1 ONGPATHÜ 10 - DAÜLANGPÜ LAIHING (BSI)

Sheba am Onglanyüi Solomon Thümpü

¹ Mechem Sheba am onglanyüi Shembüpalei men homei Solomon men-e leipü jung danpa, pinnyüi büpa kü wongpü wongpü shahthü pheyei dokhen shingvaishi pei.

² Pinnyüi khong longpü hük mütü utthü kü hetnyai, hon hatü douvang yaongthü longi kotü Jerusalem ngoiyei pinnyüi deihshi nyupü peü Solomon kü pheteke.

³ Solomoni pinnyüi phepü peü kü jangei e; pinnyü kü nih-ei ne-eaokhen mü ongpa kü hayaoha shei meheyao wongpü nenyuang.

⁴ Mechem Sheba am onglanyüi Solomonei kihikon hatü büpai vepü ongshem eepa,

⁵ büpalei nükdü leipü hahying, lakchongbüthülei uoshing yaongshing, chongphobüthüi owpü owhiaithü, büpalei yungshong nopüthü, hatü Shembüpalei Phopshemei büpai shuohpü moilathü eeshingkü pinnyü yashan.

⁶ Hanangkü pinnyüi ongpa kü, “Nüngi dükaokpü hatü nüngei kihikon jung ngei hamei kahdokei nyushi danpü shahjangü jiüpü khih,

⁷ shejao ngelei müki mang-ee thahshi ngei hingnelemi nyupeih. Hükkei shingao ngei kü ne-ephopü khih; nüngei kihikon hatü nüngi angpüdeipeyü ngei danpü shahjang mao nyeipü khih.

⁸ Nüngei shennyakthü meshük mongmeinya! Düngei nüng touei yaongtü nüngei kihikon banghah-ei nyupü chongphobüthü meshük mongmeinya!

⁹ Nüng kü monghahpü hatü nüng Israel ong uoshing kü uohüpü Shembüpa nüngei Kahvangei men longtuh! Shembüpai Israel am kü düngei bampü nangkü shahhing hatü daülangshemshepü dou dükhen shingvaishi büpai nüng ong vaihüpü khih” shei e.

¹⁰ Hapheikü pinnyüi ongpa kü hon dok haja ali mü nyeishi, hatü hetnyaithü longi, hatü douvang yaongthü shuoh. Solomon kü Sheba am onglanyüi shuohpükei mechemao hetnyai hapakei nedang.

¹¹ Hiramei jahas kü Ophir leipü hon longi koei lei, hatü haleipü-üng almug pü hatü douvang yaong longi koei lei.

¹² Ongpai hapa almug püi Phopshem hatü ongshem kü shemha vaishi haong, hatü kesho lokbüthü shingvaishi hapai harp hatü lyre lingteke. Ha nyih pheikü almug pü hapakei nelei nevaijü ne-ee.

¹³ Solomon ongpai Sheba am onglanyü kü nyingnyoi kü laklei shuohpü mü pinnyüi napü hatü yiüpü peü shuoh. Hapheikü pinnyü hatü pinnyülei chongphobüthü Sheba kahdok yemei leidai.

Solomon Ongpalei Mop

¹⁴ Bong ieyei Solomoni hon dok haja hapüjem hükshing danghamteke,

¹⁵ hatü hapayü bhei leihpüthüi, Arabia am ongthüi hatü kahmük kübü governorthüi shuohpü neomi shiüteke.

¹⁶ Solomon ongpai hon moni hon-ii kho nyi ling; hon-ii ieyei kü hon dok nyet baong shih-ei ling.

¹⁷ Büpai shao hon moni hon-ii maanpü kho jem ling; hon-ii ieyei kü hon dok nyi nyi shihtü ling. Büpai hathü hon-ii kemei Lebanon Phaü leipü ongshemei tuh.

¹⁸ Büpai shao meinyübha-i mon ong uoshing hük ling, hatü hapa kü honi jümei ling.

¹⁹ Hapa ong uoshingei aonghen lateen vok shiüteke, hatü ong uoshing shaopüba ngaümphei lemei toilangi shih, hatü lateen nyonghidah phikü lakdükshing shih, hatü ha kü mailang hük baong dhe dhe khangteiyei ling.

²⁰ Ong uoshingei aongpü lateen dohpü jung ieyei kü mailang hük baong yaongjü lateen vok kü mailang anpünyi shiüteke. Mepa ongchingiyao hapakei neling.

²¹ Solomon ongpalei yungshong kemei honi mon lingpü shiüteke; hatü Lebanon phaü leipü ongshemei tuhpü dükhi-üm kemei honi mon ling. Ngini mepayao neling; mehenangkü Solomonei hepak kü nginü ahshipü dounyü nevai-i nyu.

²² Hiramei jahas mü yungchingei bhei leih-ei daiteipü ongpalei jahasthü nyuteke. Bong jem kü chem hapa jahasthüi hon, ngin, meinyübha, meishang hatü atüthü koei leihamteke.

²³ Hanangkü Solomon ongpayü kahdoknyü ongpathü peü mü mophimo hatü kihikon kü nyeipüba nyu.

²⁴ Kahvangi büpa kü shuohpü kihikon banghen shingvaishi kahdoknyü kemei Solomon touei peihen kenteke.

²⁵ Peipü peüi büpa kü thintho, hon, ngin, ashakviha, lahhilaong, hetnyai, koyei hatü gadu chehathü koei vangbong ieyei longi peiteke.

²⁶ Solomoni koyei khari hatü koyeithü longi thaiyei tuh; büpalei koyei khari kho anpüali hatü koyeithü haja anpünyi nyu; büpai hathü hanei Jerusalemei hatü hanei lebü chingnyüthülei tuh.

²⁷ Büpalei nyih kü büpai Jerusalemei nginü bhihhiphang keiha hatü cedarpüyü adhapü keiha bongeilemei noteihü.

²⁸ Solomoni koyeithüyü Ijip hatü Kue leipü leiteke; ongpalei bhei leihbüthüi Kue leipü shakhamteke.

²⁹ Ijip leipü koyei khari hük kü ngin lop kho hük mü pinyipüan hatü koyei kü 150 shuohtü leiham. Jomi shao Hit hatü Aram am ongpathü kao yushuohhamteke.