1 ONGPATHÜ 15 - DAÜLANGPÜ LAIHING (BSI)

Judah am Abijah Ongpa

¹ Nebatei cheha Jeroboami ong vaipü bong anpüshetpabü kü Abijah-i Judah kü ong vai.

² Büpa Jerusalemei vangbong jem thahshi ong vai. Büpalei chenyü-ü Abishalomei yiükha Maakah nyu.

³ Büpa shekü chepai dükpü mang kemei büpai dük, hatü chebü Davidi dükpükei nevai-i büpalei mongdang kempai Shembüpa, büpalei Kahvang kü hingnelem.

⁴ Shejoong Davidei men kü Shembüpa büpalei Kahvangi büpa kü jeihen, hatü Jerusalem wong koh-ei linghen shingvaishi hapeü hük shuoh.

⁵ Mehenangkü Davidi mepa Shembüpalei mük kü mei, ha dük, hatü Hit am Uriahlei nang mü lenei büpalei den kemei Shembüpalei shahkung neshai-i dük.

⁶ Rehoboam hi Jeroboam nyi aa kü chongpangpü vehok Abijahlei den kemei nedoh-i heihteke.

⁷ Abijah-i vanglem lempü, hatü büpai dükpü douthü kemei Judah Ongthülei Büshah Laitap kü nyangei nyüpeih. Abijah hi Jeroboam nyiyao hokteke.

⁸ Abijah di, hatü David Chingnyülei chebü chepalei mahngchongei vü. Büpalei cheha Asa-i büpa kü jeiyei ong vai.

Judah am Asa Ongpa

⁹ Israel kü Jeroboami ong vaipü vangbong kukhapabü kü Asa-i Judah kü ong vai,

¹⁰ hatü büpai Jerusalemei bong pinyipü hük thahshi vanglem lem. Büpalei chebilei menü Abishalomei yiükha Maakah nyu.

¹¹ Chebü Davidi keiha Shembüpa touei mehe jiü, Asa-i ha dük.

¹² Büpai khümshingei büm yupü bahathü kemei changtük, hatü chepai lingpü lajeithü kemei yaktük.

¹³ Büpai chebi Maakah ongla hümlungnyü vaipü kübüao katitük; mehenangkü pinnyüi jiühitnalaipü Asherah kahvangei lajei ling; Asa-i lajei mangtük, hatü Kidron Kahjilei aw kü jaktük.

¹⁴ Büpai khümshingthü peü nemangtükjao Asa-i den kemei büpalei mongdang Shembüpa kü shuoh.

¹⁵ Chepa jiji-i daüei tuhpü hon hi ngin, hatü douhinangthü kemei Shembüpalei Phopshemei leiyei tuh.

¹⁶ Asa hatü Israel ong Baasha nyi vanglem lempü yangkemei kü vehok hokteke.

¹⁷ Israel ongpa Baasha-i Judah hah, hatü Judahlei daipü leipü kü bonhen shingvaishi Ramahlei penyü showteke.

¹⁸ Hanangkü Asha-i Shembüpalei Phopshem, hatü büpalei ongshem leipü hon hi ngin kemei yah-ei büpalei lakchongbüthü mü Aram ongpa Damaskalei vanglem lempü Hezonei cheha Tabrimmon, Tabrimmonei cheha Ben-Hadad kü,

¹⁹ “Ampa hatü opa am nyupükei ji aa kao vangteishuwteiyei chingmei nyushah. Veituh, ngei nüng kü hon hi ngin thintho shomphünyeih. Hanangkü shaang Israel ongpa Baasha ngei toueipü nyemleidaiphanüng nüngi büpa mü chingmei lingpü mangtükkütuh” shei eshi shah shom.

²⁰ Ben-Hadadi Asa-i epü kü mong, hatü büpalei veshanthü Israel kü chingnyüthü hahhen shom. Büpai Ijon, Dan, Abel Beth-Maakah hatü Khinneroth hatü Naphtali kahdok kemei hahtük.

²¹ Mechem Baasha-i hapa jung danpa, büpai Ramah chingnyü lingpü doh, hatü Tirzahlei leiyei nyu.

²² Hahepak kü Asa ongpai Judah am peü kü ngeükhüam shuoh-ei shennyak hükao ne-aami daiyei Baasha-i noteipü Ramah leipü yaong hatü tauktathü peü shetei leidai; hapa yah-ei Asa ongpai Benjamin kahdok leipü Geba hatü Mizpah nyi ling.

²³ Shaang Asa-i vanglem lempü, büpai dükaokpü douthü, hatü büpai lingpü chingnyüthü peü kemei Judah Ongthülei Büshah Laitap kü nyangei nyüpeih. Büpa viüpa leiyei nyushingkü büpalei la kü din nemeipü vam.

²⁴ Hapheikü Asa di, hatü büpa chebü chepalei mahngchong kü chebü Davidei Chingnyülei vü. Büpalei cheha Jehoshaphati büpa kü jeiyei ong vai.

Israel Ongpa Nadab

²⁵ Judah kü Asa-i ong vaipü vangbong nyipabü kü Jeroboamei cheha Nadabi Israel kü ong vai, hatü büpai Israel kü vangbong nyi mon ong vai.

²⁶ Chepalei lemthü kü kamei büpai Shembüpa touei mang thah, hatü hapa mang Israel amiyao thahhü.

²⁷ Issakhar am jat Ahijahlei cheha Baasha-i büpa khüei yaong, hatü Baasha-i büpa Philistia kahdok Gibbethonlei jü; mehenangkü Nadab hatü Israel am kemei Gibbethonlei büpa kü shümteke.

²⁸ Hanangkü Baasha-i Judah kü Asa-i ong vaipü vangbong jempabü kü Nadab jü, hatü büpa kü jeiyei ong vai.

²⁹ Büpa ong vaihinüng büpai Jeroboam am shem hükao yemmü netuh-i Shembüpalei shah Shiloh am Ahijah thibü homei epü keiha jütükkem;

³⁰ mehenangkü hapayü Jeroboami mang thah, hatü Israel amao thahhü, hatü Shembüpa, Israel Kahvang mongshihhüpü nangkü ha vamteke.

³¹ Nadabi vanglem lempü, hatü büpai dükpü peü Israel Ongthülei Büshah Laitap kü nyangei nyüpeih.

³² Asa hi Baasha nyi ong vaipü yangkemei kü jiji aa kü hokei mon nyuteke.

Israel Ongpa Baasha

³³ Judah kü Asa-i ong vaipü vangbong jempabü kü Ahijahlei cheha Baasha-i Tirzahlei Israel am peü shak kü ong vai, hatü büpa vangbong hapüali thahshi vanglem lem.

³⁴ Büpai Jeroboamei lemthü kü kamei büpai Shembüpa touei mang thah, hatü Israel amao mang thahhüteke.