1 ONGPATHÜ 17 - DAÜLANGPÜ LAIHING (BSI)1 Shaang Gilead kahdok Tishbe leipü Tishbe am Elijah-i Ahab kü, “Shembüpa, ngei chongphopü vanyangyem Israel Kahvangei men kü ngei lemhük kei mange thahshi bong shohük vang nevaijü nyien nevüküpih” shei e. 2 Shembüpalei shah büpa touei peiyei, 3 “Hatoueipü daituh, hatü heong philei nyokei leitü Jordan heongphi Kherith yungyenei joshi nyutuh. 4 Nüngi yungyen leipü yung yingtuh, hatü nüng kü ashathüi halei hahying ühhen ngei ngeükhüam shuohtepih” shei e. 5 Hanangkü Shembüpai epükei büpai dük. Büpai Jordan heong philei Kherith yungyenei daiyei halei nyu. 6 Asathüi büpa kü aan, hatü phai dhom hi om kü leiyei shuoh, hatü büpai yungyen leipü yung yingei nyu. Zarephath Leipü Vaümnyü 7 Kahdok kü lanshei vang nekeipü nangkü nyih maani angpheikü yungyenao jepdai. 8 Hahepak kü Shembüpalei shah büpa touei peiyei, 9 “Nüng shao Sidon kahdok Zarephathlei heih-ei nyutuh. Halei nyupü vaümnyü hüki nüng kü hahying ühhen ngei ngeükhüam shuohtepih” shei e. 10 Hanangkü büpa Zarephathlei heih. Mechem büpai hapa jila penyüsha ngoijapa, vaümnyü hük hangha püshow thaihah-ei nyuteke. Büpai pinnyü kü nyüktü, “Ngei yingnüng dük kü yung maani shihtü deishih” shei e. 11 Pinnyüi hapa deijanüng heihjajü büpai pinnyü kü nyüktü, “Nüngei lak leipü aanao deikei” shei e. 12 Shejao pinnyüi, “Shembüpa, nüngei Kahvangei men kü enyeih, lingtükpü aan sheiyü neshiüpih; dük hükei atta aan lakpaoh hük mon, hatü shong hükei mainga maani mon nyüpeih. Hapeü henjinyi-i hapa aan lingei hahtü didaihen shei deihshi aan linghen pü yahnyüpeih” shei e. 13 Elijah-i pinnyü kü, “Nüng mongteshang. Shemei leiyei nüngi epükei düktuh; shejao shongei ngei kü shong hapa aan maani yah-ei lingtü ngei kü yahshih; hapheikü mon anha anji shing linghahtuh. 14 Mehenangkü Shembüpa, Israel Kahvangi, ‘Shembüpai kahdok kü vang nyipabü mangkeihü thahshi hapa aandük kübü aan nekemhen, hatü hapa mainga shong kübü mainga nekemdaipih’ shei ephopeih” shei e. 15 Elijah-i epükei hapa vaümnyüi leiyei dük. Hanangkü Elijah hatü vaümnyü hatü jomei shemong shingvaishi nyihjeih hahying changshi dang. 16 Mehenangkü Shembüpalei shah Elijah thibü homei epükei hapa aandük leipü aan mechemao nekem, hatü mainga shong mechemao ne-üdai. 17 Nyih maani daipheikü hapa shem shembü vaümnyülei cheha tüng. Büpa din wongpüba wongpüba heih-ei shomshi büpa di. 18 Pinnyüi Elijah kü, “Oh Kahvang shennyak, nüngi ngei kü mehe kü khünya? Ngelei mang deih-ei danghühen, hatü ngelei hapeü jütükhen shei nüngü peiküpü je?” shei e. 19 “Anha ngei touei deikei” shei Elijah-i jangei e. Büpai hapa naü pinnyülei shüngdok shangeipü yah-ei paümtü büpa paümteipü dung-am shangpalei anei büpalei lüngei lemhü. 20 Büpai Shembüpa kü lenei, “Oh Shembüpa ngelei Kahvang, ngei nyupü vaümnyü am kü dangkao cheha dihüei hapa keipü shanghah mehekei shuohnya?” shei e. 21 Hatü büpai jempa thahshi hapa naü kü chetei lemtü Shembüpa kü lenei, “Oh Shembüpa ngelei Kahvang, hapa naü yem leihüshih” shei e. 22 Shembüpai Elijah-i lenpü dan, hatü hapa naü shao yem leihü. 23 Elijah-i hapa naü müei chenyü touei chongei shüh-ei pinnyü kü, “Veituh, anha yem leiteke” shei e. 24 Hanangkü hapa vaümnyüi Elijah kü, “Nüngü Kahvang shennyak khih, hatü nüngei ju kübü Shembüpalei shah-ü shahhing khih shei shaang nyingteke” shei e. |
Phom Naga Bible - DAÜLANGPÜ LAIHING
Copyright © 2005 by The Bible Society of India
Used by permission. All rights reserved worldwide.
Bible Society of India