1 SAMUEL 18 - DAÜLANGPÜ LAIHING (BSI)

Sauli David kü Mükhakpü

¹ Davidi Saul mü shah eteiyei kempheikü Saulei cheha Jonathani David mü laangha kü hük lei hatü laophü kü kei David kü bam.

² Ha nyih mü leitü Sauli David shemei neleishih-i büpa mü tuh.

³ Hatü Jonathani laophü kü kei David kü bampü nangkü büpa mü vangpüshuwpü lingteke.

⁴ Jonathani büpai owshi nyupü ow, vehok ow, büpalei yanlu, lah hatü shüngshep hukei David kü shuoh.

⁵ Sauli David melemei shomhenshang lemphüli aokpü dangei mon leijapü nangkü Sauli büpa veshanthü shak kü mübü vaihü. Hapakei dükpü nangkü nanglakthü hatü Saulei lakchongbüthü peüi mongongei deih.

⁶ Davidi Goliath jüpheikü mechem shennyakthü shemei leijapa, Israel kü nyupü jilathü peü kübü nyühathü Saul ongpa mü pongteihen mongongpai kesho lokei, phaukteiyei tambourin hatü liping kongkoih vüngei daiteke.

⁷ Jomphong mongongei phaukteishingkü hapakei kesho venteke. “Sauli haja jüpeih, Davidi haja an jüpeih”.

⁸ Hapa kesho kü Saul longi mongshih; mehenangkü jomphongi Davidi haja an jüpeih, shejao ngeiyü haja jüpeih shei enyüke; sheyü ongching danghen mon aopü khih shei büpai deih.

⁹ Hanangkü ha nyih mü leitü Sauli David kü mük hingshi veiteke.

¹⁰ Nyihphei Shembüpai Saul kü mang laangha hük shom. Davidi nyingnyoi kü kei harp vüngei nyushingkü Saulü shemei boeilengei nyu. Saulü phung hük noshi nyu;

¹¹ hatü büpai hapa yah-ei bham kü haongtü büpa nyingi, “Ngei Davidü bham kü nyeanei hümtü jühen hih” shei e. Shejao Davidi nyipa thahshi ha kübü kaüdai.

¹² Saulü David kü nyem, mehenangkü Shembüpa David mü nyu, shejao Saul kübü yandai.

¹³ Hanangkü büpai David büpa mü nyupü deitük hatü büpa kü veshan haja shak kü mübü vaihen shuoh, hatü hokpüshengpü peü kü Davidi veshanthü mütei.

¹⁴ Büpai dükpü lemphüli kü aokpü dang mehenangkü Shembüpa büpa mü nyu.

¹⁵ Mechem Sauli büpa aokpü dangpü eepa, büpa David kü nyem.

¹⁶ Shejao Israel hatü Judah am kemei David kü bam; mehenangkü hokpüshengpü peü kü büpai jomphong müteiteke.

Davidi Saulei Yiükha mü Shem Yempü

¹⁷ Hahepak kü Sauli David kü, “Merabü ngelei hashongnyü khih. ngei pinnyü nüng mü shem yemhühen hih; monglongshi mon ngei chongphoei hatü Shembüpalei vehok aokei hokkei” shei e. Mehenangkü Saul büpa nyingi, “Ngei büpa khüei lak nenopih. Philistia ami jüjao nyemjühah!” shei e.

¹⁸ Shejao Davidi Saul kü, “Ongpa mü shaonghinang vaihen mü Israel kü ngei hatü hamei shemongü meheang?” shei e.

¹⁹ Shejao Saulei hashongnyü David kü shuohhen hepak kü Meholath am Adriel küang shem yemei deitük.

²⁰ Shaang Saulei yiükha Mikhali David kü longi lüm, hatü mechem Saul kü hapa jung ejapa, Saul mongmeiyei deih.

²¹ “Ngei pinnyü-ü büpa kü shuohhen, shejüang pinnyü-ü büpalei aethitai vaihen hatü Philistia ami büpa khüei yaongkahen” shei deih. Hanangkü Sauli David kü, “Nüng ngelei shaonghinang vaihen shao-üng nyipabü lashüh nyüpeih” shei e.

²² Hahepak kü Sauli büpalei lakchongbüthü kü nyükei, “David kü monha nyükkei, ‘Veituh, Ongpa hatü büpalei chongphobüthü peüi nüngü ongpalei yiükha yahhenü mongei nyüpeih’ shei eyeishuoh” shei eshuohteke.

²³ Hanangkü jomphongi David kü hapa eshuohshingkü Davidi, “Ongpalei yiükha yah-ei büpa mü shonghinang leihenü shahha douha hih shei deihnyu je? Ngeiyü taopa shennyak hatü mih-i nenyingpü shennyak hih” shei e.

²⁴ Mechem Saulei chongphobüthüi büpa kü Davidi epü jung ejapa,

²⁵ Sauli, “David kü, ‘Ongpai yiükha nangkü Philistia am kü bhüh yemei jomei shuw kho hük yahphahen mü lenei meheyao nena shei deihpü nyuteke.

²⁶ Mechem büpalei chongphobüthüi David kü hapa jung ejapa, Davidi ongpa mü shaong ponghen mongongei deih. Hanangkü itpü hepak mangpeihdai-i,

²⁷ David hatü büpalei shennyakthü daiyei Philistia am kho nyi jü, hatü Davidi hathülei shuw vetei leiyei ongpa mü shaonghinang vaihen kemei shuoh. Sauli büpa mü büpalei yiükha Mikhal shem yemhü.

²⁸ Shejao mechem Sauli Shembüpa David mü nyüke hatü cheha Mikhaliyao David kü bamnyüke shei nyingpa,

²⁹ Sauli nyeinya David kü nyem. Hanangkü hahepak kü pangei Saul Davidei vepa leiteke.”

³⁰ Hapheikü meshükpa Philistia ami hokhen daihenshang hajükpa Saulei lakchongbüthü meyü Davidei shennyakthü nyeinya aokpü dang; hapa keiha Davidü men-e leiteke.