1 SAMUEL 14 - DAÜLANGPÜ LAIHING (BSI)

Jonathani Philistia am mü Hokpü

¹ Nyih hük Saulei cheha Jonathani büpalei vehok phunglang kopü nethepa kü, “Kei, ji Philistia amei baümtap hükei heihshah” shei e. Shejao büpai chepa kü ha jung ne-eshuoh.

² Saul-ü veshan kho vok hükshing mütü Gibeah yopailei Migronei Pomegranat betjük pü phangei nyu. Büpa mü veshanthü kho vok hükshing nyu.

³ Hathü khongkü ngong-ow owpü Ahijah omshi nyu. Büpayü Shilohlei ngongpa vaipü Elilei cheha Phinehas, Phinehaslei cheha Ahitub, Ahitubei chenaü Ikabodei cheha nyuteke. Jonathan lüdaiteke shei üpaiyao nenying.

⁴ Jonathani Philistia amei baümtapei aongpü lemei yaongvak nyi dangpongei nyu; hükei menü, Bozez hatü hükpalei menü Seneh nyuteke.

⁵ Yaongvak hükü apshaphi Mikhmash lemei meeshi, hatü hükpayü pehephi Geba lemei meeshi shiüteke.

⁶ Jonathani büpalei vehok phunglang kopü nethepa kü, “Kei, ji-i hapa nejaptükpüthülei baümtapei shüshah; Shembüpai ji kü sheühphahen aokpeih; büpai sheühjema meshük shangkü khongha vaijao jeni aokpü danghen meheyao wongshi nechongküpih” shei e.

⁷ Büpalei vehok phunglang kobüi büpa kü, “Nüngi mehe dükhüei deihnya, ha düktuh. Daishah, ngelei mongdang laangha kemei nüng mü nyüpeih” shei e.

⁸ Hahepak kü Jonathani, “Kei, ji-i hathü philei peih-ei daijü ji nyem-eehah.

⁹ Jomi ji kü, ‘Ham anji touei mangheihkei thahshi danei chongkei’ shei ephüjema ji yaongpü touei danei nyuhen, hatü jom touei ne-aonghen.

¹⁰ Shejao jomi, ‘Ham touei aongkei’ shei ephüjema, ji aongjahen hatü hapayü Shembüpai jiei lak kü jom shuohpü nyangeihepü hük vaikahen” shei e.

¹¹ Hanangkü jijipheni Philistia amei baümtapei nyupüthü kü hushuohteke, hatü Philistia ami, “Veihümao, Hebrew am jom joshi nyupü kahsha leipü laokünyüke” shei etei.

¹² Hahepak kü baümtapei nyupüthüi Jonathan hatü vehok phunglang kobü nyi kü lenei, “Ham touei aongkei, hatü hami anji kü lemhük ephanüng” shei e. Jonathani büpalei vehok phunglang kobü kü, “Ngei pheilei mükei; mehenangkü Shembüpai hathü Israel amei lak kü shuoh-ei nyüke” shei e.

¹³ Hahepak kü Jonathani büpalei vehok phunglang kobü pheilei mütü lakhila-i shomei aong. Jonathanei lak kü Philistia am doteke, hatü büpa pheikü müpü vehok phunglang kobüi jom jüteke.

¹⁴ Shongpü vehok kü Jonathan hatü büpalei vehok phunglang kobü nyi-i kahdok hecter pua hük mongkü shennyak kukha hükshing jü.

¹⁵ Hahepak kü veshanthü kemei baümtapei, kahlei, veyomdülei hatü thepju kü yaongpüthü kemei nyemdai; kahdok jenteke hatü nyempüvüngpü longi nyuteke.

Philistia am Neütükpü

¹⁶ Benjamin amei kahdok Gibeathlei Saulei veyombüthüi Philistia am nyemei aphipe kü nyaiteipü ee.

¹⁷ Hahepak kü Sauli büpa mü nyupüthü kü, “Jen khong kübü üpa lüdaipüshang hengei veihü” shei e. Mechem jomi hengei veipa, Jonathan hatü büpalei vehok phunglang kobü nyi neshiüi chongjateke.

