1 ONGPATHÜ 22 - DAÜLANGPÜ LAIHING (BSI)

Mikaiah Thibüi Ahab Khüei Tetpü

¹ Bong jem hükshing Israel hi Aram am nyi aa kü vehok nehoki heih.

² Shejao bong jempabü kü Judah ongpa Jehoshaphati Israel ongpa Ahab mü pongteinüng yiü.

³ Israel ongpai büpalei lakchongbüthü kü, “Ramoth-Gileadü jenei kahdok shei nyingla? Shejao jeni Aram ongpalei lak leipü hapa nyokei leilanghen meheyao nedüknyu khihma!” shei e.

⁴ Hanangkü büpai Jehoshaphat kü, “Aram ongpalei lak leipü Ramoth-Gilead aetei leinüng nüngi ngei kü vehok kü sheühpha-üla?” shei phe. Jehoshaphati Ahab kü jangei, “Ngeiyü nüng keipü; ngelei nanglakthüyü nüngei nanglak; ngelei koyeithüyü nüngei koyeithü” shei e.

⁵ Shejao Jehoshaphati Israel ongpa kü, “Shongei Shembüpa kü shong pheshah” shei e.

⁶ Hanangkü Israel ongpai thibüthü jom kho ali hükshing nyükei leiyei jom kü, “Ngei Ramoth-Gilead hahnüng daihen hi nedaihenang?” shei phe. Jomi büpa kü, “Daituh, mehenangkü Shembüpai ongpalei lak kü hapa shuohhen” shei e.

⁷ Shejao Jehoshaphati, “Jeni phehen mü hatouei Shembüpalei thibü lebü hükao nenyupü je?” shei phe.

⁸ Israel ongpai Jehoshaphat kü jangei, “Jeni Shembüpa kü phehen meyü shao lebü shennyak hük, Imlahlei cheha Mikaiah nyüpeih, shejao ngei büpa kü jiühitnyeih; mehenangkü büpai chemao ngei kü meipü jung ne-ephünyih; düngei nemeipü mon ephünyeih” shei e. Jehoshaphati jangei, “Nüngi hapakei te-e” shei e.

⁹ Hahepak kü Israel ongpai lakchongbü hük nyükei, “Imlahlei cheha Mikaiah chem nyükei deikei” shei e.

¹⁰ Ong-ow owtü Israel hatü Judah ongpa nyi Samaria penyü shaden hah tenshingei ong uoshing kü uotü thibüthü jiji touei teteivanei eyei nyu.

¹¹ Shaang Kenaanahlei cheha Zedekiah-i nyiami vaung hük lingtü büpai, “Hapa yah-ei nüngi Aram am mangmahkem thahshi hokhen shei Shembüpai enyüke” shei e.

¹² Lebü thibüthü kemei aihük mü teteivanei, “Ramoth-Gilead hahnüng aongtuh, hatü nüngi aokhen khih; Shembüpai hapa kahdok ongpalei lak kü shuohhen khih” shei e.

¹³ Mikaiah kü nyüknüng deishihpü naühai büpa kü, “Veituh, lebü thibüthü kemei aihük mü ongpai aokpü danghen khih shei eteke. Nüngiyao hathüi epükei meishi eyeishuoh” shei e.

¹⁴ Shejao Mikaiah-i, “Vanyangyem Kahvangei men kü enyeih, Shembüpai mehe e, hapa mon ngei ehen” shei e.

¹⁵ Mechem büpa ongpa touei heihpa, Ahab ongpai büpa kü, “Oh Mikaiah, Jehoshaphat ongpa henjinyi-i Ramoth-Gilead hahnüng nedaihen hi daihenang?” shei phe. Mikaiah-i büpa kü, “Aongei hahtuh; Shembüpai hapa ongpalei lak kü shuohhen” shei e.

¹⁶ Shejao ongpai büpa kü, “Shembüpalei men kü eshingkü lebü nevai, shejao shahhing eshih shei ngei meshükpa nüng kü enya?” shei e.

