1 SAMUEL 13 - DAÜLANGPÜ LAIHING (BSI)

Samueli Saul kü Lohpü

¹ Mechem Saul ong vaipa, hahepak kü büpayü vangbong hapüan behe nyu, hatü Israel kü büpai vangbong pinyipünyi vanglem lemteke.

² Sauli Israel am khong kübü shennyak haja jem mon je; haja nyiyü Saul mü phaüshang kahmük Bethel kü Mikhmashlei, hatü haja hükü Benjamin jat amei kahdok Gibeahlei Jonathan mü tuh; aopüthü kemei büpai shemei leitükkem.

³ Jonathani Philistia kahdok Geba leipü jila hah, hatü Philistia am peüi ha jung dan. Hahepak kü Sauli kahdok peü kü amit vüngei, “Hebrew am peüi bangtuh!” shei e.

⁴ Mechem Israel am peüi Sauli Philistia amei jila hahteke shei danpa, hatü Philistia ami jom kü jiühitnyüke shei danpa, nanglakthüi Saul mü Gilgalei daiyei omhen nyük.

⁵ Philistia ami Israel am mü hokhen shingvaishi koyei khari haja hapüan, koyei kü uotü hokhen shennyak haja vok, hatü veshanthü yungching bhihhiphang kei thaitü aongei Beth-Aven heongphi Mikhmashlei baümtap veteke.

⁶ Mechem Israel ami jomei laphenü wongteke shei veiaokpa, nanglakthü jom nyingi yaongdung, yaongsha, kahsha, shüying hatü damsha mongei shüei joteke.

⁷ Hebrew am haneiyü Jordan yungdang homei Gad hatü Gilead amei kahdokei nyaidai. Saul payü Gilgal lei-üng nyu, hatü büpa mü nyupü veshanthü peü nyempai kheüteke.

⁸ Samueli tetpü keiha büpai nyih nyet danei nyu, shejao Samueli Gilgalei ne-aongja, hatü Saulei shennyakthü nyaidaihen pangteke.

⁹ Hanangkü büpai, “Ngei touei jakpü moila hatü mongjempü moila deikei” shei e, hatü Sauli jakpü moila shuoh.

¹⁰ Büpai moila shuoh-ei temhinüng Samuel ngoi, hatü Sauli büpa mü pongteihen heih.

¹¹ Samueli jangei, “Nüngi mehe dükpa?” shei phe. Sauli, “Nanglakthü yandaipü eeyei hatü nüngao tetpü hepak kü jiüshi nepei, Philistia am Mikhmashlei thaipü eeyei,

¹² shaang-üng Gilgalei Philistia am hoknüng yiüküjü ngeiyü SHEMBÜPAleipü phahji meheyao neyemi nyuhen khih shei deihpü nangkü ngei jakpü moila shuohhen mü vampeih” shei e.

¹³ Samueli büpa kü, “Nüngü ngadou dükteke. Nüngi Shembüpa, nüngei Kahvangi nüng kü shuohpü shahkung jiüshi nedükang; nüngi hapakei düklangmeyü Shembüpai Israel kü nüngei ongching den kü chongkhenei lingei tuhhen,

¹⁴ shejao shaang nüngei ongching shenei nenyuhen; Shembüpai laophüi monghahpü shennyak hük yemteke, hatü Shembüpai laophülei nanglak shak kü vanglem lemhen büpa je; mehenangkü Shembüpai nüng kü epü shahkung nedükang” shei e.

¹⁵ Samuel Gilgal leipü layaongei leidai. Aopü nanglakthü kemei veshanthü mü omhen Saul phei mü, hatü jom Gilgal leipü Benjamin kahdok Gibeah lemei aong. Sauli büpa mü nyupü shennyakthü ieshingkü kho vok hükshing mon nyu.

Hokhen Tempülempü

¹⁶ Philistia am Mikhmashlei baümtap vetü nyushingkü Saul, cheha Jonathan hatü jiji mü nyupü shennyakthü kemei Benjamin amei kahdok Gebalei nyu.

¹⁷ Philistia am veshanthü jomei baümtap leipü hokhen shingvaishi khong jem vaishi hantü dai. Khong hükü Shual kahdok Ophrah lemei,

¹⁸ hatü khong hükü Beth-Horon lemei, hatü khong hükü Zeboiim kahji hatü jahpandok kü shüngshi veipü kahshang lemei heih.

¹⁹ Israel kahdok kempülei koma nenyuham; mehenangkü Philistia ami, “Hapakei koma tuhjema, Hebrew ami jom shing yan hatü phung shükkahen” shei eteiteke.

²⁰ Hanangkü Israel am kemei jomei hanshong nyiam, kaiti, ay, hatü hatvetlongkhoih yühen shingvaishi Philistialei mon shahamteke.

²¹ Hanshong nyiam hatü nyahvang yüpü kü lat lop nyi, yüei bha bappü kü lop hük shuohhamteke.

²² Hanangkü vehok hepak kü Saul hatü cheha Jonathan nyilei nyupü mü lenei veshanthü üpa leiyao yan hatü phung nenyuham.

²³ Shaang Philistia am veshan khong hükü Mikhmash beilem kü yomhen shom.