1 ONGPATHÜ 8 - DAÜLANGPÜ LAIHING (BSI)

Phopshemei Vangpüshuwpü Pela Leipü

¹ Hapheikü Solomoni Israel am behethü, jat peü kübü shangjingthü hatü shemdep peü kübü mübüthü peü David Chingnyü Zion leipü Phopshemei Shembüpalei Vangpüshuwpü Pela yah-ei Phopshemei anhen shingvaish Jerusalemei nyükei thai.

² Israel am nanglakthü kemei Solomon ongpa touei lenyang nyetpabü Ethanim len kü mo hepak kü thai.

³ Mechem Israel am behethü thaipa, ngongpathüi Vangpüshuwpü Pela koteke.

⁴ Hanangkü jomphongi Shembüpalei Vangpüshuwpü Pela, ashakshem hatü haleipü daülangpü yungshongthü peü ngongpathü hatü Levi ami koteke.

⁵ Solomon ongpa hatü büpa mü büpa touei thaipü Israel am kemei Vangpüshuwpü Pela touei yaongtü ieyei neaoki mi hatü mohohthü jüei moila shuoh.

⁶ Hapheikü ngongpathüi Vangpüshuwpü Pela kotü peiyei Phopshemei Longi Daülangpü Shingei cherubimei yang phangkü tuh.

⁷ Cherubimei yang paanei heihpai Vangpüshuwpü Pela haüshing, Vangpüshuwpü Pela hatü hapa paipü kenh kao omei bhiüteke.

⁸ Hathü kenh ahshi lupü nangkü hapa jung dohpeyü Longi Daülangpü Shing shephilei veijü mon ee, shejao hao leipü veijü ne-ee; shinnyih thahshi hathüyü nyüke.

⁹ Hapa Vangpüshuwpü Pela mongeiyü Israel am Ijip leipü vamei daishingkü Shembüpai jom mü vangpüshuwpü lingpü shahkung yaongshung nyi Mosai Sinai Kahshangei tuhpü ha shihpü mü lenei meheyao neshiü.

¹⁰ Mechem ngongpathüi Daülangpü Shing leipü vamdaipa, phumi Shembüpalei Phopshem mateke,

¹¹ hatü phum thihdaipü nangkü ngongpathüi meheyao chongphopü dou nedükaok; mehenangkü Shembüpalei müknyinshekhangi Phopshem madaiteke.

¹² Hahepak kü Solomoni, “Shembüpai büpayü phumnyak kü nyuhen hih shei epeih.

¹³ Ngei nüng shing müknyinshekhangpü shem hük, nüng düngei nyuhen shing shem hük vetepih” shei e.

Solomoni Nanglakthü kü Epü

¹⁴ Mechem Israel am khong kemei yaongshi nyupa, ongpai jomphong philei meetü jom kü moihimanshuoh.

¹⁵ Büpai, “Shembüpa, Israel Kahvangei men longtuh; mehenangkü mehe büpalei jui opa David kü lahpa, ha büpalei laki dükei jiühüteke.

¹⁶ Ngei ngelei Israel nanglakthü Ijip kahdok leipü müei leipü nyih kübü shinnyih thahshi ngei kü khümhen shingvaishi ngelei men kü Israel kahdok kü chingnyü hükao Phopshem vehen nejeangpih shejao nanglak shak kü ong vaihen ngei David jepeih” shei e.

¹⁷ Israel Kahvang, Shembüpalei men kü shem hük vehen shei opai deihshi nyuhampeih.

¹⁸ Shejao Shembüpai opa David kü, “Nüngi ngelei men kü Phopshem vehen shei deihpeyü meiangke.

¹⁹ Shejoongpa nüngi hapa Phopshem nevehen; shejao nüngei iy hatü phai kübü hapeü hüki ngelei men kü Phopshem vehen shei epeih.

²⁰ Shembüpai mehe lah, ha jiüshi dükteke. Shembüpai lahpükei, ngei opa jeiyei Israel kü ong vainyüke, hatü Shembüpa, Israel Kahvangei men kü Phopshem hük veteke.

²¹ Mechem Shembüpai jom Ijip leipü müei leipa, hahepak kü Shembüpai jenei bühipathü mü lingpü Vangpüshuwpü Pela tuhhen shing hük lingtepih” shei e.

Solomoni Phoppü

²² Hahepak kü Solomoni Shembüpalei moidü touei heih-ei Israel nanglakthü touei yaongtü vangsho philei lak haongtü,

²³ büpai, “Oh Shembüpa, Israel Kahvang, kahdok hatü vangsho kü nüng keipü Kahvang neshiü! Mechem nanglakthüi mong kempai nüngei ven danei kamhenshang, nüngi jom mü vangteishuwteipü jiüshi düknyüke hatü nüngi bampü hunyüke.

²⁴ Nüngi nüngei chongphobü ngelei opa David mü vangpüshuwpü ling; nüngi nüngei jui lah, hatü shinnyih hapayü nüngei laki hingei dükei jiühüteke.