¹⁷ Hahepak kü Mikaiah-i jangei, “Mi yombü neshiüpü mithü keiha Israel am kemei shanghishong kü nyaidaikemi eenyüke, hatü Shembüpai, ‘Hathü nanglakthülei mübü neshiü; hanangkü jom peü nyemleidaikem’ shei enyüke” shei eteke.

¹⁸ Ahab ongpai Jehoshaphat kü, “Nemeipü mü lenei büpai ngei kü meipü jung chemao teteivanei ne-ephapih shei ngei ela?” shei e.

¹⁹ Mikaiah-i nedoh-i, “Hanangkü Shembüpalei shah bangtuh: Shembüpai büpalei ong uoshing kü uotü büpalei laknyong lakdah kü vangsho phongshanthü shinei yaongtü eenyüke.

²⁰ Hatü Shembüpai, ‘Ahabi Ramoth-Gileadei hoknüng aongei mahhühen shingvaishi üpai büpa yawh-aokhen?’ shei e. Hahepak kü hüki lemhük, lebü hüki lemhük eteke.

²¹ Shompülei laangha hük Shembüpa touei peiyei yaongtü, ‘Ngei büpa yawhhen hih’ shei e.

²² Shembüpai, ‘Mepakei yawhhen?’ shei phe. Laanghai jangei, ‘Ngei daiyei Ahabei thibüthü kemei shahshem ehen mü leihühen’ shei e. Hahepak kü Shembüpai, ‘Daituh, hatü nüngi büpa yawhtuh; nüngi aokpü danghen hih’ shei e.

²³ Hanangkü shaang Shembüpai nüngei thibüthülei ju kü shahshem ehühen shahshem laangha shihteke; Shembüpai nüng vongshüh ponghühen temtüktü nyüke” shei e.

²⁴ Hahepak kü Kenaanahlei cheha Zedekiah aongei Mikaiahlei dhe kü aptü, “Nüng kü ha ephahen mü Shembüpalei laanghai ngei tuhtü mepa lem kü daipa?” shei e.

²⁵ Mikaiah-i jangei, “Dungnuk mongpalei jonüng shüpü nyih nüngi ha eehen” shei e.

²⁶ Hahepak kü Ahabi ngeükhüam shuoh-ei, “Mikaiah yeptuh, hatü hapa chingnyü kü governor Amon hatü ongpalei cheha Joash nyi touei müei deituh,

²⁷ hatü hapa shennyak kü aan hatü yung nyi mon yingpü mü lenei lebü meheyao ne-üh-i ngei manglei thahshi khoklatei küpshi tuhtuh shei ongpai enyüke shei etuh” shei eteke.

²⁸ Mikaiah-i jangei, “Nüng yemmü nyokei leiküjema Shembüpai ngei kü ne-epü nyemvai” shei e. Hatü büpai shao, “Ngei mehe e, ha kü am peüi bangtuh!” shei e.

Ahab Ongpa Mahpü

²⁹ Hapheikü Israel ongpa Ahab hatü Judah ongpa Jehoshaphat nyi Ramoth-Gilead chingnyü hahnüng aong.

³⁰ Ahabi Jehoshaphat kü, “Ngeiyü ongao nevaipükei ow yeiyaei owhen, shejao nüng payü ong ow owtuh” shei e. Hanangkü Israel ongpai ongao nevaipükei ow temtü vehokei dai.

³¹ Shaang Aram ongpai büpalei koyei khari mübüthü jom hapüanpünyi kü ammi, “Israel ongpa mü lenei longpü maanpü üpa mao tehok” shei e.

³² Mechem koyei khari mübüthüi Jehoshaphat eepa, jomphongi, Hapayü Israel ongpa khih shei deih. Hanangkü jomphongi büpa jününg heih. Shejao mechem büpai lenpa,

³³ koyei khari mübüi büpayü Israel ongpa nevaiang shei nyingei büpa phei kü changei nedai-i leidai.

