1 ONGPATHÜ 19 - DAÜLANGPÜ LAIHING (BSI)

Elijah Sinai Kahshangei Aongpü

¹ Shaang Ahabi chenyüha Jezebel kü Elijah-i dükpü hatü mekei büpai Baal thibüthü jütükpa, ha jung ejateke.

² Hanangkü Jezebeli Elijah touei phongmokbü shomei, “Ha thibüthü kü nüngi dükpükei ngenyih hapa hepak kü ngei nüng kao nedükjema, kahvangi ngei kao hapakei nevaijü hapa mao nyeishi nyemdükpha” shei e.

³ Elijah-i ha kü nyemei yanglem yemei büpalei chongphobü mütü Judah kahdok Beer-shebalei lüdai. Büpalei chongphobü halei tuhphongtü,

⁴ büpa monha nyih hük lem kü daiyei yingnyü ngoiyei püdhüm hükei uotü ngei didaihüangke shei phop. “Oh Shembüpa, hajük-üng; ngelei yangnyu yahlangtuh; mehenangkü ngelei bühipa mü ngei meheyao meipü nevai” shei e.

⁵ Hapheikü büpa püdhümei lemtü shidai. Ngangahük kü vangsho phongshan hüki büpa kü hongtü, “Paoei hahtuh” shei e.

⁶ Büpai yaakei leiyei veishuohjü büpalei shangjing touei yaongsham shangei lingtükpü aan hük, hatü yungshong kü yung shihtü chongjateke. Büpai hapa hahyingtü shao lemdai.

⁷ Shembüpalei phongshan shao nyipabü büpa touei peiyei büpa kü hongtü phukei, “Paotuh hatü hahyingtuh, hei nevaijema tailu yenlem kü nüng tok vaihen” shei e.

⁸ Büpa paoei hahyingtü hapa hahpü wongi Kahvang Kahshang, Sinai thahshi nyih pinyi ya pinyi dai.

⁹ Halei büpa yaongsha hükei shüei ha ya paümteke. Ngangahük kü Shembüpai büpa kü, “Elijah, nüng hatouei mehe lingnya?” shei phe.

¹⁰ Büpai jangei, “Ngeiyü Shembüpa, Jeiyong Kahvangei men kü longi nyakeikenpü shennyak, shejao Israel ami nüng mü vangeishuwpü yaktük; nüngei moidüthü benei yaktük, hatü nüngei thibüthü peü jütük, shaangü ngei mon aopü khih, hatü shaang jomi ngeiyao jütüknüng yemnyüke” shei e.

¹¹ Shembüpai büpa kü, “Vamtuh hatü Shembüpalei Kahshangei yaongtuh; mehenangkü Shembüpa hatou peih-ei daikahen” shei e. Hahepak kü longi wong kohshi vanglük lükei kahshangthü bhaoei yaongnyüthü khih mü bhaokteke, shejao hapa vanglükei Shembüpa nenyu. Vanglük lükpheikü shao pedi vük, shejao haleiyao Shembüpa nenyu.

¹² Pedi vükpheikü aw vam, shejao haleiyao Shembüpa nenyu. Aw vampheikü inyainyiami ngeü hük vamei nümei e.

¹³ Mechem Elijah-i ha danpa, büpai ashak shüei anei dhe kü jümtü vamei yaongsha shadenei yaong. Hahepak kü ngeü hüki büpa kü, “Elijah, nüng hatouei mehe lingnya?” shei phe.

¹⁴ Büpai jangei, “Ngeiyü Shembüpa Jeiyong Kahvangei men kü longi nyakeikenpü shennyak, shejao Israel ami nüng mü vangeishuwpü yaktük, nüngei moidüthü benei yaktük, hatü nüngei thibüthü peü jütükteke. Shaangü ngei mon aopü khih, hatü shaang jomphongi ngeiyao jütüknüng yemnyüke” shei e.

¹⁵ Hahepak kü Shembüpai büpa kü, “Damaska yopai leipü chingnyülei nyokei leituh, hatü chingnyülei peiyei Aram kahdokei ong vaihen Hazael jetuh.

¹⁶ Shao Israel kü ong vaihen Nimshilei cheha Jehu jetuh, hatü Abel-Meholah leipü Shaphatei cheha Elisha nüng nangjeiyei thibü vaihen jetuh.

¹⁷ Hazael toueipü nyaiyei yangpüthü Jehu-i jühen, hatü Jehu toueipü nyaiyei yangpüthü Elisha-i jühen.

¹⁸ Shejao Israel kü Baal kahvang kü aümei nekhümpü, hatü jomphongei jui hapa kü nejüppü jom haja nyet yangei tuhhen” shei e.

Elisha kü Nyükpü

¹⁹ Hanangkü Elijah hatoueipü daiyei Shaphatei cheha Elisha pongteke. Halei mohohbaong jora anpünyi han hokei chongjateke, hatü büpayü shompü anpünyipabü mohoh mütü han hokei nyuteke. Elijah-i büpa touei heihtü büpalei ashaki büpa kü ümteke.

²⁰ Hahepak kü Elisha-i mohoh yakphongtü Elijah pheikü mokei daiyei, “Ngei onyü hi opa nyi kü om kü jüptü nyu-e shei ephongtü nüng pheikü müküshah” shei e. Elijah-i jangei, “Leituh, ngei nüng kü tah shei ne-enyih” shei e.

²¹ Hanangkü Elisha-i büpa tuhphongtü leiyei büpai mohohbaong nyi yah-ei jü, hanshong deanei aw jaktü phai cheüei nanglakthü kü shuoh, hatü jomi ha hah. Hapheikü büpai Elijah pheikü müei dai, hatü büpalei chongphobü leiteke.