1 ONGPATHÜ 20 - DAÜLANGPÜ LAIHING (BSI)

Aram am mü Hokpü

¹ Shaang Aram am Ben-Hadad ongpai veshanthü peü thaihü. Büpa kü sheüh-ei ongthü hapüanpünyi jomei koyei hatü koyei kharithü temei thai. Büpa Samaria am mü hoknüng aongei hapa ching shümei hahteke.

² Büpai Israel ongpa Ahab nyupü chingnyü mongei phongmokbüthü shomei, “Ben-Hadadi hapakei enyüke:

³ ‘Nüngei hon hi ngin kemei ngelei; nüngei nyüha hapeü meipüthü kemei ngelei’ ” shei e.

⁴ Ahab ongpai jangei, “Ngelei shembü ongpa, nüngi epükei-üng ngei hatü ngei angpü kemei nüngei” shei e.

⁵ Phongmokbüthüi shao Ahab ongpa touei peiyei, “Ben-Hadadi hapakei enyüke: ‘Ngei nüng kü nüngei hon hi ngin, nüngei nyüha hapeüthü yühen shingvaishi shomteke,

⁶ shejao ngenyih shaangkei ngei nüngei ongshem, hatü nüngei lakchongbüthülei shem bomei yahhen shingvaishi ngelei chongphobüthü shomphahen. Jomphongi ammei doumong kemei jomei lak hingei yah-ei daihen’ ” shei e.

⁷ Hahepak kü Ahab ongpai kahmük kübü mübüthü kemei nyükei thaihütü, “Veihümao, hapa shennyaki shanghah shuohhen yemnyu khih. Büpai ngei kü ngelei nyüha hapeüthü, hatü ngelei hon hi ngin yüei shomphopü kü ngei tah shei ne-eshuohangpih” shei e.

⁸ Hahepak kü behethü hatü nanglakthüi büpa kü, “Büpai epü tebang; meheyao teshuoh” shei e.

⁹ Hanangkü büpai Ben-Hadadei phongmokbüthü kü, “Ngelei shembü ongpa kü büpai shongei yüpü peü ngei dükhen, shejao nüngi nyipabü kü yüpeyü ngei nedükaokpih shei eyeishuoh” shei e. Hanangkü phongmokbüthüi Ben-Hadad touei shah-om koei leijateke.

¹⁰ Hahepak kü shao Ben-Hadadi Ahab kü lebü shah hük shomei, “Ngei mü peipü shennyakthüi hapa Samaria kahdokao omshi paoh-ei neleidaijema kahvangthüi ngei kü nyeinya nemei-i nyemdükpha” shei e.

¹¹ Ahab ongpai jangei, “Vehok mangneü shekü vehok ow mon owpü kü vehok neütükpü am keiha techangmei shei Ben-Hadad ongpa kü etuh” shei e.

¹² Ben-Hadadi büpa mü lebü ongthü büpalei shemei yiü yingei nyushingkü hapa shahnyok dangei büpai büpalei nanglakthü kü, “Hokhen temtuh” shei e. Hanangkü jomi hapa chingnyü hahtükhen show lingteke.

¹³ Hahepak kü Israel ongpa Ahab touei thibü hanei peiyei, “Shembüpai hapakei enyüke: ‘Nüngi hapa veshan khong longpü eenyüla? Veituh, shinnyih ngei hathü nüngei lak kü shuohhen, hatü ngeiyü Shembüpa shei nüngi nyinghen’ shei enyüke” shei eshuohteke.

¹⁴ Shejao Ahabi, “Üpai hapa vehok hokhenang?” shei phe. Thibüpai, “District kü mübüthü phangkü chongphopü nethe veshanthüi hokhen” shei e.

¹⁵ Hanangkü Ahabi district kü mübüthü phangkü chongphopü nethe veshanthü jom 232 nyükei thaihü. Hapheikü büpai Israel am veshanthü haja nyet thahshi nyükei thaihü.

¹⁶ Ben-Hadad hatü büpa mü sheühteipü ongthü hapüanpünyi jomei paümtapei yiüi chokdaikemtü nyupü hepak kü Israel am hamhah pheikü layaongei dai.

¹⁷ District kü mübüthü phangkü chongphopü nethe veshanthü shong shelei dai. Ben-Hadadi veihen shompü veyombüthüi büpa kü, “Samaria leipü veshanthü vamei heihkei-i eenyüke” shei e.

¹⁸ Büpai jomphong kü, “Hathüyü chingmeivangmei kü heihküpü vaijao, jomi hoknüng heihküpü vaijao yemmü leikei” shei e.

¹⁹ District kü mübüthü phangkü chongphopü nethe veshanthü pheikü veshanthü mütü dai,

²⁰ hatü shennyak peüi laophülei vepa jü. Hahepak keyü Aram am nyemei nyai, shejao Israel ami changei dai. Shejao Aram ongpa Ben-Hadad-ü büpalei koyei veshanthü hanei mü nyaiyei yangdai.

²¹ Israel ongpa Ahabi daiyei koyei hatü koyei kharithü jütüktü Aram am longi jü.

²² Hahepak kü hapa thibüpa Ahab ongpa touei peiyei, “Leiyei nüngei veshanthü wong kohshi thaiyei küpjan meishi lingtü show lingtuh; mehenangkü ngüvang ünyü hepak kü shao Aram ongpai nüng mü hoknüng peikahen” shei e.

Aram am mü Nyipabü Hokpü

²³ Ben-Hadad ongpalei lakchongbüthüi büpa kü, “Israel amei kahvangthü-ü shangching kahvangthü khih. Hanangkü Israel ami jen kü neüphopü khih. Shejao kahjilei hokjema, hingmei jeni neühen khih.