³⁴ Shejao Aram am veshan hanei-i nenyingi lahhan kappai Israel ongpalei vehok ow thüngpü baong kü jiüshi shü. Hanangkü koyei khari mübü kü, “Ngei ma yahteke! Thepju leipü ngei müei leilangtuh” shei e.

³⁵ Helu mangshi hokteke, hatü ongpayü Aram am philei meetü büpalei koyei khari kü nyantü nyu. Büpalei makaw kübü iy yenpai koyei khari maei nyu, hatü büpa om kü di.

³⁶ Vanghe shühen hepak kü Israel am peü touei, “Shennyak peü laophülei kahmük hatü ching yemei leikemtuh” shei len.

³⁷ Hapa keiha Ahab di, hatü büpalei mahng Samarialei leiyei vüteke.

³⁸ Shembüpai epü keiha büm yupüthüi hangha lakteipü Samaria yungkukei büpalei koyei khari paüteke, hatü shithüi büpalei iy kü laiteke.

³⁹ Shaang Ahabi dükpü douthü, büpai vepü meinyübha shem, büpai lingpü chingnyüthü peü Israel ongthülei Büshah Laitap kü nyangei nyüpeih.

⁴⁰ Chebü chepa amei mahngchongei Ahabei mahng vü, hatü büpa kü jeiyei cheha Azariah-i ong vaiteke.

Judah amei Jehoshaphat Ongpa

⁴¹ Israel kü Ahab ongpai vanglem lempü vangbong alipabü kü Asalei cheha Jehoshaphati Judah kü ong vaiteke.

⁴² Büpa ong vaipü hepak kü büpalei nyübüh vangbong hapüanpünga nyu, hatü büpai Jerusalemei vangbong hapünga vanglem lem. Chenyü-ü Shilhilei yiükha Azubah nyuteke.

⁴³ Büpai chepa Asalei lem kü ajükiyao nepungi kam, hatü Shembüpa tou kü mehe jiü, ha dük, shejao büpai lebü kahvangthü kü khümpü shing nebentük; hanangkü nedoh-i nanglakthüi hathü shing kü moila shuoh-ei ayingshü jakei nyuteke.

⁴⁴ Jehoshaphati Israel ongpa mü chingmei lingei nyuteke.

⁴⁵ Jehoshaphati dükpü douthü, büpai monglongei hokpü hathü kemei Judah Ongthülei Büshah Laitap kü nyangei nyüpeih.

⁴⁶ Chepa Asalei nyih kübü khümshingei büm yupü nyüha hatü bahathü peü kahmük kübü changtük.

⁴⁷ Hahepak kü Edom kahdokei ong nenyuham; Judah ongi jepü lakchongbü hüki mon vanglem lemei nyu.

⁴⁸ Jehoshaphat ongpai Ophir kahdok leipü hon leihen shingvaishi jahas hük halei deishihhen ling, shejao halei neheih-aoki Ezion-Geberlei mangei nyu.

⁴⁹ Hahepak kü Israel ongpa Ahaziah-i Jehoshaphat kü, “Ngelei chongphobüthüao nüngei chongphobüthü mü deihahtuh” shei e, shejao Jehoshaphati nemong.

⁵⁰ Jehoshaphat di, hatü chebü chepalei mahngchongei David Chingnyülei vü, hatü cheha Jehorami büpa kü jeiyei ong vaiteke.

Israel Ongpa Ahaziah

⁵¹ Judah kü Jehoshaphati vanglem lempü bong anpünyetpabü kü Ahabei cheha Ahaziah-i Israel kü Samarialei vanglem lemei chongpang. Büpai Israel kü bong nyi mon vanglem lem.

⁵² Büpai Shembüpa touei mehe mang, ha dük; büpai chenyü hi chepa nyilei lem kü kam, hatü Israel mang thahhüpü Nebatei cheha Jeroboamei lem kü kam.

⁵³ Büpai Baal kahvangthü chongpho, hatü hapa kü khüm; büpai chepai dükpü keiha Shembüpa, Israel Kahvang mongshih vamhü.