1 ONGPATHÜ 1 - DAÜLANGPÜ LAIHING (BSI)

David Viüpa Leipü

¹ Mechem David ongpa viüei bong longi daipa, büpa kü ashak longi ümshuohjao shaampü nepei.

² Hanangkü büpalei chongphobüthüi büpa kü, “Hamphongi nüng kü nyemjungnüng pai mü ngühpü nela hük yemküshah. Nüng shaamluki nyuhen shingvaishi pinnyü nüng mü nyemlemkei” shei e.

³ Hanangkü jomphongi Israel kempü kü nela meipü hük yemei daiyei Shunam am Abishag dangei ongpa touei müei lei.

⁴ Hapa nelayü nela longi meishi; pinnyüi ongpa kü jungeilangei ang, shejao ongpai pinnyü mü nejem.

Adonijah-i Laophü Nyingi Ong Vaipü

⁵ Shaang Adonijah, David hi Haggith nyilei cheha-i, “Ngei ong vaihen hih” shei yaong. Hanangkü koyei kharithü hatü koyeithü hatü shennyak jom pinyipüan büpa shekü daihen tem.

⁶ Chepai büpa kü, “Nüng hapakei mehekei nyunya?” shei mechemao ne-e. Büpayao nethe longi meishi hatü büpayü Absalom pheikü bühteke.

⁷ Büpai Zeruiahlei cheha Joab, hatü ngongpa Abiathar nyi mü shah show, hatü jiji-i Adonijah kü sheüh.

⁸ Shejao ngongpa Zadok, Jehoiadalei cheha Benaiah, Nathan thibü, Shimei hatü Rei, hatü Davidei vehokbüthüi Adonijah kü nesheüh.

⁹ Adonijah-i mi, mohoh hatü nitshüpü mohoh chehathü yah-ei En-Rogel yopailei Zoheleth Yaong touei moila shuoh. Büpai büpalei jeihinaüthü, ongpathü, hapeüthü, hatü Judah am ongpalei lakchongbüthü peü kü nyük,

¹⁰ shejao büpai Nathan thibü kü, nevaijü Benaiah kü, nevaijü vehokbüthü kü, nevaijü büpalei chenaü Solomon kü nenyük.

¹¹ Hahepak kü Nathani Bathsheba, Solomonei chenyü kü, “Haggithlei cheha Adonijah ong vaipü nedanangpü je? Hatü jenei ongpa David-ü ha jung nenyingi nyüke.

¹² Hanangkü nüngei yangnyu hatü anha Solomonei yangnyu yanghüjema ngei nüng kü shahnying hanei ephüshah.

¹³ David ongpa touei chem shütuh hatü büpa kü, ‘Ngelei shembü ongpa, nüngi nüngei chongphobü ngei kü, anha Solomoni nüng kü jeiyei ong vaihühen, hatü büpai ngelei ong uoshing kü uohen shei ngei kü nelah-angpü je? Shejema mehekei Adonijah ong vaihüpa?’ shei eyeishuoh shei e.

¹⁴ Hahepak kü mechem nüngi ongpa kü ha eyei nyuhen, ngei müshi shüei nüngei shah kü haohphahen hih” shei e.

¹⁵ Hanangkü Bathsheba ongpalei dungei shü. Ongpa viüdaipü nangkü Shunam am Abishagi jungei nyu.

¹⁶ Bathsheba-i ongpa touei aümei sha, hatü ongpai pinnyü kü, “Nüngei nadang meheang?” shei phe.

¹⁷ Pinnyüi büpa kü, “Ngelei shembü, nüngi Shembüpa nüngei Kahvangei men kü nüngei chongphobü kü lah-ei, ‘Anha Solomoni ngei kü jeiyei ong vaihühen, hatü büpai ngelei ong uoshing kü uohühen shei epü-ü.

¹⁸ Shejao ngangahük kü ngelei shembü ongpai nenyingi Adonijah ong vaiteke.

¹⁹ Büpai mohohbaongthü nitshüpü mohoh chehathü hatü mi changshi jüei moila shuohteke, hatü ongpalei hapeüthü peü, ngongpa Abiathar, veshan mübü Joab kü nyükteke, shejao nüngei chongphobü Solomon kü nenyükang.

²⁰ Shejao ngelei shembü ongpa pheikü üpai ong uoshing kü uohen shei nüngi ejahen ha nyinghen Israel am kemei nüng kü veishi nyüke.

