1 ONGPATHÜ 12 - DAÜLANGPÜ LAIHING (BSI)

Israel ami Rehoboam Khüei Yaongpü

¹ Rehoboam Shekhemei heihteke; mehenangkü Israel am kemei büpa ong vaihühen halei heihteke.

² Mechem Nebatei cheha Jeroboami Solomon ongpa kü nyemei Ijiplei daiyei nyushi hapa jung danpa, büpa Ijip leipü nyokei lei,

³ hatü jomi büpa nyüknüng deishih-ei nyükei lei, hatü Israel am thaipü khong kemei Rehoboam touei peiyei büpa kü,

⁴ “Ampa Solomoni ham kü hanggovih kophopeih, shejao shaang ngaüngei dou dükhüpü kübü hanggovih maani shangtükshih, shejema hami nüng-üng chongphohen hih” shei e.

⁵ Rehoboami jom kü, “Leituh, hatü nyih jem angtü peikei” shei e. Hanangkü nanglakthü leidai.

⁶ Hapheikü Rehoboam ongpai chepa Solomon mü chemi chongphoei nyupü behethü nyükei, “Hathü nanglakthü kü ngei shahnyok shuohhen shingvaishi ammiyao deihpü chudeih mekei ekütuh” shei phe.

⁷ Jomi büpa kü, “Shinnyih nüngi hathü nanglakthü mü chongphobü kei leitü jom chongphojema, hatü jom kü shahmei eyei shahnyok shuohjema, jom düngei nüngei chongphobüthü vaikahen” shei e.

⁸ Shejao Rehoboami büpa kü behethüi eshuohpü shahnying yakphongtü büpa mü büh-ei paümei chemi longpü hatü chongphopü nethethü kü phe.

⁹ Büpai jomphong kü, “Hathü nanglakthüi ngei kü, ‘Ampai ham kü shuohpü hanggovih shangtükshih’ shei phepü kü ngei shahnyok shuohhen ammiyao mekei deih-angke?” shei phe.

¹⁰ Büpa mü chemi longpü nethethüi büpa kü, “Ampai ham kü hanggovih-i chethüpeih, shejao hamei hanggovih shangtükshih shei nüng kü epü nanglakthü kü, ‘Ngelei lakjaangshomhayü opalei shüng mao chetpüba hih’ shei eyeishuoh.

¹¹ Opai am kü hanggovih kohüpeih, shejao ngei ha mü nyeinya vihpüba kohühen. Opai am kü lüngi bheipeih, shejao ngei am kü yiüjikaungkangi kethüei shüveihen” shei eyeishuoh shei e.

¹² Ongpai, “Nyih jem angtü peikei” shei epükei Jeroboam hatü nanglakthü peü nyih jem angtü Rehoboam touei pei.

¹³ Behethüi büpa kü epü shahnying yakphongtü,

¹⁴ nethethüi eshuohpü keiha ongpai nanglakthü kü shaap haüshaüi, “Opai am kü hanggovih kohüteke, shejao ngei hapa mao vihpüba kohühen; opai am kü lüngi bheiteke, shejao ngei am kü yiüjikaungkangi kethüei shüveihen hih” shei e.

¹⁵ Hanangkü ongpai nanglakthüi epü kü nebang; mehenangkü hapa neshetnephen vampeyü Nebatei cheha Jeroboam kü Shembüpai Shiloh am Ahijah thibü homei epü shah jiühühen shingvaishi Shembüpai dükhüpü dou shiüteke.

¹⁶ Mechem Israel ami jomi epü kü ongpai nebangpü eepa, nanglakthüi ongpa kü lenei hapakei e, “Hami David mü mehe phaihan, hatü Jesselei cheha mü mehe mükjüp nyüpa? Oh Israel am, laophülei shemei leidaikemshah! Oh David, ammei shahishem kü mon shaangü veihahtuh!” Hanangkü Israel am shemei leidaikem.

