1 ONGPATHÜ 18 - DAÜLANGPÜ LAIHING (BSI)

Elijah hatü Baal Kahvangei Thibüthü

¹ Hepak longi daipheikü, vang nekeipü vangbong jempabü kü Shembüpalei shah Elijah touei pei: “Daituh hatü nüng Ahab ongpa touei peituh, hatü ngei vang keihühen” shei e.

² Hanangkü Elijah-i Ahab touei peihen layaongei dai. Shaang Samarialei aeipülepü longi mangshi nyuteke.

³ Ahabi ongshem kü veibü Obadiah kü nyük. (Obadiah-ü Shembüpa kü longi dhüm shuohshi vaipü shennyak hük nyuteke.

⁴ Mechem Jezebeli Shembüpalei thibüthü jütükpa, Obadiah-i thibüthü kho hük müei daiyei yaongsha nyi kü pinyipüan baong shüshihtü jotük, hatü hahying shuohteke.)

⁵ Ahabi Obadiah kü, “Kahmük kü yunglok vamshing, hatü yungyen peü kü jenei yemhimakthü neditükhen shingvaishi jenei koyei hatü gaduthü kü ühhen phenha dangülashang yemnüng daituh” shei e.

⁶ Hanangkü jijinyi-i kahmük hanteitü dai; Ahab monhai lem hük kü, hatü Obadiah monhai lem hük kü shei dai.

⁷ Obadiah lemei daishingkü Elijah mü pongtei, hatü Obadiah-i büpa nyingei aümei shatü, “Ngelei shembü Elijah, hayü hingmei nüng hiang?” shei phe.

⁸ Elijah-i, “Ngeiyü Elijah hih” shei jang. “Ngei hamü nyüke shei leiyei nüngei shembü ongpa kü eyeishuoh” shei e.

⁹ Obadiah-i, “Nüngei chongphobü ngei Ahabi nyemjütük shei büpalei lak kü lanei shuohhen mü ngei mehe nejiüpü dükphopa?” shei phe.

¹⁰ Shembüpa, nüngei vanyangyem Kahvangei men kü enyeih; nüng yemnüng ngelei shembü ongpai shennyak neshompü mepa jat nevaijü mepa ongchingao neshiüpih, hatü mechem jomi, “Büpa halei nenyu” shei eshuohhenshang büpai hapa jat nevaijü ongching kü, “Hami nüng ne-eeangpih” shei vangeishuwei ehampü vaai.

¹¹ Shejao nüngi shaang ngei kü, “Leiyei nüngei shembü kü Elijah hamü nyüke” shei eyeishuoh shei enyüke.

¹² Ngei nüng toueipü leidaihinüng Shembüpalei laanghai ngei nenyingpü shingei nüng müei lüdaihen; ngei leiyei Ahab kü ha eshuohhen, hatü büpa peijü nüng nenyujema, büpai ngei jütükshasha khih. Nüngei chongphobü ngeiyü hashih mebü Shembüpa kü dhüm shuoh-ei khümei longpeih.

¹³ Mechem Jezebeli Shembüpalei thibüthü jütükkempa, ngei Shembüpalei thibüthü kho hük müei daiyei yaongsha nyi kü pinyipüan baong johütü hahying üh-ei angpü ngelei shembü kü üpaiyao ne-ephaangpü je?

¹⁴ Shejao shaang nüngi ngei kü, “Leiyei nüngei shembü kü Elijah hamü nyüke shei ehen epeyü büpai ngei jütükshasha hih” shei e.

¹⁵ Elijah-i büpa kü, “Ngei chongphopü vanyangyem Shembüpalei men kü ngei enyeih, hingmei shinnyih ngei büpa mü ponghen hih” shei e.

¹⁶ Hanangkü Obadiah-i Ahab ongpa touei leiyei büpa kü ha eshuoh, hatü Ahabi Elijah mü pongteinüng heih.

¹⁷ Mechem Ahabi Elijah eepa, Ahabi büpa kü, “Israel kü shanghah shuohbü, hayü nüng je?” shei e.

¹⁸ Elijah-i jangei, “Ngei Israel kü shanghah neshuoh-angpih, shejao ampa anji-i khihma; mehenangkü nüngi Shembüpalei shahkungthü yakphongtü Baal kahvang phei müteke.

¹⁹ Hanangkü shaang ngei mü Karmel Kahshangei pongteihen shingvaishi Israel am peü kü nyükkütuh, hatü Jezebelei nükdülei hahyingpü Baal kahvangei thibüthü jom kho ali mü pinyipüan, hatü Asherah nyüha kahvangei thibüthü jom kho ali omshi nyükkei” shei e.

²⁰ Hanangkü Ahabi Israel am peü, hatü thibüthü peü Karmel Kahshangei nyükei thaihü.

²¹ Elijah-i nanglakthü touei heihtü, “Hepak meshük mong nepheni deihpü lem nyi aa kü nyuhenang? Shembüpayü Kahvang hih shei deihjema, büpa phei mütuh; shejao Baal-ü kahvang hih shei deihjema, büpa phei mütuh” shei e. Shejao nanglakthüi shah phahükao ne-e.

²² Hahepak kü Elijah-i nanglakthü kü, “Shembüpalei thibü-ü ngei monha aopü khih; shejao Baal kahvangei thibüthü-ü kho ali mü pinyipüan nyüke.

²³ Mohohbaong nyi deikei; jomphongi jom shingvaishi hük nyemjehah, hatü hapa jüei khih mü dehtü awbhaong shangei nyemhaü, shejao hapa kü aw nyemnejak. Ngeiyao mohohbaong hükpa yah-ei hapakei linghen, shejao ngeiyao aw nejakhen.