²⁵ Hanangkü Oh Shembüpa, Israel Kahvang, ‘Nüngei hühihathüi nüngi dükpü keiha jom kenhingshi kamjema nüng kü jeiyei Israel ong uoshing kü nüngei hühihathü nedoh-i uohen’ shei nüngei chongphobü opa David kü lahpü hapa jiüshi dükshih.

²⁶ Hanangkü Oh Israel Kahvang, nüngei chongphobü opa David kü nüngi lahpü shahthü jiühüshih” shei e.

²⁷ Shejao hingmei, Kahvangü kahdoknyülei nyuhen je? Vangsho dangkao hapa keiha peü mü shaopü vangsho kü dangkao nüng necha-ükhih; shejema mekei etü hajük maanpü ngei vepü Phopshem kü nüng chahenang!

²⁸ Oh Shembüpa, ngelei Kahvang, nüngei chongphobüi phoppü hatü phepü kü dhaong shangshih. Shinnyih nüngei chongphobüi phoppü hatü lenpü banglangshih.

²⁹ “Ngelei men hatouei nyuhen” shei nüngi epü shingkü nüngei chongphobüthüi hapa shingei phoppü nüngi danlangphahen shangmü nyakhingai thüngei nüngei müki hapa Phopshem philei veishi nyukei.

³⁰ Hapa shing philei meetü nüngei chongphobü ngei hatü nüngei Israel nanglakthüi phoppü danlangshih. Nüng nyushing vangsho leipü hami phoppü danei mang tükshih.

³¹ Shennyak hanei-i laophülei chingyowpa khüei mang thahpü nangkü büpa kü vangeishuwhen eshuohpü nangkü büpai hapa Phopshemei moidü touei peiyei vangjema,

³² nüngi vangsho leipü hapa bangtuh, hatü düktuh hatü pungpüba nyonghüei büpai dükpü büpalei shangjing kü kohütuh, hatü jiüpüba kü jiüpü shangshi thintho shuoh-ei dah shakhütuh.

³³ Mechem nüngei nanglak Israel ami nüng khüei mang thahpü nangkü vepathüi neühahtü maanpü leiyei nüng dhüm yemei jomei mang lah-ei hapa Phopshemei peiyei nüng kü phopei phehenshang,

³⁴ nüngi vangsho leipü ha bangtuh, hatü nüngei Israel nanglakthülei mang tükeishuoh, hatü nüngi jomei chebü chepa kü shuohpü kahdokei shao müei leituh.

³⁵ Mechem nüngei nanglakthüi nüng khüei mang thahpü nangkü vangshoi vang nekeihüi shonglanghen, hatü nüngi jom hanghihüpü nangkü mechem jomi hapa shing philei meeshi phophen, hatü nüngei men kü lahhen, hatü jomei mang kübü mong lephenshang,

³⁶ nüngi vangsho leipü ha bangtuh, hatü nüngei Israel nanglakthülei mang tükeishuoh. Jom kü yangnyu nyuhen jiüshangpü lem hueishuoh, hatü nüngi nüngei nanglakthü kü mükjüp shuohpü kahdok kü vang shomtuh.

³⁷ Mechem kahdok kü shaühile nevaijü chamhilem, nevaijü aplük pelüki hahbongdongjük mangtükhen, nevaijü laonghiyaki nevaijü mechem nüngei nanglakthü jomei vepathüi chingthü hahhen, nevaijü mechem dinhiai nevaijü tüngpüaipü peihenshang,

³⁸ hatü mechem nüngei Israel nanglakthüi laophülei mongdang kü tüngei deihtü hapa Phopshem philei jomei lak haongshi phophen, nevaijü phehenshang,

³⁹ nüng nyushing vangsho leipü nüngi bangtuh, hatü mang tüktü dou düktuh. Shennyak ieyei mü büpai dükpü aimü dükeishuoh; mehenangkü nüngi büpalei mong nyingei nyüke, nüngi mon hangkulei mongdangei mehe nyu, ha nyingei nyüke.

⁴⁰ Shejüang nüngi jomei bühipa kü shuohpü kahdokei nyuyang kemei kü jomi nüng kü nyemhen.

⁴¹ Hapa keiha mechem nüngei nanglak nevaipü kungpa shennyak hük nüngei men danei tailu kahmük leipü peihen;

⁴² mehenangkü shennyakthüi nüngei men longpü hatü nüngei laklu wong longpü danei mechem kungpa shennyak hük peiyei hapa Phopshemei phophenshang,

⁴³ nüng nyushing vangsho leipü bangtuh, hatü kung shennyakthüi phepü aimü dükeishuoh; shejüang nüngei Israel nanglakthüi keiha kahdoknyü hangkuli peüi nüngei men nyinghen, hatü nyemhen, hatü hapai ngei vepü shem kü nüngei men nyüke shei nyinghen.

