1 SAMUEL 2 - DAÜLANGPÜ LAIHING (BSI)

¹ Hapheikü Hannah-i phopei eteke: “Ngelei Shembüpa kü mongongnyeih; ngelei mong Shembüpa kü shangei anshihnyeih. Ngelei jui vepathü kü naamnyi nyinyüpeih; mehenangkü nüngi yangpü nangkü ngei mongongnyeih.

² Shembüpa keiha daülangpü üpayao neshiü; nüng mü lenpü üpayao neshiü; Jenei Kahvang kei Yaong üpayao neshiü.

³ Hajük ahshi changmei shah te-e; nüngei ju kübü changmei shah tevamhü; Mehenangkü Shembüpayü kihikon Kahvang, hatü büpai dükpü douthü peü doknyüpeih.

⁴ Hamhimanei lahhilaong bhagdainyüke, shejao wong nekohpüang wong kohnyüke.

⁵ Chem moh-eileyei hahhampüthü shaang nük ju omhük kü nang shanyüke, shejao aeiyei nyupüthü hajük kü ne-aeinyu. Nyülani hapeü nyet angteke, shejao hapeü longi angpü nyüang hükao neshiü.

⁶ Shembüpai jünyeih hatü yangei leishihnyeih; büpai mahngchongei müei yünyeih, hatü yangei leishihnyeih.

⁷ Shembüpai taohünyeih, hatü anghünyeih; Büpai maanpü leihünyeih hatü longei anshihnyeih.

⁸ Büpai taopathü kübhih kübü, hatü nehahneyingpüthü depla kübü phuklangnyeih, hatü büpai jom ongthü mü uohünyeih, hatü dhüm kohpü ong uoshing mükjüp danghünyeih. Mehenangkü kahdoknyülei chongnyiam yaongthüyü Shembüpalei; hathü shangkü büpai kahdoknyü lingei tuhpeih.

⁹ Büpai hingshangpüthülei la yomhen, shejao nemeipüthüyü shangmang kü jütükhen; shennyak hüki laophülei wongi aokpü nedangnyih.”

¹⁰ Üami Shembüpa khüei yaongnya lomohhen. Büpai jom khüei vangsho leipü vangmuk khunghen; Shembüpai kahdok junghijang ngoishi shahphenhen. Büpai laophülei ong kü wong shuohhen, hatü laophüi thiteiphuei jepü kü ngan shuohhen.

Elilei Nemeipü Hapeü Nyi

¹¹ Hapheikü Elkanah Ramah leipü shemei leidai, shejao hapa naü Eli ngongpa mü Shembüpa chongphoei nyu.

¹² Elilei cheha nyiyü nemeipü shennyak nyu; jijinyi-i Shembüpa kü ie kü neshih,

¹³ nevaijü ngongpathüi nanglakthü kü dükhen dousho kü mong neshuoh. Mechem shennyak hanei-i jakpü moila shuohhenshang ngongpalei chongphobüi lakjaang jem phaakpü haoklak notü peiyei phai cheüei nyushingkü,

¹⁴ phaidük kü hapa haoklak hingtü meshük omei aongjahenshang laophü shing yahhamteke. Hapa keiha Israel am Shilohlei peijapü peü kü dükhamteke.

¹⁵ Nyeinya vaishi cheü aw kü jakshekü ngongpalei chongphobü peiyei jakpü moila shuohpüthü kü, “Ngongpai shoukei hahhen phaithüng yahshih; büpai am leipü phailang neyahkahen; phaithüng mon yahkahen” shei ehamteke.

¹⁶ Moila shuohpü shennyaki büpa kü, “Shongei cheü shong nyemjakkei hatü hapheikü nüngi napükei yahhahtuh” shei eshuohjü büpai, “Nevai, nüngi shaang-üng yahshih; hei nevaijema aettei yahlanghen” shei ehamteke.

¹⁷ Hanangkü nethenyilei mangü Shembüpa touei ahshi longshi nyu; mehenangkü jijinyi-i Shembüpalei moila ne-ienelemi noteiteke.

Shilohlei Hashih Samuel Nyupü

¹⁸ Hashih Samuel-ü nyemin bhagthuh thuhtü Shembüpa chongphoei nyu.

¹⁹ Bong ieyei chenyüi büpa shing bhagthuh maanpü hük thüngei bong dohpü moila shuohhen chepaha mü aongei shuohhamteke.

