1 PETER 4 - DAÜLANGPÜ LAIHING (BSI)

Kahvangei Phahji kü Khei Vaipü

¹ Hanangkü Khristai büpalei büm kü shangpongpü nangkü amphongao aihük chudeih nyutuh; mehenangkü üpai laophülei büm kü shangpong, hajük kü mang mü vukei neshiü.

² Shaang mü leitü ammei aopü kahdoknyü yangnyu-ü hangkui lümpü kü nevai, shejao Kahvangi mongpü kü nyutuh.

³ Mehenangkü peihdaipü hepak kü amphongi Kung ami dükbenüng dükei, nedaünelangpü ten, iyjeiphaileipü, chokpümokpü, hahngayungpe, yiü yingpü khong kü omei lajeithü kü khümei nyuhampeih.

⁴ Jom mü hükkei beiyei nyeiyei nyupü yangnyu kü am ne-omjapü nangkü jom thamanyüke; hanangkü jomi am kü thaüvaünyüke.

⁵ Shejao yemmü nyupü hatü didaipüthü kü shahphenhen temtüktü yaongshi nyupüba touei jomi dükpü dou jung shah-om shuohhen.

⁶ Ha tata kü didaipüthü kü dangkao shahjangmei baongpeih; shejüang jomphong kü phai kü shahphentükjao Kahvang yemmü nyupükei jomphongao laangha kü yemmü nyuhen.

⁷ Dou peü dohhen yopailei nyüke; hanangkü ammi phoppü men kü am nyingi kenhingei ungei-aeiyei nyutuh.

⁸ Peü shak kü hüki hük mü bamteishi nyutuh; mehenangkü bampai mang longi küptüknyeih.

⁹ Ne-eela-i hüki hük kü sheühteituh.

¹⁰ Kahvangei phahji longpü kü khei vaibü meipü hük keiha ammi mehe mehe thintho dangtepa, hapai hüki hük chongphoteituh.

¹¹ Üpai chongvennya, Kahvang shah kü epükei chongventuh. Üpai chongphonya, Kahvangi shuohpü wongi chongphotuh; shejüang doulem peü kü Jisu Khrista homei Kahvang müknyinshekhanghen. Büpa kü müknyinshekhang hatü ngan den den kü lompü vaihütuh. Amen.

Khristan Hük Keiha Shangpongpü

¹² Bampü küphüthü, am kü shaang ngangahük kü lemhük vamnyukei am kü dokpü homei ponghahpü kü thamaei tedeih.

¹³ Shejao Khrista shangpongpü kü hean yahnyeih shei deihpai mongmeituh; shejüang büpalei müknyinshekhang shakei vamshingkü am mongmeihen hatü mongongpai lenhen.

¹⁴ Khristalei men kü am kü yaüphüjema, am moihimanpü; mehenangkü müknyinshekhangpü Laangha, Kahvang Laangha am kü nyuishi nyüke.

¹⁵ Shejao am üpaiyao shennyak jüpü, gühpü, ten dükpü nevaijü mih-ei shahhidou kü shihlangei yaongpü am kei teponghah.

¹⁶ Shejao Khristan hük keiha am shangpongjema, hapayü veüpong kei tedeih, shejao ammi hapa men kopü nangkü Kahvang men vihtuh.

¹⁷ Mehenangkü Kahvangei shem am kü shahphenpü chongpanghen hepak ngoiteke; hapayü jen mü pangjema, Kahvangei shahjangmei nebangpüthü dohpü mekei nyuhen?

¹⁸ Laihingi ha enyüke: “Daülangpüthü dangkao yanghen wongjema, Kahvang nenyingpü mangthü mehe leihen?”

¹⁹ Hanangkü üami Kahvangi mongpükei shangpongnya, hingshangpü jom Lingbü kü lanei shuohhen hatü nedoh-i mei dükhen.