⁴⁴ Mechem nüngei nanglakthü vehokei daihen, nüngi jom melemei shomhen, hatü mechem jomi nüngi jepü chingnyü hatü nüngei men kü ngei vepü shem philei meetü nüng kü phophenshang,

⁴⁵ nüngi vangsho leipü jomi phoppü hatü phepü kü bangtuh, hatü jom kü aokpü danghütuh.

⁴⁶ Mechem nüngei nanglakthüi nüng khüei mang thahhen– mehenangkü mang nethahpü hükao neshiü, hatü nüngi jom kü mongshih-ei jomei vepalei lak kü shuohjü vepathüi jomei kahdokei wüpküpei deiyei tailuei nevaijü yopailei tuhshingkü,

⁴⁷ jomi jom wüpküpei nyushi mong yeiyaei mong lepei vepa kahdokei nüng kü phopei, “Ham mang thahteke, nejiüi dükteke; hami nemei-i dükteke” shei ejema;

⁴⁸ hatü jom wüpküpei deipü vepa kahdokei jomei mong hatü laangha kempai lepjema, hatü nüngi chebü chepa kü shuohpü kahdok, nüngi jepü chingnyü, hatü nüngei men kü ngei vepü shem philei meetü phopjema,

⁴⁹ nüng nyushing vangsho leipü jomi phoppü hatü phepü kü bangtuh, hatü phahji hueishuoh,

⁵⁰ hatü nüngei nanglakthüi nüng khüei thahpü mang kemei tükeishuoh, hatü jomei vepathüi jom kü phahji nyemhunüng nüngi jom kü phahjituh;

⁵¹ mehenangkü jomphongü nüngi Ijip kahdok awbhaong kübü lepei leipü nüngei nanglak hatü mükjüp.

⁵² Oh Jeiyong Kahvang, nüngi nüngei chongphobü hatü nüngei Israel nanglakthüi phepü kü veishih, hatü mechem jomi nüng kü phophenshang bangtuh.

⁵³ Mechem nüngi hamei bühipa Ijip leipü müei leipa, nüngi nüngei chongphobü Mosa homei epükei kahdoknyü jatthü peü khongkü nüng lompü nanglak vaihen shingvaishi hayaoha lukei jepeih.

Solomoni Doh-ei Phoppü

⁵⁴ Mechem Solomoni Shembüpalei moidü touei lashüh-i shüngtü vangsho lemei lak haongtü phopei tempa, büpa haleipü yaongei,

⁵⁵ ngeüwong anei thaiyei nyupü Israel am peü kü moihimanei e:

⁵⁶ Büpai lahpükei laophülei Israel nanglak kü nyiushemmei shuohpü kü Shembüpa men longtuh. Büpai laophülei chongphobü Mosa homei lahpü hükao neshai-i jiühüteke.

⁵⁷ Shembüpa jenei Kahvang, jenei bühipa mü nyupü keiha jen mao nyukahen; büpai jen netuhphongpih nevaijü neyakphongpih.

⁵⁸ Büpalei lemthü kü kamhen, hatü jenei bühipa kü büpai shuohpü shahkungnyü hatü vanglemthü noteihen shingvaishi büpai jenei mong büpa touei lepei leihen.

⁵⁹ Ngei Shembüpa kü phopei epü hathü shah-i büpalei chongphobü hatü büpalei Israel nanglakthü kü nyihaongale nadang kü sheühhen shingvaishi Shembüpa jenei Kahvang nyemthah;

⁶⁰ shejüang kahdoknyü hangkuli peüi Shembüpayü Kahvang, lebü üpayao neshiü shei nyinghen.

⁶¹ Hanangkü shaang nyupü keiha amphongei thentoimongdang kemei Shembüpa, jenei Kahvang kü lanei shuohtuh, hatü büpalei vanglem hatü shahkungnyüthü bangtuh.

Phopshem Daüpü

⁶² Hapheikü ongpa hatü büpa mü nyupü Israel am kemei Shembüpa kü moila shuoh.

⁶³ Solomoni Shembüpa kü mongjempü moila mohoh 22, 000, hatü mi 120, 000 shuoh. Hapa keiha ongpa hatü Israel nanglakthüi Phopshem daüteke.

⁶⁴ Ha nyih-üng ongpai Phopshem chingshe leipü jiampa chingkon daühü, hatü halei büpai jakpü moila, hahying moila hatü mongjempü moila cheü jakei shuoh; mehenangkü Shembüpa toueipü laktetnyiami lingpü moidü kü jakpü moila, hahying moila hatü mongjempü moila cheü jakei shuohhen shing neshiüi nyuteke.

⁶⁵ Hanangkü Solomon hatü büpa mü nyupü Israel am kemei, khongnyü longi thaiyei Lebo Hamath kübü Ijip viong apshaphi thahshi ha hepak kü nyih nyet mo moteke.

⁶⁶ Nyihphei büpai nanglakthü kemei leitük; jomphongi ongpa kü menvih shuohtü mongongshi shemei leidaikem; mehenangkü Shembüpai doumei kemei büpalei chongphobü David hatü büpalei Israel nanglakthü kü dükteke.