²⁴ Hapheikü Baal kahvangei thibüthüi jomei kahvangei men kü nyemphop, hatü ngeiyao Shembüpalei men kü phophen. Mepa Kahvangi aw shomei hapa moila hahkahenshang, büpayü Kahvang” shei ehen. Hahepak kü nanglakthü peüi, “Nüngi epü ha jiüangke” shei e.

²⁵ Hahepak kü Elijah-i Baal kahvangei thibüthü kü, “Amphong longi nyupü nangkü mohohbaong hük yah-ei amphongi shong lingtuh. Ammei kahvangei men kü phoptuh shejao hapa kü aw tejak” shei e.

²⁶ Hanangkü jom shuohpü mohohbaong yah-ei hapakei ling, hatü jomphongi Baal kahvangei men kü dhom kübü om dhüshi, “Oh Baal kahvang, hami phoppü kü jangshih!” shei phop. Shejao meheyao jangpü neshiü; üpaiyao nejangshuoh. Jomi linghahpü moidü shinei phauktei.

²⁷ Hamhah pheikü Elijah-i jomphong kü yaüeilungei, “Wong mü phoptuh” shei e. “Hingmei büpayü kahvang! Üpai nyingpa, büpayü mong nga-ei shah deihhah-ei shiühen, nevaijü büpa nang nekoh-i shiühen, nevaijü büpa dipükei shidaipü vaihen phukeishuoh” shei e.

²⁸ Hanangkü jomi wong mü lenei phop, hatü jomei vanglem keiha jomei büm kü longkhoih-i vetei adaüpi hümmei büm kü iy mangyen thahshi phop.

²⁹ Hamhah hepak peihdaijao jomi nedoh-i om kü moila shuohpü hepak thahshi teteivanei, leneiwongei phop, shejao jangpü nepei; ngeü hükao nedan.

³⁰ Hahepak kü Elijah-i nanglakthü peü kü, “Ngei yopailei heihkei” shei e, hatü nanglakthü peü büpa yopailei heih. Mangtüktü nyupü Shembüpalei moidü büpai ling.

³¹ Shembüpai Jakob kü, “Nüngei menü Israel shei nyükhen” shei epü keiha Jakobei hapeüthü shemdep ieyei shing hükbaong heshap Elijah-i yaong anpünyi yah-ei,

³² büpai Shembüpalei men kü moidü ling, hatü yung dok anpünga hükshing chahen mü hapa shinei kahdok sho.

³³ Büpai pü daong, hatü ha shangkü mohohbaong khih mü dehtü haü. Hapheikü büpai jomphong kü, “Düknyü longpü ali kü yung maei shihtuh, hatü ha yah-ei moila hatü püdaong kü langeishuoh” shei e.

³⁴ Shao büpai, “Nyipabüao shao langeishuoh” shei e, hatü jomi hapakei dük. Shao büpai, “Jempabü-ao langeishuoh” shei e, hatü jomi hapakei dük.

³⁵ Hapa moidü shinei yung madai, hatü kahsha-ao madai.

³⁶ Moila shuohpü hepak kü Elijah thibüi moidü touei heih, hatü phopei, “Oh Shembüpa, Abraham, Isak hatü Jakob Kahvang, nüngü Israel Kahvang, hatü ngeiyü nüngei chongphobü, hatü nüngi epü nangkü hathü dükpeih shei shinnyih nyinghütuh.

³⁷ Ngei phoppü kü jangshih, Oh Shembüpa, ngei phoppü kü jangshih, shejüang hapa nanglakthüi, Oh Shembüpa, nüngü Kahvang, hatü jomphongü nüng touei lepei leinyu khih shei nyinghen” shei e.

³⁸ Hahepak kü SHEMBÜPAleipü aw yiüei hapa moila, pü, yaong hatü kahdokao omei hah, hatü kahsha leipü yung dangkao laiyeilungei hahtük.

³⁹ Mechem nanglakthü peüi hapa eepa, jomi kahdokei doei shatü lenei, “Shembüpa, büpayü Kahvang! Shembüpa, büpayü Kahvang!” shei e.

⁴⁰ Hahepak kü Elijah-i, “Baal kahvangei thibüthü yeptuh; hathü hükao aoei tetuh” shei ngeükhüam shuoh. Hanangkü nanglakthüi hathü yep, hatü Elijah-i hathü peü Kishon Kahjilei müei yiüei jütükkem.

Ühivanpü Dohdaipü

⁴¹ Elijah-i Ahab kü, “Leituh, hatü hahyingtuh, mehenangkü vang longi keihen ngeü dannyüke” shei e.

⁴² Hanangkü Ahab hahyinghen leidai, shejao Elijah-ü Karmel Kahshangei aongei kahdokei aümei shatü lashüh nyi aa kü dhe ittü nyu.

⁴³ Büpai büpalei chongphobü kü, “Aongei yungching philei veihü” shei e. Büpai aongei veitü, “Meheyao neshiü” shei e. Ha hepak kü büpai, “Shao nyetpa aongei veihü” shei e.

⁴⁴ Nyetpabü kü büpai, “Phum temhük shennyakei lak shük yungching leipü vamkünyüke” shei e. Hanangkü Elijah-i, “Heihtuh, hatü Ahab kü vangi yepei nüng neleiaokmang kü koyei khari kü uoei leidaituh shei etuh” shei e.

⁴⁵ Maani angphei kü phumshang kü phumnyaki jüm, hatü vanglük lükei vang longi kei. Ahabi koyei khari kü uotü Jezreel yemei leidai.

⁴⁶ Shejao Shembüpalei ngan Elijah kü pei, hatü büpai büpalei ashak shüng kü wongei hintü Jezreel thahshi Ahab she yeiyei mok.