¹⁷ Shejao Judah jilathülei nyupü Israel am shak kü mon Rehoboami vanglem lem.

¹⁸ Rehoboam ongpai dou dükpüthü kü veibü Adoniram shom, shejao Israel am kemei yaongi shükei büpa jütük. Rehoboam ongpa ayük shei yangei koyei khari kü uotü shülangi Jerusalem yemei leidai.

¹⁹ Hapa nyih mü pangei Israel ami David am shem kü khüei nyupeih.

²⁰ Mechem Israel ami Jeroboam nyokei leiteke shei danpa, jomi shah shomei büpa kü khong thaipü touei nyükei Israel am shak kü büpa ong vaihü. Judah jat mon Davidei hühihathü chongphoei nyu.

Shemaiah-i Tetpüvanpü

²¹ Mechem Rehoboam Jerusalemei leipa, büpai Judah hatü Benjamin jat nyi kübü veshan meipüthü jom 180, 000 thahshi jetü Israel jatthü mü khüei hokhen, hatü hapa jatthü shao büpai omei yahlanghen shei deih.

²² Shejao Kahvangei shah Kahvang shennyak Shemaiah touei peiyei,

²³ Solomonei cheha, Judah amei ongpa Rehoboam kü hatü Judah hatü Benjamin nanglakthü kü,

²⁴ “Shembüpai hapakei enyüke: ‘Nüngei jeihinaü Israel am mü hoknüng te-aong. Am peü shemei leidaituh; mehenangkü hapayü ngei dükpü ngelei dou hih ‘shei etuh” shei e. Hanangkü jomphongi Shembüpalei shah kü vaiteke shei deihtü Shembüpai epükei shemei leidai.

Jeroboam Shembüpa Toueipü Yandaipü

²⁵ Hapheikü Jeroboami phaüshang kahmük Ephraimei Shekhem chingnyü kü penyü showtü halei nyu. Haleipü büpa daiyei Peniel jila agteke.

²⁶ Hapheikü Jeroboami büpa nyingi hapakei deih, “Hapa ongchingü David am shemei nyokei leidaihen vaaishang.

²⁷ Hathü nanglakthüi Jerusalemei Shembüpalei Phopshemei moila shuohhen hapakei aongteijema, jomphongi shao Judah am Rehoboam ongpa, jomei shembü kü mong hahdaihen khih. Jomphongi ngei jüphongtepü Rehoboam ongpa touei lepdaihen khih” shei deih.

²⁸ Hapakei deih-ei dangtü ongpai hon yah-ei mohoh cheha nyi ling, hatü büpai nanglakthü kü, “Jerusalemei khümnüng aonghenü amphong kü lem ahshi ludaiteke. Oh Israel am, amphong Ijip leipü müei leipü kahvangthü hatouei nyüke” shei e.

²⁹ Büpai hapa Bethelei hük, hatü Dan kahdokei hük shei tuhteke,

³⁰ hatü hapa dou homei nanglakthü mang thah; mehenangkü nanglakthüi hük kü khümhen Bethel thahshi, hatü hükpa kü khümhen Dan thahshi dai.

³¹ Jeroboami shangtao peü kü khümshing ling, hatü Levi am nevaijao lebü nanglakthü jat peü kübü ngongpa vaiyei jeyei tuh.

Bethelei Khümpü Nyonghüpü

³² Judahlei mohampü keiha Jeroboami lenyang shetpabü nyih anpüngapabü kü mo mohen tem, hatü büpai moidülei jakpü moila shuoh. Büpai hayü büpai lingpü mohoh cheha kü Bethelei moila shuoh, hatü shao büpai Bethelei büpai lingpü khümshingthü kü ngongpathü jeyei tuh.

³³ Lenyang shetpabü nyih anpüngapabü kü büpai mongpükei jehahpü nyih kü büpai lingpü Bethel leipü moidülei moila shuoh. Hanangkü büpai Israel am shingvaishi mo mohen hapakei ling, hatü moidülei moila shuohhen aong.