1 SAMUEL 15 - DAÜLANGPÜ LAIHING (BSI)

Amalek am mü Hokpü

¹ Samueli Saul kü, “Büpalei Israel nanglakthü shak kü nüng ong vaihühen thiteiphuei jehen Shembüpai ngei shompeih; hanangkü shaang SHEMBÜPAleipü shah bangtuh.

² Jeiyong Shembüpai hapakei enyüke: Ijip kahdok leipü leishingkü chebü chepai Israel am kü mehe dükpa, ha med kü ngei Amalek am hanghihühen.

³ Shaang daituh hatü Amalek am hahtuh, hatü jomi angpü lemphüli chemjalak kü mangtüktuh. Meheyao aoei tetuh; nyüha, baha, hashihnaüha, mohoh, mi, ut hatü gaduthü kemei jütükkemtuh” shei e.

⁴ Hanangkü Sauli nanglakthü nyükei Telaimei thaihütü ieshingkü Israel am veshan 2, 00, 000 nyuteke; Judah phanglom kübü veshan 10, 000 nyu.

⁵ Hapheikü Sauli veshanthü müei Amalek chingthülei daiyei kahjilei tapei nyu.

⁶ Ijip leipü leijashingkü Israel am kü phahji hushuohpü Ken am kü, “Amalek am toueipü amphong layaongei lüdaituh, nedaijema amao jom kei mahhen” shei e. Hanangkü Ken am Amalek am mü nyupü lüdai.

⁷ Hapheikü Sauli Amalek am Havilah kübü Shur thahshi Ijip heongphi kemei neüteke.

⁸ Büpai Amalek am Agag ongpa yemmü yepei lei, shejao büpalei nanglakthü kemei yani mahhütük.

⁹ Shejao Saul hatü veshanthüi Agag ongpa hatü mi, mohoh, mohohbaong hatü mithü meipü meipü kemei, hatü lebü doumeithü kemei yangei tuh. Jomi chemjalak kü payü nemahtük. Jomi yahlak neshiüpü douthü mangtük.

Saul Ong Hean Kübü Yaktükpü

¹⁰ Hahepak kü Shembüpalei shah Samuel touei peiyei,

¹¹ “Saul ong vaihüpü nangkü ngei mong bhagei deihnyüke, mehenangkü büpai ngei epükei nedüki ngei toueipü lepdaiteke” shei e. Samuel longi mongshih, hatü vangnyak büpai Shembüpa kü len.

¹² Nepphei lomi büpai Saul mü pongteihen daishingkü Samuel kü, “Saul-ü Karmelei heihteke. Halei büpai büpalei men kü nebehen yaonglu hük sheiyei nyüpüja, hatü haleipü Gilgalei yiühenja” shei eshuoh.

¹³ Mechem Samuel büpa touei peijapa, Sauli büpa kü, “Shembüpai nüng kü moihimantuh! Shembüpai epü ngei düktepih” shei e.

¹⁴ Shejao Samueli, “Shejema mehekei mohoh hatü mithü vaüpü ngei dannya?” shei phe.

¹⁵ Sauli, “Hathüyü Amalek amei; nanglakthüi mi hatü mohoh meipü den jeyei Shembüpa nüngei Kahvang kü moila shuohhen leiküpü khih; aopü kemei jütüktih” shei e.

¹⁶ Samueli Saul kü, “Nentuh! Shembüpai meya ngei kü mehe epa, ha nüng kü ephüshah” shei e. Büpai, “Eshih” shei e.

¹⁷ Samueli, “Nüngi laophü nyingi dangkao maanpü am shei nyingjao nüng Israel kü shangjing neleihüangpü je? Shembüpai nüng Israel amei ong vaihen jepeih.

¹⁸ Hatü büpai nüng kangpü dousho hük kü, ‘Daituh, hatü Amalek am jütüktuh, jom hep shei mangmahkem thahshi hoktuh’ shei etü shompeih.

¹⁹ Shejema nüngi mehekei Shembüpai epü nebangpa? Mehekei nüngi doumei nangma koei leipa hatü Shembüpa touei mang dükpa?” shei e.

²⁰ Sauli Samuel kü, “Shembüpai epü ngei düktepih, Shembüpai ngei kü kangpü dousho kü ngei daitepih, ngei Amalek am Agag ongpa yemmü leipeih, aopü kemei jütüktih.

²¹ Shejao Gilgalei Shembüpa, nüngei Kahvang kü moilahen shingvaishi nanglakthüi mohoh hatü mi khongkü meipü hatü Kahvang kü moilahen meipüthü koei leipü khih” shei e.

²² Samueli jangei e: “Shembüpalei ven bangpü kü mongongpü keiha Shembüpai jakpü moilathü kü mongongnyu je? Moila shuohpü meyü ven bangpü-üng meipüba, hatü mi cheü leimeyü kenhingpü-üng meipeih.

²³ Venle peyü phongyomthiphepü mang mü maanpü nevai, hatü changmei peyü lajei kü khümpü mang lepeih. Mehenangkü nüngi Shembüpalei shah yaktük, hanangkü büpaiyao nüng ong hean kübü yaktükteke”.

²⁴ Sauli Samuel kü, “Ngei mang thahteke; mehenangkü ngei Shembüpalei shahkung shaiteke hatü nüngei shah nebang; mehenangkü ngei nanglakthü kü nyempai jomei shah bangpeih.

²⁵ Hanangkü shaang ngei phopnyüpeih, ngelei mang tükshih, hatü ngei Shembüpa kü khümhen shangmü ngei mü leishah” shei e.

²⁶ “Ngei nüng mü neleiküpih. Nüngi Shembüpalei shah yaktükpü nangkü SHEMBÜPAiyao nüng Israel amei ong vaihen yaktükteke” shei Samueli e.

²⁷ Samuel leidainüng shei dok lepshingkü Sauli büpalei ashak kü shü hatü ashak shaakdai.

²⁸ Samueli büpa kü, “Shinnyih Shembüpai Israel ongching nüngei lak kübü shaaktükteke, hatü hapa nüngei chingyow hük nüng mü meipüba kü shuohtükteke.

²⁹ Büpa üpa Israel amei Müknyinshekhang, büpai shahshem ne-enyih, nevaijü büpai mong nejeinyih; mehenangkü büpa mong leihen mü büpayü shennyak nevaipih” shei e.

³⁰ Hahepak kü Sauli, “Ngei mang thahteke, shejao Israel am behethü hatü nanglakthü touei ngei kü dhüm huei ngei Shembüpa nüngei Kahvang kü khümhen chemi leishah” shei e.

³¹ Hanangkü Samueli Saul mü nyokei lei, hatü Sauli Shembüpa kü khüm.

³² Hahepak kü Samueli, “Amalek am Agag ongpa hammü ngei touei deikei” shei e, hatü Agag büpa touei kheüyaki, “Hingmei jühen vailangmeyü jütükphei, sheyü meishasha!” shei monglemei heihteke.

³³ Shejao Samueli, “Nüngei yani nyüthü longi hapeü neshiüpükei leitük, hapakei anyüao hapeü neshiüpü keiha nyemnyu” shei etü büpai Gilgal leipü moidü touei Agag khih mü deh-ei jütük.

³⁴ Hapheikü Samuel-ü Ramahlei aongdai, hatü Saul-ü Gibeahlei büpalei shemei aongdai.

³⁵ Samuel mangdi thahshi büpa nangkü mongshangei deihlangmao Samueli Saul mü nepongtei. Saul Israel amei ong vaipü nangkü Shembüpai mongmangei deih.