¹⁸ Sauli Ahijah kü, “Kahvangei Vangpüshuwpü Pela halei deikei” shei e. Hahepak kü hapayü Israel am mü shiüteke.

¹⁹ Mechem Sauli ngongpa mü shah eteipa, Philistia amei baümtap mongei nyeinya nyeinya bukpüshaanpü vam, hatü Sauli ngongpa kü, “Nüngei lak leilangtuh” shei e.

²⁰ Hahepak kü Saul hatü büpa mü nyupü nanglakthü kemei thaitü vehokei dai. Philistia ami jom nyingnying nepongpaüi jüteiyei eeteke.

²¹ Hebrew am üam shelei Philistia am mü nyu, hatü jom mü baümtapei aong, hathü Saul hatü Jonathan nyi mü nyupü Israel am mü dhaoteke.

²² Hapa keiha mechem phaüshang kahmük Ephraimei joshi nyupü Israel ami Philistia am nyemei nyaiteinyükeja shei danpa, jomao vehok kü dai.

²³ Hanangkü Shembüpai ha nyih Israel am kü aokpü danghü, hatü Beth-Aven peihshi hokei heih, hatü Saul mü nyupü veshanthü peüshep 10, 000 hükshing nyuteke. Hapa vehok phaüshang kahmük Ephraim kemeilei yaüei dai.

Vehok Pheikü Vampü

²⁴ Ha nyih Israel am aeipai longi yüh-eiyangei nyu; mehenangkü Sauli, “Om mangdhü thahshi hatü ngei ngelei vepathü kü bhüh mangyem thahshi üpai hahying hahhenshang büpa kü thaüvaü hettuh” shei vangteke. Hanangkü veshanthü üpaiyao meheyao nehah.

²⁵ Veshanthü kemei yingnyülei shüshingkü nyahjiü longi dang.

²⁶ Mechem jom yingnyülei shüpa, nyahjiü longi yenei shühpü ee, shejao üpaiyao hapa nehah; mehenangkü jom peüi Sauli vangpü kü nyemdai.

²⁷ Shejao Jonathani chepai hapakei vangpü nangkü veshanthü nyempü nenyingi nyu; hanangkü büpai lakei noshi nyupü lenshuoh-i nyahdük kü hümtü büpai ha hah, hatü büpalei mük thaei lei.

²⁸ Hahepak kü veshanthü khongkü hüki, “Shinnyih üpai hahying hahhenshang büpa kü thaüvaü hettuh shei ampai veshanthü kü etükpü nangkü hathüyü yüh-eiyangnyu khihma” shei e.

²⁹ Hahepak kü Jonathani, “Opai kahmük kü shanghah vamhüteke; ngei nyahjiü maani hahpü nangkü mekei ngelei mük thaapa veihümao.

³⁰ Shinnyih veshanthüi vepa leipü yahpü hahying changshi hahlangmeyü shao-üng meshük nyeinya Philistia am jühen vaipa!” shei e.

³¹ Ha nyih Israel ami Philistia am Mikhmash kübü Aijalon thahshi jüpheikü veshanthü aeipai shomeiyingei nyu.

³² Hanangkü veshanthüi vepathü leipü yah-ei leipü mi, mohoh hatü mohoh chehathü hapa shingei jütü iyao omshi hah.

³³ Hahepak kü hanei ami Saul kü, “Veituh, veshanthüiyao omshi phai hahpai Shembüpa khüei mang thahnyüke” shei eteke hatü Sauli, “Ammi pungei dükteke, hamü ngei touei yaong longpü hük ngowshih” shei e.

³⁴ Sauli hapheikü ngeükhüam hük shuoh-ei, “Am yanei daiyei veshanthü kü peüi laophü laophülei mohoh, hatü mithü müei peiyei hatouei jütü hahtuh; shejao iy omshi hahpai ammi Shembüpa touei mang tethah” shei e. Hanangkü ha ya peüi laophülei mohoh müei peiyei halei jüteke.

³⁵ Hapheikü Sauli Shembüpa kü moidü hük ling, hatü hapayü büpai Shembüpa kü lingpü shongpü moidü nyuteke.

