaukteiyei kesho lokshingkü, ‘Sauli haja jüpeih, Davidi haja an jüpeih’ shei kesho lokshuohpeyü büpa nevaipü je?” shei phe.

¹² Davidi hathü shah mong kü vihyaki yah, hatü Gath ongpa Akhish kü nyemteke.

¹³ Hanangkü büpai jomphong touei ngapa kei deiaei yeiyaei hu. Peshaden kübü sha kü nyangei, jumum kü yien yenei huteke.

¹⁴ Akhish-i büpalei chongphobüthü kü, “Veituh hapa shennyak kü; büpayü nganyu khihma! Mehekei büpa ngei touei deiküpa?

¹⁵ Ngei ngapai taoteke shei amphongi ngei touei hapa shennyak henüng nyemdükkei shei deiküpü je? Henüng shennyak ngelei shemei peihühen je?” shei e.