1 PETER 3 - DAÜLANGPÜ LAIHING (BSI)

Nyüha hatü Bahathü

¹ Nyühathü, ha aihük mü amphongi laophülei baha phangkü nyutuh; shejüang jom hanei Kahvangei shah kü hingnelemjao, shah ne-e-i ammei dükhiling meipü homei jom mong lepei leiaokhen;

² mehenangkü jomi ammei yangnyu homei am daüpülangpü hatü dhüm kohpü eehen.

³ Ammei dhemeilaümayü shakdok meipü lappai, sho nyiükei hiutükpü hatü honyük yükpü hatü owmei owpü kübü vampü nevaihen vongbong.

⁴ Haleimeyü, ammei owhiaiyü mongpa leipü vampü inyainyempü hatü nenaokpü laangha den kü nyuhen dhemeilaüma, mepa Kahvang touei douvang nyüpa, ha nyuhütuh.

⁵ Ha aihük mü aivang den kü Kahvang kü monglempü daülangpü nyühathüi laophülei baha phangkü nyupü homei dhemeilaüma ow owpeih.

⁶ Hapa keiha Sarah-i Abrahamei ven bang, hatü büpa kü shembüpa shei nyük. Amphongao jiüpü dükpü thahshi hatü am kü nyempü neshiüpü thahshi ammü pinnyülei yiükhathü leinyüke.

⁷ Bahathü, hapa aihük mü ammi laophülei nyüha mü nyushingkü bamshi angtuh, hatü wong nekohpü yangnyu shei dhüm shuoh-ei, hatü yangnyu kü phahji thintho kü jomao am mü chemi mükjüp yahpü am shei ieyeilemei noteituh; shejüang ammi phoppü kü meheyao bangpü nechongkahen.

Jiüpü Dükei Shangpongpü

⁸ Dohpülei, am peü kü, laangha kü mongjempü, shinshangteipü, hüki hük mü bamteipü, bampü mongdang jükpü, hatü nenteiaokpü chudeih nyutuh.

⁹ Ammi ten kü ten, thaüvaü kü thaüvaü tekhangtei, shejao ha nang jeiyei moihimaneishuoh. Moihiman mükjüp danghen tata kü amphong nyükpeih.

¹⁰ Laihingi ha enyüke: “Üami yangnyu nanya, hatü nyihmei eehen lümnya, jomi laophülei yei ten epü kübü, hatü ühing itpü ju yepei tuhtuh;

¹¹ hatü jom ten kübü nyokei leiyei mei düktuh; jomi chingmei yemei ha kü changei daihütuh.

¹² Mehenangkü Shembüpalei mük daülangpüthü kü chishi nyüke, hatü jomi phoppü kü büpalei dhaong shangshi nyüke; Shejao Shembüpalei dhe ten dükpüthü khüei nyüke.”

¹³ Shaang ammi mei dükhüdaipheikü üpai am kü nemei-i dükphahen?

¹⁴ Shejao ammi jiüpü dükpü kü shangpongjema, am moihimanpü. Jomi mehe kü nyem, ha kü ammi tenyem, nevaijü tehan,

¹⁵ shejao ammei mongei Khristayü Shembüpa shei deihtuh. Nüng kü nyupü monglem nangkü hanei ami nüng kü nih-ei ehen phephüjema, düngei shahnyok shuohhen temtüktü nyutuh.

¹⁶ Shejao hapayü inyainyempai dhüm kohshi etuh. Am kü yaüpüthüi ammi Khrista kü doumei dükpü eeyei thaüvaüpüthü veühühen shingvaishi ammei chudeih mongdeih daülangi tuhtuh.

¹⁷ Shangponghenü Kahvangi mongpü vaijema ten dükei shangpongpü meyü mei dükei shangpongpü meipeih.

¹⁸ Mehenangkü Khristayao mang nangkü den shing chem mon shangpong; am Kahvang touei müei leihen nangkü daülangpü hük nedaünelangpüthü shingvaishi diteke. Büpa phai kü dihü, shejao laangha kü yem leihü,

¹⁹ hatü büpa daiyei khoklatei küppü laanghathü kü chongven.

²⁰ Hathüyü Noah-i jahas lingpü nyihthü kü Kahvangi nenteiaokei danpü hepak kü ven nedanpüthülei laanghathü nyüke; hapa kü maani mon– shennyak shet mon yung kübü yangteke.

²¹ Hapa yungü shaang am yangpü baptükpü lajei nyüke– hapayü büm kübü mag daüpü nevai, shejao Kahvang touei chudeih mongdeih meipai Jisu Khrista yangei leipü homei vangteipü hük nyüke.

²² Büpa vangsholei aongei Kahvangei lakdah philei vangsho phongshanthü, wongthü mü uo, hatü nganthü peü büpa phangkü tuh.