³⁶ Hapheikü Sauli, “Jeni Philistia am touei nyak kü yiüshah, hatü jomei mophimo kemei yahshah, hatü hükao yemmü netuh-i ngenep dhom thahshi jüshah” shei e. Jomi, “Nüng kü meipükei dükshah” shei e. Shejao ngongpai, “Jeni shongei Kahvang kü pheshah” shei e.

³⁷ Hanangkü Sauli Kahvang kü, “Ngei Philistia am hahnüng yiü-üla? Nüngi ngei kü aokpü danghü-üla?” shei phe. Shejao ha nyih Kahvangi büpa kü nejangshuoh.

³⁸ Hanangkü Sauli mübüthü peü kü, “Hatouei thaikei, hatü shinnyih mehe mang thahpüshang yemshah” shei e.

³⁹ “Israel am kü aokpü danghüpü Shembüpalei men kü vangei enyeih, üpai pungpüshang jühen; ngelei ha Jonathan vaijao jühen” shei e. Shejao üpaiyao shah phahükao ne-e.

⁴⁰ Hahepak kü Sauli Israel am peü kü, “Am antolei yaongshi chongkei, hatü Jonathan henji hamü yaonghen hih” shei e. Jomi, “Nüng kü meipükei düktuh” shei e.

⁴¹ Hapheikü Sauli Shembüpa, Israel Kahvang kü, “Shembüpa, shinnyih mehekei nüngi ngei phoppü kü nejangpa?” shei phop. “Hapa pungpeyü ngei nevaijü ngelei ha Jonathan homei vaijema Urim yaong homei jangshih, shejao hapa pungpeyü Israel nanglakthü homei vaijema Thummim yaong homei jangshih” shei e. Shejao hapa pungpeyü Saul hatü Jonathan nyi kü hetteke; nanglakthüi pungpü neshiüang.

⁴² Sauli, “Jonathan henji aa kao üpai pungpüshang phongyomshih” shei e, hatü hapa Jonathan kü hetteke.

⁴³ Hahepak kü Sauli Jonathan kü, “Nüngi mehe dükpa ngei kü eshih” shei phe. Jonathani büpa kü, “Ngei ngelei lenshuoh-i lungei nyahjiü ajüki hah-ei veipeih, ha med kü dihen ngei temei nyüpeih” shei e.

⁴⁴ Sauli Jonathan kü, “Nüng nejütükjema Kahvangi ngei nyemjütük” shei e.

⁴⁵ Shejao nanglakthüi Saul kü, “Israel kü aokpü longpü danghüpü Jonathan jütükhen je? Hapakei nevai! Vanyangyem Shembüpalei men kü vangei enyeih, büpalei shangjing kübü sholah hükao nevüshihpih; mehenangkü Kahvangi sheühpü homei büpai ha dükpeih” shei e. Hanangkü nanglakthüi Jonathan nejütüki yangei tuh.

⁴⁶ Hapheikü Sauli Philistia am changei neyiüi doh, hatü jom laophülei kahmük yemei leidaikem.

Sauli Vanglem lempü

⁴⁷ Sauli Israel kü ong vaipheikü büpai peü philemei vepathü mü hok: Moab, Ammon, Edom, Zobah ongpathü hatü Philistia am mü hok. Melemei büpa hokhen, büpai aokpü dang.

⁴⁸ Büpai longi mangshi hok, hatü Amalek am neütük, hatü Israel am kü nemeipüthü peü kübü yangei tuh.

⁴⁹ Saulei yeshangthüyü Jonathan, Ishvi hatü Malkishua nyu, hatü büpalei yiükha nyiyü hashongnyü Merab hatü chenaü-ü Mikhal nyuteke.

⁵⁰ Saulei chenyühayü Ahimaazlei yiükha Ahinoam nyu, hatü Saulei veshan mübü-ü chepa naü-eepa Nerlei cheha Abner nyu.

⁵¹ Saulei chepayü Kish, hatü Abnerlei chepa Ner nyilei chepayü Abiel nyuteke.

⁵² Saulei den kemei Philistia am mü shahyaki hok, hatü mechem Sauli wongkoh monglongpü shennyak eehenshang büpai veshan vaihen jehamteke.