1 ONGPATHÜ 2 - DAÜLANGPÜ LAIHING (BSI)

Davidi Solomon kü Shahshom Epü

¹ Mechem sheyü David dihen nyih yoei peipa, büpai cheha Solomon kü shahshom e.

² Sheyü ngei didaihen hepak ngoiteke, “Nüng wong kohtuh hatü monglongtuh,

³ hatü Shembüpa, nüngei Kahvangi mehe nanya ha düktuh. Büpalei lemthü kü kamtuh, hatü büpalei shahkungnyüthü peü Mosa Shahkung kü nyangei nyupükei düktuh. Shejüang nüngi dükpü lemphü kü, hatü nüng daipü lem peü kü dapüshepü nyukahen,

⁴ hatü Shembüpai ngei kü lah-ei, ‘Nüngei hühihathüi jomei lem kü lishi nyujema, hatü jomei mongdang hatü laangha kempai ngei touei shahhing kü kamjema, Israel ong uoshing kü uohen shennyak netao-i nyuhen’ ” shei epeih.

⁵ Nyeinya vaishi Zeruiahlei cheha Joabi mehe ngei kü dükpa ha nüngi nyingei nyüke. Mekei büpai Israel veshan mübü nyi, Nerlei cheha Abner hatü Jetherlei cheha Amasa nyi kü vehok hepak kü jüteipü kü bhüh khangei chingmeivangmei hepak kü iy yenhüpa, hatü hapa iy-i mekei büpalei shüngshep hatü büpalei lathuh kü nyiohahpa ha nüngi nyingteke.

⁶ Nüng kü nyupü kihikon aimü büpa kü dükshuoh, shejao nüngi shosho pungdaipü büpa mahngmei mü telaihü.

⁷ Shejao Gilead am Barzillailei chehapeüthü kü phahji yahyang hutuh, hatü jomphong nüngei nükdü kü hahhütuh. Anjei Absalom toueipü ngei daiyei nyushingkü jomphongi ngei kü bamei noteipeih.

⁸ Shao nüng mü Bahurim leipü Benjamin am Geralei cheha Shimei nyüke. Ngei Mahanaimei daipü nyih büpai ngei kü shahyaki thaüvaüpeih, shejao mechem büpai ngei mü pongteinüng Jordanei shaküpa, ngei Shembüpalei men kü büpa kü, “Ngei nüng nejüpih shei lah-ei eshuohpeih.

⁹ Shejao nüngi büpa kü mang neshiüpükei tedeih. Nüngü kon kohpü shennyak; büpa kü mehe dükhen ha nüngi nyinghahte, hatü nüngi büpalei shosho pungdaipü shangjingü iy homei mahngchongei vühütuh” shei e.

¹⁰ Hapheikü David di, hatü chebü chepa am mü David chingnyülei vüphong.

¹¹ Büpai Israel kü vangbong pinyi thahshi vanglem lem Hebronei vangbong nyet hatü Jerusalemei vangbong hapüanpüjem vanglem lem.

¹² Hanangkü Solomoni chepa Davidei ong uoshing kü uo, hatü büpalei ongching wong kohshi chonglingteke.

¹³ Hapheikü Haggithlei cheha Adonijah-i Solomonei chenyü Bathsheba touei pei. Pinnyüi, “Nüngü chingmei kü-üng peiküpa yo?” shei phe. Büpai, “Hih” shei e.

¹⁴ Hahepak kü büpai, “Ngei nüng mü shah hük eteihüangke” shei e. Pinnyüi, “Etuh” shei e.

¹⁵ Büpai, “Ongchingü ngelei shei nüngiyao nyingdaiphei, hatü Israel am kemei ngei vanglem lemjahen shei ongyangei danteke, shejao hapa ongchingü ngelei naüpeüei lakei heihdaiteke; mehenangkü hapayü Shembüpai büpa kü shuohpü khih.

