1 ONGPATHÜ 14 - DAÜLANGPÜ LAIHING (BSI)

Jeroboamei Cheha Dipü

¹ Hahepak kü Jeroboamei cheha Abijah tüngteke.

² Jeroboami chenyüha kü, “Nüng kü Jeroboamei chenyüha khih shei üpaiyao nenyingaokhen mü owyeiowya temtü Shilohlei heihtuh; mehenangkü ngei kü, ‘Nüng nanglakthü shak kü ong vaihen khih’ shei ephopü Ahijah thibü halei nyüpeih.

³ Nüngi büpa kü aan pha an mü nyahjiü dük hük yahtü büpa touei heihjatuh, hatü naü mekei vaihen büpai ephahen” shei e.

⁴ Hanangkü Jeroboamei chenyühai büpai epükei dük; pinnyüi Shilohlei nyupü Ahijahlei shemei pei. Shaang, Ahijah-ü behe leidaipü nangkü mük pumdaitü meishi ne-eeaoki nyu.

⁵ Shejao Shembüpai Ahijah kü, “Cheha tüngpü nangkü mekei vaihen khih shei nüng kü phehahnüng Jeroboamei chenyüha peikünyüke. Nüngi pinnyü kü hapakei eyeishuoh” shei e. Mechem Jeroboamei chenyüha büpa ngoijapa, pinnyü nevai-i mih lebü nyüha hük keiha lingteke.

⁶ Shejao mechem Ahijah-i pinnyü shadenei shüjapü la ngeü danpa, büpai, “Jeroboamei shembünyü shükei; nüngü mih lebü kei lingtüktü mehekei peikünya? Nüng shing shahjang nemeipü hük nyüpeih.

⁷ Leituh, hatü Jeroboam kü, ‘Shembüpa, Israel Kahvangi hapakei enyüke shei etuh: Ngei nüngü nanglakthü khong kübü jeyei ngaiyei ngelei nanglak Israel shak kü mübü hük leihüpeih,

⁸ hatü nüng kü shuohhen shingvaishi David am phang kübü ongching shaaktükpeih, shejao nüngü ngelei shahkungthü dükpü, mong kempai ngei phei müpü, hatü ngei touei jiüpü dükpü ngelei chongphobü David kei nevaiang,

⁹ shejao nüng she kübü vanglem lempüthü peü mao nüngi-üng longpü mang thahteke, hatü ngei ngaümpheilei yakphongtü lebü kahvangthü, hatü lajeithü lingei ngei mongshihhü.

¹⁰ Hanangkü ngei Jeroboam am shem kü shanghah koei peihen. Ngei Israel kü Jeroboam am shem kübü baha hapeüthü longpü maanpü, hatü aa, hatü bümeithü kemei jütükhen. Ngei Jeroboam am shem mangsho thahshi nyüphinya jakpükei jaktükhen.

¹¹ Jeroboam am shem hanei-i chingei dijema, shi-i hapa mahng hahhen, hanei-i phaühihaolei dijema, asha alang phai vaihen shei Shembüpai enyüke’ shei etuh” shei e.

¹² Hanangkü layaongei shemei leituh. Mechem nüngi chingei lakham jaaiyei shüjahenshang naü dikahen.

¹³ Israel am kemei mahng thephen, hatü büpa mahng vühen; mehenangkü Jeroboam am shem kü büpa mon mahngchongei vühen; mehenangkü Jeroboam am shem kü büpa kü monha Shembüpa, Israel Kahvangi mongongbenüng lemhük nyüke.

¹⁴ Shembüpai büpa kü jeiyei Israel kü ong hük vamhühen, hatü büpai shinnyih, shaang-üng Jeroboam am shem kemei jütükhen.

¹⁵ Shembüpai Israel am kü bheihen, hatü yungei pingu jenlenpükei nyuhen. Büpai chebü chepa kü shuohpü hapa meipü kahdok kübü bhitükhen, hatü Euphrates yung homei haitükkemhen; mehenangkü jomi Asherah nyüha kahvangei lajeithü lingpü nangkü Shembüpa mongshih.

¹⁶ Jeroboami thahpü büpalei mang hatü Israel am kao hapa mang thahhüpü nangkü Shembüpai Israel am yakphonghen shei e.

¹⁷ Hahepak kü Jeroboamei chenyüha layaongei Tirzahlei lei. Pinnyü shakung lanei shühinüng naü diteke.

¹⁸ Shembüpalei shah büpalei chongphobü Ahijah thibü homei epü keiha Israel am kemei büpa kü mahng thep, hatü büpa mahng vü.

¹⁹ Shaang Jeroboami dükpü douthü, mekei büpai hok, hatü vanglem lempa, hathü kemei Israel Ongthülei Büshah Laitap kü nyangei nyüpeih.

²⁰ Jeroboami bong hapünyi thahshi vanglem lemtü büpa di, hatü vü, hatü büpalei cheha Nadabi büpa kü jeiyei ong vaiteke.

Judah am Rehoboam Ongpa

²¹ Shaang Solomonei cheha Rehoboami Judah kü ong vai. Mechem büpa ong vaipa, büpalei nyübüh vangbong pinyipü hük nyu, hatü büpai Shembüpalei men kü khümhen Israel jat peü khong kübü jepü Jerusalem Chingnyü kü vangbong anpünyet thahshi vanglem lem. Büpalei chenyü-ü Ammon am Naamah nyuteke.

²² Judah ami Shembüpa touei mehe mang, ha dük; jomei chebü chepai dükpü mao nyeishi dükpü jomei mang homei Shembüpa mongshih vamhü.

²³ Jomphongi jom shing shangtao, hatü püdhüm vungdhüm peü kü khümshing, daülangpü yaong shemnyüthü, hatü Asherah lajeithü ling.

²⁴ Nyeinya vaishi kahmük kü khümshing peülei büm yupü bahathü nyuteke. Israel am toueipü changtükpü jatthüi dükbenüng jiühitnalai mang lemphü jomphongi dük.

²⁵ Jeroboami ong vaipü vangbong ngapabü kü Ijip am Shishak ongpai Jerusalem hahhen aong;

²⁶ büpai Shembüpalei Phopshem, hatü ongshem leipü dounyünangba kemei shetei, Solomoni lingpü hon-iithüao omshi leilang.

²⁷ Hanangkü Rehoboam ongpai ha nangjei laktetnyiami Ii lingtü ongpalei shaden yompü veshan mübüthü kü shuoh.

²⁸ Ongpa phopshemei daishan ieyei kü veshanthüi hapa yah-ei dai, hatü yombüthülei dungei leiyei leiyei tuh.

²⁹ Shaang Rehoboami dükpü douthü kemei Judah Ongthülei Büshah Laitap kü nyangei nyüpeih.

³⁰ Nedoh-i Rehoboam hi Jeroboam nyi aa kü vehok nyuteke.

³¹ Rehoboam di, hatü David Chingnyülei chebü chepalei mahngchongei vü. Büpalei chenyü-ü Ammon am Naamah nyuteke. Cheha Abijah-i büpa kü jeiteke.