1 PETER 5 - DAÜLANGPÜ LAIHING (BSI)

Kahvangei Mithü Haümpü

¹ Shaang ngei behe hük hatü Khrista shangpongpü kü denbü hük keiha hatü shakei vamkahen müknyinshekhang kü hean yahbü hük keiha, ngei am khong kübü behethü kü mongnang thongnyeih.

² Am kü yomhen tuhpü Kahvangei mikhong kü veiyei haümtuh; hapayü kangeishungei nevai, shejao Kahvangi dükhahhüpükei monghumpai düktuh; lop kü kenei nevai, shejao chongphohüei chongphotuh.

³ Am phangkü nyupüthü shak kü am shembü telei, shejao mithü touei lappü meipü leituh.

⁴ Mechem Mi yombü Longpü peihen, mechemao chang neleihen müknyinshekhang athen danghen.

⁵ Ha aihük mü am nethethüi behethü phangkü nyutuh. Am peüi hüki hük touei maanpü leipü ow owtuh; mehenangkü “Kahvangi changmeipüthü khünyeih, shejao maanpü leipüthü kü phahji shuohnyeih.”

⁶ Hanangkü Kahvangei laklu wong longpü phangkü am maanpü leituh; shejüang hepak jiüpü kü büpai am longei anshihhen.

⁷ Ammei mongshang peü büpa touei tuhphongtuh; mehenangkü büpai am kü jungnyeih.

⁸ Am nyingi ungei-aeituh, thaeimaei nyutuh. Ngüngei nyupü mailang keiha ammei vepa Kahshih am shonei hanei am lühnüng longteinyüke.

⁹ Büpa khüei yaongtuh, hinglempü kü wongshongi yaongtuh; mehenangkü kahdoknyü kemeilei ammei jeihinaüthü peü aihük shangpong pongnyüke,

¹⁰ hatü phahji peüei Kahvang, üpai Khrista kü nedohnetenpü müknyinshekhang touei am nyükpa, am kansho hük shangpong pheikü büpai am changhüshahühen, am wong kohhühen, sheühphahen hatü chonglinghühen.

¹¹ Den den kü ngan kemei büpa lompü vaihütuh. Amen.

Dohpü Selam Shah

¹² Hingshangpü jeihinaü shei ngei ieyeilempü Silvanus homei am kü nangthonghen, hatü hapayü hingshangpü Kahvang phahji shei denpü shuoh-ei ngei am kü ha lai shohlohpai nyangnyeih. Hapa kü wong kohshi yaongtuh.

¹³ Am mü chemi jelangpü Babylonei nyupü ammei jeihinaü attoi ami am kü selamja, hatü ngelei hapeü Markiyao selamja.

¹⁴ Bampü om kü jüpteipai hüki hük mü selam shihteituh. Khrista kü nyupü am peü touei chingmei nyute.