¹⁶ Shaang ngei nüng kü yühüpü dou hük nyüpeih; nüngi ha kü shan teleipha” shei e. Pinnyüi, “Meheshang kü etuh” shei e.

¹⁷ Hanangkü büpai pinnyü kü, “Chingmeilemlingei nüngi Solomon ongpa kü Shunam am Abishag ngelei nyüha vaihen yahshihja shei eyeishuoh. Büpai nüng kü tah shei ne-ephapih” shei e.

¹⁸ Bathshebai, “Meiteke, ngei nüng nangkü ongpa kü eshuohshah” shei e.

¹⁹ Hanangkü Bathshebai Solomon ongpa touei Adonijahlei men kü hapa ehen pei. Ongpai chenyü mü pongteihen yaong, hatü pinnyü touei aümei sha, hatü laophülei ong uoshingei uo. Büpai chenyü shingao uoshing hük dei, hatü pinnyü ongpalei lakdah philei uohü.

²⁰ Pinnyüi, “Ngei nüng kü yühen khümpü dou maanpü hük nyüpeih. Nüngi tah shei te-epha” shei e. Büpai, “Onyü, meheang etuh, ngei tah shei ne-epih” shei e.

²¹ Pinnyüi, “Shunam am Abishagü anjei Adonijah mü shem yemhütuh” shei e.

²² Solomon ongpai chenyü kü jangei, “Mehekei nüngi Adonijah kü Shunam am Abishag shuohtuh shei enya? Nüngi büpa shingvaishi ongchingao yühen vaipü je? Büpayü ngelei ojei; büpa shing mon nevai shejao ngongpa Abiathar hatü Zeruiahlei cheha Joab shingao yütuh” shei e.

²³ Hahepak kü Solomon ongpai Shembüpalei men kü lah-ei, “Adonijah-i hapa yüpü nangkü büpalei yangnyu-üng ha phuo kü nelaihüjema Kahvangi ngei kao ha mü nemeipüba nyemdükpha!

²⁴ Hanangkü shaang Shembüpa, üpai ngei opa Davidei ong uoshing kü uohü, hatü büpai lahpükei ngei kü ongching shuohpa, hapa vanyangyem Shembüpalei men kü shinnyih Adonijah mahtükhen” shei e.

²⁵ Hanangkü Solomon ongpai Jehoiadalei cheha Benaiah kü ngeükhüam shuoh, hatü büpai Adonijah jütük.

Abiathar Changtükpü hatü Joab Mahpü

²⁶ Ongpai ngongpa Abiathar kü, “Ammei kahmük Anathoth yemei leidaituh. Nüng dihen shangteke, shejao shaang payü ngei nüng nejü-ü; mehenangkü nüngi opa David mü nyushi Jeiyong Shembüpalei Vangpüshuwpü Pela kopeih, hatü opalei hanghi peü kü sheühteipeih” shei e.

²⁷ Shembüpai Shilohlei Eli am shem nangkü epü jiühühen shangmü Solomoni Shembüpalei ngongpa dousho kübü Abiathar changtük.

²⁸ Mechem Joab touei hapa shahjang ngoipa, büpai Absalom kü nesheühjao Adonijah kü sheüh; büpa Shembüpalei ashakshemei laongei daiyei moidü vaung kü shongteke.

²⁹ Joabü laongei daiyei Shembüpalei ashakshemei moidü tüngei nyüke shei Solomon kü eshuohteke. Hahepak kü ongpai Jehoiadalei cheha Benaiah kü, “Daituh, hatü büpa jütuh!” shei e.

³⁰ Hanangkü Benaiah-i Shembüpalei ashakshem mongei shüei Joab kü, “Ongpai vamkei shei nyüknyüke” shei e. Shejao Joabi jangei, “Anyoh, ngei hatouei dihen hih” shei e. Benaiah-i ongpa kü, “Joabi hapakei enyüke” shei eshuoh.