²⁴ Hatü hapayao dükütuh: Shaangpü ongthü peü jeitüktuh, hatü jom kü jeiyei jomei lakchongbüthü yahtuh.

²⁵ Shelei mahdaipü veshanthü kei-üng shao ja jetuh; koyei kü koyei, koyei khari kü koyei khari jeiyei yahtuh; shejüang jeni jom khüei kahjilei hokhen, hatü jeni neüaokhen khih” shei e. Jomi epü vaiteke shei deihtü büpai hapakei dük.

²⁶ Vangphei Ben-Hadadi ünyü hepak kü Aram veshanthü mütü Israel am mü hokhen shingvaishi Apheklei aong.

²⁷ Israel amao peü temei hoknüng aong. Israel amü jom mü shetteijema yum cheha nyi keiha jom mü khangteishi baümtap ve, shejao Aram amü kahmük maei nyuteke.

²⁸ Israel ongpa Ahab touei thibü hük peiyei, “Aram ami ngeiyü kahjilei Kahvang nevai, shejao shangchingthülei kahvangthü khih shei epü nangkü ngei hapa veshan khongnyü longpü nüngei lak kü shuohhen, hatü ngeiyü Shembüpa shei nüngi nyinghen” shei e.

²⁹ Jom khangteishi baümtap vetü nyih nyet nyu, hatü nyih nyetpabü kü hokei chongpang. Israel ami nyih hük kü Aram am veshan lakh hük thahshi jü.

³⁰ Aopüthü nyaiyei Aphek chingnyülei shü, hatü haleipü bham laamei haja hapünyet chetei jü. Ben-Hadadao yanglem yemei chingnyülei dungnuk mongpalei joshi nyu.

³¹ Büpalei lakchongbüthüi büpa kü, “Veihümao, Israel ongthü-ü phahji yahyang kohpü ongthü shei jeni danei nyüke. Hamphongi Israel ongpa touei shüng kü dhoila ashak, hatü shangjing kü vü hintü heihjashah; üpai nyingpa, büpai nüngei yangnyu yangphahen aokpeih” shei e.

³² Hanangkü jomi shüng kü dhoila ashak, hatü shangjing kü vü hintü Israel ongpa Ahab touei peiyei, “Nüng chongphopü Ben-Hadadi, ‘Ngei yangtuh’ shei enyüke” shei e. Ongpai jangei, “Büpa shaang thahshi yemmü nyüke je? Büpayü ngelei jeihinaü hih” shei e.

³³ Shaang, Ben-Hadadei shennyakthüyü manghimei lomi yephen longi kleihshi nyu, hatü mechem Ahabi, “Ngelei jeihinaü” shei ejapa, jomi met shei, “Hih, Ben-Hadadü nüngei jeihinaü!” shei jomphongi e. Ahabi, “Büpa ngei touei müei deikei” shei e. Hanangkü Ben-Hadad büpa touei müei dei, hatü Ahabi büpa koyei khari kü uohü.

³⁴ Ben-Hadadi büpa kü, “Opai ampa leipü aetpü jilathü peü ngei nyokei yahphahen hih, hatü opai Samarialei dükpükei nüngi Damaskalei hat aptuh” shei e. Israel ongpa Ahabi, “Hathü lahpü nangkü ngei nüng yangei leishihhen hih” shei e. Hanangkü Ahabi büpa mü hapa lahteitü leishihteke.

Thibü Hüki Ahab Nyonghüpü

³⁵ Shembüpalei shah homei thibü hüki büpa mü nyupü thibü hük kü, “Ngei kü bheishih!” shei e. Shejao hapa shennyaki tah shei e.

³⁶ Hanangkü hapa thibüi büpa kü, “Nüngi Shembüpalei shah nebangpü nangkü nüng ngei toueipü yanei leihinüng mailang hüki nüng hahtükhen” shei e. Epükei büpa leijahinüng mailang hük vamei büpa jü.

³⁷ Hapheikü büpai lebü shennyak hük pongei, “Ngei kü bheishih!” shei e. Hanangkü hapa shennyaki büpa kü aokshi bhei.

³⁸ Hanangkü hapa thibü lüdaitü büpayü ongpa lemei leijapü danei yaongshi nyu. Büpa nevaipükei huhen shingvaishi büpalei dhe kü shaktü nyu.

³⁹ Ongpa peijashingkü hapa thibüi büpa kü nyüktü, “Nüng chongphobü ngei mangpü thepju kü daiyei nyuteke, hatü veshanthüi shennyak hük yepei leiyei, ‘Hapa shennyak yomtuh. Nüngi büpa laongei deitükjema, büpalei yangnyu nangjei nüngei yangnyu shuohhen, hei nevaijema ngin haja jem hang shemhen’ shei ephopeih.

⁴⁰ Shejao ngei lebü douthü dükei nang nekongi nyudaitü hapa shennyak laongei lüdaiteke” shei e, hatü Israel ongpai büpa kü jangei, “Nüng dihen nüngi-üng shahphen shuohteke” shei e.

⁴¹ Hahepak kü thibüpai met shei büpalei dhe kübü ashak nyiuktük, hatü Israel ongpai büpayü thibüthü khongkü büpayao hük shei nyingaok.

⁴² Hahepak kü thibüpai büpa kü, “Shembüpai hapakei enyüke: Ngei jütüktuh shei epü shennyak nüngi yangei leishihpü nangkü büpalei yangnyu nangjei nüngei yangnyu, hatü büpalei nanglakthü nangjei nüngei nanglakthü sho jeihen” shei e.

⁴³ Israel ongpa longi mongshangei Samaria leipü shemei leidai.