²⁰ Eli-i Elkanah hatü chenyüha nyi kü moihimanei, “Pinnyüi Shembüpa kü hapa naü shuohtükpü nangjei hapa nyüha homei shao lebü hapeüthü Shembüpai nyemyahphama” shei ehamteke. Hapheikü jomphong jomei shemei lei.

²¹ Hatü Shembüpai Hannah kü phahjiei deih; pinnyü büm nekongi lei hatü yeshang jem hatü yiükha nyi büh hatü hashih Samuel-ü Shembüpa chongphoei longteke.

Eli hatü Jom Shem Nang Tetpü

²² Shaang Eliyü longi viüei behe leidai. Büpalei cheha nyi-i Israel am peü kü nopü hatü ashakshem shadenei chongphopü nyühathü mü mükbongjuyung dükpü jung danteke.

²³ Büpai jiji kü, “Mehekei anji-i henüng dou düknya? Mehenangkü anji-i nemei-i dükpü kemei hathü nanglakthü leipü ngei danpeih.

²⁴ Tahma, ngelei hapeü nyi, Shembüpalei nanglakthü khongkü eteiyei ngei danpü shah-ü mei nevaipih.

²⁵ Shennyak hüki shennyak hük homei mang thahjema, hapa kü Kahvangi baong kü ithen, shejao shennyak hüki Shembüpa khüei mang thahjema büpa kü üpai baong kü ithen?” shei e. Shejao cheha nyi-i chepai epü nebang; mehenangkü jiji jütükhenü Shembüpai mongpü nyuteke.

²⁶ Hashih Samuel-ü bümhishao kü hatü Kahvang hatü shennyak tou kü monghahshi longteke.

Eli am Shemong Khüei Tetpüvanpü

²⁷ Shaang Kahvang shennyak hük Eli touei peiyei büpa kü e, “Shembüpai hapakei enyüke: Ijiplei Pharaoh ong phangkü aa vaishi nyushi ngei nüngei bühipa Aaron kü shakei vamei hutepih.

²⁸ Ngelei ngongpa vaihen, ngelei moidülei aonghen, ayingshü jakhen, ngei touei ngong-ow owhen shingvaishi Israel am jat longi khong kübü ngei büpa jepeih. Ngei büpa kü Israel ami aw kü jakei shuohpü moila-ao shuohpeih.

²⁹ Nanglakthü kü yüpü jakpü moila hatü lebü moilathü kü mehekei hahnemei, hatü ngei kü dhüm shuohhen nangjeiyei Israel ami shuohpü moila kübü hean meipü üh-ei anhanyi kü-ang dhüm shuohnya?

³⁰ Hanangkü Shembüpa, Israel Kahvangi hapakei enyüke: Ammei shemong hatü mükhiphangi düngei ngei touei chongphohen shei lahteke, shejao shaang Shembüpai enyüke: ‘Ngei toueipü taishi lüdaituh; üami ngei kü dhüm shuohnya, ngei jom kü dhüm shuohhen, üami ngei yaktüknya, ngeiyao jom nyonghühen.

³¹ Veituh, ngei ammei thehila hatü ammei mükhiphang jütükhen, hatü ammei shahishem üpayao yangnyu shoshoei nenyuhen hepak hük ngoikünyüke.

³² Hapakei nüng lomoh kü nyushingkü lebü Israel am moihimani mapü eeshingkü nüngi vaüei deihkahen, hatü am shem üpayao den lushi nenyuhen.

³³ Shejao ngelei moidü leipü am shem khongkü hük mon mük poukshi thepei mong kü tüngei nyuhen shingvaishi yemmü tuhhen; aopü am shem am nanglak kemei mih-ei yani mahkemhen.

³⁴ Mechem nüngei anha Hophni hatü Phinehas nyi nyihcha hük kü dihenshang, ngei epü peü nüng kü dhaümhen nyangeihepü hük nyukahen.

³⁵ Ngelei mongkü deihpü aimü chongphohen ngongpa hük ngei jehen. Ngei büpalei shemong chongkhenei linghen, hatü büpai ngei thiteiphuei jepü shingei düngei chongphohen.’

³⁶ Hahepak kü aopü am shem am kemei peiyei büpa kü aümei shaei ngin pha hük nevaijü aan bhaok hük nangkü khümei, ‘Hahhen lemhük dangkao danghen shangmü ngongpalei dousho lemhük kü dangkao jeshih’ shei ehen.”