³¹ Hahepak kü ongpai Benaiah kü, “Büpai epükei dükeishuoh. Büpa jütüktuh hatü vüphongtuh; hapa keiha mang neshiüpü kü Joabi iy yenhüpü mang kübü ngei hatü opalei shem am daütükshih.

³² Büpai mih jüpü kü Shembüpai büpa kao ha nyemshemshuoh; mehenangkü büpai büpa mao daülangpü hatü meipü shennyak, Nerlei cheha Abner, Israel amei veshan mübü hatü Jetherlei cheha Amasa, Judah amei veshan mübü nyi opa Davidi nenyingi jütükpeih.

³³ Jiji jüpü iy kübü pungpü mangü Joab hatü büpalei hühihathü kü denden kü nyemhet. Shejao David hatü büpalei hühihathü, büpalei shem am, hatü ong uoshing kü düngei SHEMBÜPAleipü chingmeivangmei nyuhen” shei e.

³⁴ Hanangkü Jehoiadalei cheha Benaiah-i Shembüpalei ashakshemei heih-ei Joab kü baptü jü, hatü yingnyü yopailei jomei mahngchongei vüphong.

³⁵ Ongpai Joabei shing kü jeiyei Jehoiadalei cheha Benaiah veshan mübü vaihü, hatü Abiatharlei shing kü Zadok ngongpa vaihü.

Shimei Jütükpü

³⁶ Hapheikü ongpai Shimei kü shah shomei, “Jerusalemei nüngi laophü shing shem hük vehahtuh, hatü halei nyutuh, shejao meleiyao haleipü laoei tedai.

³⁷ Nüng haleipü laoei daipü hatü Kidron kahji homei daipü nyih-üng nüng hingmei mahhen shei deihtuh; nüngei iy nüngi kohen” shei e.

³⁸ Shimei-i ongpa kü, “Nüngi mehe e, hayü meiangke. Ngelei shembü ongpai epükei nüngei chongphobüi dükhen” shei e. Epükei Shimei-i Jerusalemei hepak luangi nyu.

³⁹ Shejao vangbong jem pheikü Shimeilei aa nyi Gath am ongpa Maakahlei cheha Akhish touei nyaiyei lüdaiteke shei Shimei kü eshuohteke.

⁴⁰ Hanangkü büpai büpalei gadu kü uotü Gath am Akhish touei aa nyi yemei dai. Hapa keiha Shimei daiyei Gath leipü aa nyi müei lei.

⁴¹ Mechem Solomon kü Shimei Gathlei heihpü leiyei nyüke shei eshuohpa,

⁴² ongpai Shimei kü nyükei, “Nüng hatou shing kübü laoei daipü nyih, nüng hingmei mahhen shei ngei Shembüpalei men kü nüng kü nelahhüangpü je, hatü shahvüng neshuoh-angpü je? Hahepak kü nüngi ngei kü, ‘Nüngi mehe e, ha meiangke, ngei ha banghen’ shei ne-eangpü je?

⁴³ Shejema mehekei nüngi Shembüpa kü lahtükpü nedükpa, hatü ngei nüng kü shuohpü shahkung nebangpa?” shei e.

⁴⁴ Ongpai shao Shimei kü, “Nüngi opa David kü mehe nemeipü dükpa, ha nüngi nyingei nyüke. Hanangkü nüngi nemeipü dükpü kü Shembüpai shaang nüng kü ha nyokei nyemyahpha.

⁴⁵ Shejao Solomon ongpa moihimanhen, hatü Davidei ong uoshing Shembüpai den kü yangei tuhhen” shei e.

⁴⁶ Hapheikü ongpai Jehoiadalei cheha Benaiah kü ngeükhüam shuoh, hatü büpa daiyei Shimei kü baptü jütük. Sheyü Solomonei lakmongei ongchingü wong kohshi lingteke.