1 SAMUEL 16 - DAÜLANGPÜ LAIHING (BSI)

David Ong Vaihen Jepü

¹ Shembüpai Samuel kü, “Ngei Saul Israel amei ong hean kübü yaktükpheikü nüngi meshük lushi büpa nangkü thepeiyoungei nyuhenang? Nüngi shong kü olive mainga maei shihtuh hatü Bethlehem am Jesse touei ngei nüng shomhen; mehenangkü büpalei hapeüthü khongkü ong vaihen hük ngei jepeih” shei e.

² Samueli, “Ngei mekei etü daiaokhenang? Sauli ha danjema ngei kao jüphahen khih” shei e. Shembüpai, “Nüngi mohoh cheha hük yahtuh hatü ‘Ngei Shembüpa kü moilahen peiküpeih’ shei etuh.

³ Moila shingei Jesse nyüktuh hatü nüngi mehe dükhen ha ngei huphahen, ngei epü shennyak nüngi büpa ong vaihen jetuh” shei e.

⁴ Shembüpai mehe e, ha Samueli dük. Mechem büpa Bethlehemei heih-ei ngoipa, ha ching kübü mübüthü nyemei kheüyaki büpa mü pongteinüng peiyei, “Nüngü chingmeivangmei kü-üng peiküpa yo?” shei phe.

⁵ Samueli “Hih, ngei Shembüpa kü moila shuohhen peiküpeih. Amphong laophü nyingi daüeilangtüktuh hatü ngei mü moila shuohhen peikei” shei e. Hapheikü büpai Jesse hatü hapeüthü daühü hatü jomphong kü moila shuohhen nyük.

⁶ Mechem jomphong ngoijapa, büpai Eliab eeyei, “Hingmei Shembüpai jepeyü shaang Shembüpa touei yaongshi nyupü büpa vaaishang” shei deih.

⁷ Shejao Shembüpai Samuel kü, “Nüngi büpalei dhe nevaijü bümhishao meipü kü tevei; mehenangkü ngei büpa yaktüktih. Shembüpa ngeiyü hangkui veipükei neveinyih. Shennyaki shakdok kü veinyeih, shejao Shembüpa ngeiyü mongdang kü veinyeih shei e.”

⁸ Hapheikü Jesse-i cheha Abinadab müei Samuel touei dei. Shejao Samueli, “Shembüpai büpa nejeang” shei e.

⁹ Hapheikü shao Jesse-i Shammah müei dei. shejao büpai, “Büpayao Shembüpai jepü nevaiang” shei e.

¹⁰ Sheyü Jesse-i büpalei chehathü jom nyetphen Samuel touei müei dei, shejao Samueli büpa kü, “Shembüpai hathü khong kübü hükao nejeang” shei e.

¹¹ Hanangkü büpai Jesse kü, “Nüngei hapeüthü kempü hajük mon je?” shei phe. Jesse-i, “Shao-üng naüshompa hük nyüpeih, shejao büpai mithü kü veinyüpeih” shei e. Samueli, “Büpa kü nyükeishuoh; büpa mangngoikei thahshi ne-uohen” shei e.

¹² Hanangkü büpai nyüknüng deishih-ei büpa nyükei lei. Büpayü nethe meishi, bümhipü meishi hatü mük kü mükthang kohshi shiüteke. Shembüpai büpa kü, “Ngei jepeyü büpa hih, büpa kü maingai phutuh” shei e.

¹³ Hanangkü Samueli mainga shong yah-ei büpalei chejei ami eeshi mainga-i phuteke, hatü ha nyih mü pangei Shembüpalei laangha David kü pei. Hapheikü Samuel Ramahlei leidai.

Davidi Saul Chongphopü

¹⁴ Sheyü Shembüpalei laangha Saul kübü lüdai hatü Shembüpai mang laangha shomei büpa kü shüvei.

¹⁵ Saul mü sheühteipüthüi büpa kü, “Veituh, Kahvangi mang laangha shomei nüng kü shüveihünyu khih.

¹⁶ Shaang jenei shangjingpai büpa chongphobüthü kü harp meishi vüngaokhen shennyak hanei yemhen nyemekei; hatü mechem SHEMBÜPAleipü mang laangha nüng touei peikahenshang, büpai ha vünghen hatü nüng meidaihen” shei e.

¹⁷ Hanangkü Sauli büpalei chongphobüthü kü, “Hapakei meishi vüngaokpü shennyak yemkütuh hatü ngei touei müei deikei” shei e.

¹⁸ Büpalei chongphobüthü khongkü shennyak hüki, “Bethlehem am Jesselei cheha hük ngei eeyei nyüpeih. Büpai kesho meishi harp vüngei loknyeih; büpayü monglongshi, nethe meishi vehokbü meipü, hatü büpai shah vang tetshi eaoknyeih. Shembüpa büpa mü omshi nyüke” shei e.

¹⁹ Hahepak kü Sauli Jesse touei phongmokbüthü shomei, “Mi yomteipü anha David ngei touei shomshih” shei e.

²⁰ Hanangkü Jesse-i büpalei gadu yah-ei ha kü aan hatü yiü-üm maei yiü shih, hatü yum cheha hük omshi temei Saul touei jomphong mü David shomteke.

²¹ Hatü David Saul touei peiyei büpa chongphoei nyu. Sauli büpa kü longi ken, hatü Davidü büpalei lahhilaong kobü lei.

²² Hapheikü Sauli Jesse kü shah shomei, “Davidü ngei mü chongphoei nyemnyu, ngei büpa kü longi monghahnyeih” shei e.

²³ Mechem Saul kü Shembüpai mang laangha shomhenshang Davidi harp yah-ei vünghamteke. Hajü mon Saul kü nyiushemmei peiyei meidai hatü mang laangha lüdai.