1 ONGPATHÜ 3 - DAÜLANGPÜ LAIHING (BSI)

Solomoni Kihikon Yüpü

¹ Solomoni Ijip ongpa Pharaoh mü mongjem pong, hatü büpalei yiükha mü shem yem, hatü büpai pinnyü David Chingnyülei büpalei shem vepü, Shembüpalei shem vepü hatü Jerusalem shinei bham lingpü mangtemi müei an.

² Hahepak thahshi Shembüpalei shem mangvepü nangkü nanglakthüi moidü longi lingtü moila shuohhamteke.

³ Moidü shing longilei moila shuohpü, hatü ayingshü jakpü mü lenei Solomoni Shembüpa kü longi bam, hatü chepa Davidi nyuhpü lem kü kam.

⁴ Ongpai Gibeonei moila shuohnüng dai; mehenangkü hapa shingei longi shongnyü moidü nyuteke. Solomoni moidülei haja longi moila shuoh.

⁵ Gibeonei nyushi yanüng mangh mü Solomon touei Shembüpa peiyei, “Ngei nüng kü mehe mehe shuohhen yütuh” shei e.

⁶ Solomoni jangei, “Nüngi nüng chongphobü opa David kü yahyang shinshang longi hupeih; mehenangkü büpai nüng kü hinglem, hatü mongdang daülangi hatü laülüki nyu. Nüngi nedoh-i büpa kü bam, hatü shinnyih thahshi hapa ong uoshing kü uohen büpa kü hapeü hük shuoh.

⁷ Shaang, Oh Shembüpa ngelei Kahvang, nüngi nüngei chongphobü opa Davidei shing kü ngei ong vaihüteke. Shejao ngei hashih hük mon, hatü ngelei dousho mekei dükei daihen nenyingang.

⁸ Nüngei chongphobü nüngi jepü nanglakthü, ienüng neaoki longi nyupü khongkü nyüpeih.

⁹ Hanangkü nüngei chongphobü kü nanglakthü shak kü vanglem lemhen hatü mang hi mei baong hanei yao-aokhen kihikon yahshih. Hei nevaijema mekei etü hajükpü nüngei nanglakthü shak kü vanglem lemaokhen?” shei e.

¹⁰ Solomoni hapa yüpü nangkü Shembüpai monghah-ei deih.

¹¹ Hanangkü Kahvangi büpa kü, “Nüngi yangnyu shoshoshi nyuhen nevaijü mophimo, nevaijü vepathü neüaokhen nang nevai, shejao shahhing kü vanglem lemhen kihikon yüpü nangkü,

¹² nüngi mehe yiü, ha ngei nüng kü shuohhen. Ngei nüng kü kihikon hatü mang hi mei nyingaokpü kon shuohhen; shelei nüng kei üpayao nenyuhampeih; hatü nüng pheikao nüng kei üpayao nechongkahen.

¹³ Ngei nüng kü nüngi neyüpü mophimo hatü dhüm nüngei den kemei kü shuohhen; üpa ongao nüng mü neshetnephenaokpih.

¹⁴ Nüngi ampa Davidi kampükei ngelei lemthü kü kamei ngelei shahkungthü noteijema, ngei nüngei yangnyu shoshoei tuhhen” shei e.

¹⁵ Hapheikü Solomon paojashingkü, hapayü mangh leidaitü chongjateke. Büpa Jerusalemei nyokei leiyei Shembüpalei Vangpüshuwpü Pela touei yaong, hatü büpai jakpü moila hatü mongjempü moilathü shuoh. Hapheikü büpai büpalei nanglakthü peü kü mo ühteke.

Solomoni Shahphenpü

¹⁶ Nyih hük büm yuteipü nyüha nyi Solomon ongpa touei peiyei yaong.

¹⁷ Jiji khongkü hüki, “Ngelei shembü, hapa nyüha henji shem hük kü nyunyeih. Pinnyü ngei mü halei nyushi ngei naü hük angpeih.

¹⁸ Ngei naü angpheikü nyih jempabü kü pinnyüiyao hük angpü khih. Lebü üpayao neshiü, henji mon ha shem kü nyupeih.

¹⁹ Hapheikü yahük hapa nyühai chetei pinnyülei naü jütükpü khih.

²⁰ Pinnyüi nyak jiam kü paoei ngei mü shipü ngelei naü ngei shidaitü yahlangpü khih. Pinnyüi ha naü pinnyülei amma kü choitü pinnyülei naü mahng yah-ei ngei mü lemphongpü khih.

²¹ Nepnüng paoei ngelei naü kü amma yingnüng veishuohjü naü didaitü chongküpeih. Shejao mechem ngei naü kü nepnüng vangngai kü hingei veipa, hapa naü-ü ngei bühpü naü nevai-i chongküpeih” shei e.

²² Shejao hükpa nyühai, “Nevai! yemmü nyupeyü ngelei ha hih; nüngei naü-ü didaipü ha hih” shei e. Shejao hapa nyühai nedoh-i, “Nevaipih! hapa naü mahngü nüngei hih; ngelei naü-ü yemmü nyupü ha hih” shei e. Hapa keiha jijinyi ongpa touei shah daktei.

²³ Hahepak kü Solomon ongpai, “Hüki enyüke ngelei naü-ü yem mebü ha hih shei, nüngei naü-ü didaipü ha hih shei, shejao hükpai, ‘Nevaipih! nüngei naü-ü didaipü ha hih; ngelei naü-ü yem mebü ha hih’ ” shei enyüke.

²⁴ Hahepak kü ongpai, “Ngei kü yanlu hük ankei” shei e. Hanangkü jomphongi ongpa kü yanlu hük anei shuoh.

²⁵ Büpai ngeükhüam hük shuoh-ei, “Hapa yemmü nyupü naü nyi anei dehtuh, hatü hük kü phaihan hük, hatü hükpa kü phaihan hük shuohtuh” shei e.

²⁶ Shejao naü yemmü nyupülei hingshangpü chenyüi naü kü phahjiei deih, hatü ongpa kü, “Ngelei shembü, chingmeilemlingei jütük leimeyü hapa naü yemmü pinnyü kü yah-eishuoh! Naü tejütük!” shei e. Shejao hükpai, “Nüngiyao neyahhen, ngeiyao neyahhen. Nyi vaishi dehshih!” shei e.

²⁷ Hahepak kü ongpai shahphen shuoh-ei, “Hapa naüyem shongpü nyüha kü yah-eishuoh. Naü tejütük; naüei chenyü-ü pinnyü khih” shei e.

²⁸ Mechem Israel am kemei-i ongpai shahphen shuohpü danpa, jomi ongpa kü dhüm longi shuoh; mehenangkü büpa kü shahhingi vanglem lemhen Kahvang leipü kihikon nyüke shei nying.