1 ONGPATHÜ 16 - DAÜLANGPÜ LAIHING (BSI)

¹ Hahepak kü Baasha khüei Shembüpalei shah Hananilei cheha Jehu homei pei;

² “Ngei nüngü bhihla kübü homei yah-ei ngelei nanglak Israel amei mübü leihüpeih, shejao nüngi Jeroboamei lemthü kü kamei ngelei nanglak Israel am mang thahhü, hatü jomei mangi ngei mongshihhüteke.

³ Hanangkü ngei Nebatei cheha Jeroboam am shem kü dükpü keiha ngei Baasha am shemao li hümtükhen.

⁴ Baasha am shem chingei dipüthü peü shi-i hahkemhen, hatü phaühihaolei dipüthü peü asha alang phai vaihen” shei e.

⁵ Baasha-i dükpü douthü, hatü büpalei wong douthü kemei Israel Ongthülei Büshah Laitap kü nyangei nyüpeih.

⁶ Baasha di, hatü Tirzahlei mahng vü. Büpalei cheha Elah-i büpa kü jeiyei ong vai.

⁷ Nyeinya vaishi Baasha hatü jom shem khüei Shembüpalei shah Hananilei cheha Jehu thibü homei pei. Büpa shekü Jeroboam ongpai dükpü keiha büpai Shembüpa touei mang dükei Shembüpa mongshihhüpü mon nevai, shejao büpai Jeroboam am shem kemei jütük.

Israel Ongpa Elah

⁸ Judah kü Asa-i ong vaipü vangbong hapüvokpabü kü Baashalei cheha Elah-i Israel kü ong vai, hatü büpai Tirzahlei vangbong nyi thahshi ong vaiteke.

⁹ Shejao büpalei koyei kharithü hükkeishing kü veipü büpalei lakchongbü Zimri-i büpa khüei yaong. Hahepak kü Elah-ü Tirzahlei yiüi chokei Tirzah ongshem kü veibü Arza am shemei nyu.

¹⁰ Judah kü Asa-i ong vaipü bong hapünyetpabü kü Zimri peiyei büpa kü baptü jü, hatü büpa ong vai.

¹¹ Büpa ong uoshing kü uoei vanglem lemei panghinüng büpai Baasha am shem kemei jü. Büpai shem am vaijao küphü vaijao baha hükao ne-aophongi jütük.

¹² Hapa keiha Shembüpalei shah Baasha khüei Jehu thibü homei epü keiha Zimri-i Baasha am shem kemei jü;

¹³ mehenangkü Baasha hatü cheha Ela nyi-i thahpü mang homei, hatü hapai Israel am peü jomei lajeithü homei mang thahhüei Shembüpa, Israel Kahvang mongshih vamhü.

¹⁴ Elah-i vanglem lempü, hatü büpai dükpü douthü peü Israel Ongthülei Büshah Laitap kü nyangei nyüpeih.

Israel Ongpa Zimri

¹⁵ Judah kü Asa-i ong vaipü vangbong hapünyetpabü kü Zimri-i Tirzahlei nyih nyet mon ong vai. Israel veshanthüi Philistia kahdokei Gibbethon chingnyü shümei nyuteke.

¹⁶ Mechem Zimri-i ongpa khüei yaongei büpa jütükteke shei baümtapei nyupü Israel ami danpa, jomphongi ha nyih-üng baümtapei nyupü veshan mübü Omri-i Israel kü ong vaihen je.

¹⁷ Hapheikü Omri hatü büpa mü nyupü Israel am kemei Gibbethon leipü leiyei Tirzah shümteke.

¹⁸ Mechem Zimri-i chingnyü-ü yahlangteke shei nyingpa, büpai ongshem mongpalei shüei ongshem kü awi haptü büpa-ao hapa mongei di.

¹⁹ Hapayü büpai Shembüpa touei nemeipü dükei, Jeroboamei lemthü kü kamei, hatü büpai thahpü mangi Israel amao mang thahhüpü manglat kü diteke.

²⁰ Zimri-i dükpü douthü, hatü büpai khüei yaongpü jung peü Israel Ongthülei Büshah Laitap kü nyangei nyüpeih.

Israel Ongpa Omri

²¹ Hahepak kü Israel nanglakthüyü khong nyi vaishi hantü nyu; nanglak hükkei shingi Kinahlei cheha Tibni ong vaihühen khe, hatü khong hükkei shingi Omri kü sheüh.

²² Shejao Kinahlei cheha Tibni phei müpüthü leimeyü Omri phei müpüthü wong kohpüba nyuteke. Hanangkü Tibni mah, hatü Omri-i ong vaiteke.

²³ Hanangkü Judah kü Asa-i ong vaipü bong hapüanpühükpabü kü Omri-i Israel kü ong vai. Büpai bong anpünyi ong vai. Shongpü bong vokü Tirzahlei nyuei ong vaiteke.

²⁴ Büpai Shemer leipü ngin haja vok shuohtü Samaria kahshang shakteke. Omri-i hapa kahshang kü chingnyü ling, hatü büpai hapa kahshang kü Samaria shei shongpü hapa kahshangei shembüpalei men menteke.

²⁵ Omri-i Shembüpa touei mang longi dük; büpa shekü nyupüthü peü mü büpai nyeishi mang dük.

²⁶ Lajeithü homei mang thahhüpü Jeroboamei lemthü, hatü büpalei mangthü phei mü, hatü hapai Shembüpa, Israel Kahvang mongshihhü.

²⁷ Omri-i vanglem lempü, hatü büpai dükpü douthü peü Israel Ongthülei Büshah Laitap kü nyangei nyüpeih.

²⁸ Omri di, hatü Samarialei chebü chepalei mahngchongei vü. Büpalei cheha Ahabi büpa kü jeiyei ong vai.

Israel Ongpa Ahab

²⁹ Judah kü Asa-i ong vaipü bong hapüanpüshetpabü kü Omrilei cheha Ahabi Israel kü ong vai, hatü büpai Samarialei Israel kü bong hapünyi thahshi ong vai.

³⁰ Omrilei cheha Ahabi büpa shekü nyupüthü peü mü nyeishi Shembüpa touei mang thah.

³¹ Büpai Nebatei cheha Jeroboamei lemthü kü kampü mongnehami büpai Sidon ongpa Ethbaalei yiükha Jezebel mü shem yem, hatü Baal kahvang chongphoei khüm.

³² Büpai Samarialei Baal kahvang kü khümhen vepü khümshemei Baal kahvang kü moidü hük ling.

³³ Ahabi büpa she kübü Israel ongthüi dükpü mü nyeishi büpai Asherah nyüha kahvangei lajei ling, hatü hapai nyeinya Shembüpa, Israel Kahvang mongshihhü.

³⁴ Ahabei hepak kü Bethel am Hieli Jeriko ching ag, hatü Shembüpai Nunei cheha Joshua homei epükei büpai hapa ching chongnyiam yaong haüshingkü hashongpa Abiram lomohhü, hatü büpai hapalei penyüsha lingshingkü naüshompa Segub lomohhü.