1 SAMUEL 1 - DAÜLANGPÜ LAIHING (BSI)

Samuel Bühpü

¹ Shaang phaüshang kahmük Ephraim leipü Ramathaim-zuphim am shennyak hükei meni Elkanah shei nyu. Büpayü Ephraim am Zuph-ei cheha Tohu, Tohulei cheha Elihu, Elihulei cheha, Jehoramei cheha nyuteke.

² Büpai nyüha nyi yah; hükei menü Hannah hatü hükpalei menü Peninnah nyuteke. Peninnah leiyü hapeüthü nyu shejao Hannahlei hapeü nenyu.

³ Bong ieyei hapa shennyaki büpalei jila leipü Shilohlei Jeiyong Shembüpa kü moila shuohhen aonghamteke, hatü Eli ngongpalei cheha Hophni hatü Phinehas nyi halei Shembüpalei ngongpa vaiteke.

⁴ Mechem Elkanah-i moila shuohhenshang büpai chenyüha Peninnah hatü hapeüthü peü kü phaihan shuohhamteke.

⁵ Shejao büpai Hannah kü phaihan shing nyi shuohhamteke; mehenangkü büpai pinnyü kü longi bam, shejao Shembüpai pinnyü-ü nyülan leitük.

⁶ Mehenangkü Shembüpai pinnyü nyülan leitükpü nangkü pinnyü mü chemi nyupü nyüha-i pinnyü kü longi ne-ienelemi shüvei.

⁷ Hapa keiha vangbong dok kü vangbong dai, hatü Shembüpalei shemei aongshan ieyei pinnyüi Hannah kü ne-ienelemi notei. Hanangkü Hannah-i nükao nehah-i thepei nyuhamteke.

⁸ Elkanah-i pinnyü kü, “Hannah, nüng mehekei thepnya? Nüng mehekei nük nehahnya? Mehekei mongmangei mon nyunya? Hapeüthü nethe an mao ngei nyeipü nevaipü je?” shei e.

⁹ Nyih hük jomphong Shilohlei hahyingei tempheikü Hannah yaongteke. Hahepak kü Eli ngongpayü phopshem shaden toueipü uoshing kü uoshi nyu.

¹⁰ Pinnyü longi mongshangei Shembüpa kü shahyaki thepei phop.

¹¹ Pinnyüi, “Oh Jeiyong Shembüpa, nüngi nüngei chongphobü mongshang kü mon-üng veiphülangmeyü hatü nüng chongphobü nebetüki deih-ei dangtü bahanaü hük dangkao yahphülangmeyü ngei büpalei yangnyu den kemei Shembüpa chongphohen lanei shuohhen, hatü büpalei shangjing kü meet-i chemao neshemhen” shei hapakei lah-ei eteke.

¹² Pinnyü hapakei nedoh-i phopei nyushingkü Eli-i pinnyülei ju nyülüppü kü veishi nyu.

¹³ Hannah-ü ngeü nevami ju nyülüpei phopei nyu, hanangkü Eli-i pinnyü-ü yiüi chokpü vaaishang shei deih.

¹⁴ Hanangkü Eli-i pinnyü kü, “Nüng hapakei yiüi chokei meshükpa nyuhen? Yiü yaktüktuh” shei e.

¹⁵ Shejao Hannah-i jangei, “Hapakei nevai, ngelei shembü, ngeiyü longi mongshang kü nyupü nyüha hih, ngei yiü neyingangpih. Shembüpa kü ngelei mongshang eshouhnyeih.

¹⁶ Nüngi ngei keyü yahlak neshiüpü nyüha ten kei tedeih; mehenangkü ngei longi mongshangpü nangkü ngei hatouei phopei nyunyeih” shei e.

¹⁷ Hahepak kü Eli-i, “Nyiushemmei kü shemei leituh, hatü Israel Kahvangi mehe shingvaishi nüngi büpa kü phe, ha nüng kü yahphahen” shei e.

¹⁸ Pinnyüi, “Nüng chongphobüi nüng touei phahji nyemdangma” shei e. Hapheikü pinnyü shemei leiyei hahying, hatü hajük kü pinnyü mongshang dhe nekoh-i nyu.

¹⁹ Nepphei dhom mü lomi jijinyi paoei Shembüpa kü khüm, hatü hapheikü Ramahlei jomei shem yemei lei. Elkanah-i chenyüha Hannah mü shi, hatü Shembüpai pinnyü deih-ei dangteke.

Hannah-i Samuel Daühünyüke

²⁰ Hahepak kü Hannah büm nekongi lei, hatü yeshang hük büh. Pinnyüi naü kü, Samuel, lappai, “Ngei büpayü SHEMBÜPAleipü yühahpeih” shei men.

²¹ Mechem Elkanah hatü büpalei shem am kemei Shembüpa kü vangbong dohpü moila shuohhen hatü büpai lahpü dükhen aongpa,

²² Hannah jomphong mü ne-aong. Pinnyüi chepaha kü, “Naü dhong lipheikü mon ngei büpa müei aongei Shembüpa kü lanei shuohhen, hatü büpalei yangnyu den kemei halei nyuhen” shei eteke.

²³ Elkanah-i chenyüha kü, “Nüng kü meipükei düktuh. Naü dhong mangli thahshi shemei nyutuh; Shembüpai nüngi lahpü nyemjiühüma” shei e. Hanangkü Hannah shemei nyu, hatü naü manglong thahshi jungteke.

²⁴ Pinnyüi naü jungei longpheikü naü yah-ei bong jem lompü mohoh chebaong hük, atta dok an, hatü yiü aüm hük yah-ei Shilohlei Shembüpalei shemei aong, hatü naü-ü longi hashih mü nyuteke.

²⁵ Jomphongi mohoh jüpheikü Eli touei naü müei dei.

²⁶ Pinnyüi büpa kü, “Oh ngelei shembü, nüng touei yaongtü phopei nyupü nyühayü ngei hih, nüngi deihnyüla? shei phe.

²⁷ Hapa naü nyemyahpha shei ngei phoppeih, hatü ngei Shembüpa kü yüpü kü jangei yahphüteke.

²⁸ Hanangkü ngei büpayü Shembüpa kü shuohnyeih. Büpalei yangnyu den kemei Shembüpa kü shuohnyeih” shei e. Büpa halei Shembüpa chongphoei nyu.