1 ONGPATHÜ 13 - DAÜLANGPÜ LAIHING (BSI)

¹ Shembüpai epü nangkü Judah leipü Kahvang shennyak hük Jeroboami moila shuohnüng shei moidü touei yaongshi nyushi aongei Bethel ngoiteke.

² Büpai Shembüpalei shah homei moidü khüei lenei, “Oh moidü, moidü! Shembüpai hapakei enyüke: ‘Shennyak hük Josiah shei mentü David am shem kü bühhen. Nüng shak kü büpai shaang hatouei moila shuohpü khümshingthü leipü ngongpathü jüei moila shuohhen; nüng shak kü hangkulei vangtaothü jakhen’ ” shei e.

³ Ha nyih-üng hapa Kahvang shennyaki nyangeihepü hük shuoh: “Shembüpai epü nyangeihepeyü hapa khih: Hapa moidü nyi anei kadaihen, hatü haleipü depla peü haidaihen” shei e.

⁴ Mechem Jeroboam ongpai hapa Kahvang shennyaki Bethel leipü moidü khüei lenpü danpa, büpai moidü leipü lak haongtü, “Hapa shennyak yeptuh!” shei e. Shejao hapa shennyak lemei haongpü lak neleiaoki haendai.

⁵ Shembüpalei shah homei hapa Kahvang shennyaki shuohpü nyangeihepü keiha moidü nyi anei kadai, hatü haleipü depla peü haidai.

⁶ Jeroboam ongpai hapa Kahvang shennyak kü, “Shembüpa nüngei Kahvang kü ngelei lak meihen shingvaishi phopshih” shei e. Hanangkü hapa Kahvang shennyaki Shembüpa kü phop, hatü ongpalei lak sheleipü keiha meidai.

⁷ Hahepak kü ongpai hapa Kahvang shennyak kü, “Shemei ngei mü leishah, hatü lemhük dangkao hahtuh, hatü ngei nüng kü thintho hük yahphahen hih” shei e.

⁸ Shejao Kahvang shennyaki ongpa kü, “Nüngi ngei kü nüngei mophimo hükkei shing bhaoei yahphüjao ngei nüng mü neleiküpih, nevaijü hatouei nehahneyingpih.

⁹ Mehenangkü ngei kü Shembüpai, ‘Nüngi meheyao tehahteying, nevaijü ngei daipü lem kü-üng nyokei telei shei ephopeih’ ” shei e.

¹⁰ Hanangkü büpa lebü lemei leidai, shejao büpa Bethelei peipü lem kü nyokei nelei.

Bethel Leipü Thibü Chang

¹¹ Shaang Bethelei thibü chang hük nyuteke. Büpalei hapeüthü leiyei chepa kü Judah leipü thibüi ha nyih Bethelei mehe dük, ongpa kü büpai mehe epa, hathü kemei ejateke.

¹² Chepai jomphong kü, “Büpa melemei lüdaipa?” shei phe. Büpalei chehathüi Judah leipü Kahvang shennyak melemei lüdaipa, ha hushuohteke.

¹³ Hanangkü büpai chehathü kü, “Ngei gadu hük kü müei deituh” shei e. Hanangkü mechem jomphongi büpa müei deihen gadu deijapa, büpa ha kü uo,

¹⁴ hatü hapa Kahvang shennyak phei changei daijashingkü büpa longkhampü phangei uoshi nyuteke. Büpai, “Nüngü Judah leipü Kahvang shennyak je?” shei phe. Büpai, “Hih” shei e.

¹⁵ Hanangkü thibüi büpa kü, “Ngei mü shemei leiyei hahyingshah” shei e.

¹⁶ Kahvang shennyaki büpa kü, “Ngei nüng mü nyokei neleiaokpih, nevaijü hapa shingei hahyinghen neaokpih.

¹⁷ Shembüpai ngei kü, ‘Nüngi halei tehahteying, nevaijü daipü lemei nyokei telei’ shei ephopeih” shei e.

¹⁸ Hahepak kü Bethel leipü thibü changi büpa kü, “Ngeiyao nüng keipü thibü hih. Shembüpalei shah homei vangsho phongshan hüki, ‘Hahyinghen shingvaishi hapa shennyak nüng mü müei leituh’ shei ephopeih” shei e. (Shejao büpai shahshem eshuohteke.)

¹⁹ Hanangkü hapa Kahvang shennyak jom shemei leiyei hahying.

²⁰ Mechem jom nükdülei uoshi nyupa, Shembüpalei shah büpa müei leipü thibü chang touei pei.

²¹ Büpai Judah leipü peipü Kahvang shennyak kü, “Shembüpai hapakei enyüke: ‘Nüngi Shembüpalei shah lühtük, hatü Shembüpa nüngei Kahvangei shahkung nüng kü shuohpü nedükang.

²² Nüng kü tehahteying shei epü shingei nyokei leiyei hahying. Hanangkü nüng mahhen, hatü nüngei mahng ambü ampalei mahngchongei nevüpih’ ” shei e.

²³ Mechem Kahvang shennyak hahyingei tempa, büpa müei leipü thibüi büpalei gadu kü uotü leishih.

²⁴ Büpa lemei leijashingkü mailang hük vamei büpa jü, hatü büpalei mahngü lemei shükshi, hatouei gadu hatü mailang nyiphen yaongshi nyuteke.

²⁵ Peihpü leihpü shennyak hanei-i hatouei mahng shükshi, hatü mahng touei mailang yaongpü eeyei hapa thibü chang nyupü chingei aongei baongeiyaüei eteiteke.

²⁶ Mechem büpa lem leipü müei leipü thibüi hapa jung danpa, büpai, “Hapayü Shembüpalei shah nebangpü Kahvang shennyak khih. Hanangkü Shembüpai büpa kü eshuohpükei, Shembüpai büpayü mailangi shükei jühen shuohpü khih” shei e.

²⁷ Hapheikü büpai chehathü kü, “Ngei gadu kü uoei deituh” shei e., hatü büpai epükei jomi dük.

²⁸ Büpa heihjashingkü gadu hatü mailang nyi tou mü mahng shükshi chongjateke. Mailangi mahngao nehah, gadu kao neshüki nyu.

²⁹ Hanangkü hapa thibüi Kahvang shennyakei mahng homei gadu kü haütü büpa kü mahng thephen, hatü vühen shingvaishi büpa nyupü chingei lei.

³⁰ Hapheikü büpai hapa mahng büpalei mahngchongei vü, hatü jomi büpa kü, “Oh ngelei jeihinaü, ngelei jeihinaüthü!” shei mahng thep.

³¹ Hapa mahng vüpheikü büpai chehathü kü, “Mechem ngei dihenshang, hapa Kahvang shennyak vüpü mahngsha kü ngeiyao vüshih; ngelei vang büpalei vang mü tuhshih.

³² Mehenangkü Bethel leipü moidüthü hatü Samaria jilathü kübü shangtaothü leipü khümshingthü khüei Shembüpalei shah büpai epeyü hingmei vamkahen” shei e.

Jeroboamei Mang

³³ Haphei küong Jeroboami nemeipü mang lemthü kübü mong nelep, shejao nanglak jat peü kübü jiüjiü yah-ei khümshingthülei ngongpathü jeyei tuh. Ngongpa vaihüpüthü peü büpai khümshingthülei chongphohen jeyei tuh.

³⁴ Hapayü Jeroboam am shemei mang, hatü hapai büpalei ongching kahdok shak kübü dohtükpeih.