²¹ Hei nevaijema, ngelei shembü ongpa nüng didaipü mü chemi ngei hatü hapeü Solomon henjiyü nemeipü am heshap leitükhen khih’ ” shei e.

²² Mechem pinnyüi ongpa mü shah eteiyei nyupa, Nathan thibüao shemongei shü.

²³ Jomphongi ongpa kü, “Nathan thibüao peiyei nyüke” shei eshuoh. Büpa ongpa touei shüei kahdokei aümei sha.

²⁴ Nathani, “Ngelei shembü ongpa, nüngi Adonijah nüng kü jeiyei ong vaihühen hatü büpai nüngei ong uoshing kü uohühen shei epü je?

²⁵ Shinnyih büpa yiüei mohohbaongthü, nitshüpü mohoh chehathü hatü mi longi yah-ei moila shuohteke, hatü büpai ongpathülei hapeüthü peü, veshan mübü Joab, hatü ngongpa Abiathar, hathü büpa touei hahyingei, ‘Adonijah ongpa yangnyu shoshotuh!’ shei enyüke.

²⁶ Shejao büpai ngei, nüngei chongphobü, hatü Zadok ngongpa, Jehoiadalei cheha Benaiah hatü nüngei chongphobü Solomon kü nenyükang” shei e.

²⁷ “Ngelei shembü ongpai büpa pheikü ong uoshing kü üpai uohen ha büpalei chongphobü kü nenyinghüi ngelei shembü ongpai hapa dükpü je?” shei e.

²⁸ David ongpai jangei, “Ngei touei Bathsheba nyükei deishih” shei e. Hanangkü pinnyü ongpa touei heih-ei yaong.

²⁹ Ongpai lah-ei pinnyü kü, “Ngelei yangnyu vepathü peüei lak kübü yangpü Shembüpalei men kü,

³⁰ ngei shelei Shembüpa, Israel Kahvang men kü nüng kü lahpü keiha, ‘Anha Solomoni ngei kü jeiyei ong vaihen, hatü ngei nangjei büpai ong uoshing kü uohen’ ” shei e.

³¹ Hahepak kü Bathshebai dhüm huei ongpa touei kahdokei aümei shatü, “Ngelei shembü David ongpa denden kü nyutuh!” shei e.

³² David ongpai, “Ngei touei ngongpa Zadok, Nathan thibü, hatü Jehoiadalei cheha Benaiah hathü kü nyükshih” shei e. Mechem jomphong ongpa touei peijapa,

³³ ongpai jomphong kü, “Amphong mü ngelei chongphobüthü mütuh, hatü ngelei ha Solomon ngelei gadu kü uohütü Gihonei müei yiütuh.

³⁴ Halei ngongpa Zadok hatü Nathan thibü nyi homei büpa Israel kü ong vaihen thiteiphuei jetuh. Amit vüngtuh hatü, ‘Solomon ongpa yangnyu shoshoshi nyutuh!’ shei lentuh.

³⁵ Hapheikü amphong büpa mü aongei ngelei ong uoshing kü büpa uohühen hatü büpai ngelei shing kü ong vaihen; mehenangkü ngei büpa Israel hatü Judah kü vanglem lembü vaihen jepeih” shei e.

³⁶ Jehoiadalei cheha Benaiah-i ongpa kü jangei, “Amen! Ngelei shembü ongpalei Shembüpa Kahvangi jepü nyemvaima.

³⁷ Ngelei shembü ongpa mü Shembüpa nyupükei, Solomon mao büpa hapakei nyemnyu, hatü ngelei shembü David ongpalei ong uoshing mao longpüpa büpai büpalei ong uoshing nyemlonghü” shei e.

³⁸ Hanangkü ngongpa Zadok, Nathan thibü, Jehoiadalei cheha Benaiah hatü Kereth hatü Peleth ami Solomon yah-ei David ongpalei gadu kü uohütü büpa Gihonei müei yiü.

³⁹ Ngongpa Zadoki ashakshem mongeipü mainga shong yah-ei Solomon kü phuteke, hatü jomi amit vüngtü nanglakthü peüi, “Solomon ongpa yangnyu shoshoshi nyutuh!” shei len,

⁴⁰ hatü shennyakthü peü büpa phei müei liping vüngei mongongmongleyei jomei ngeüi kahdokao jenshi aong.

⁴¹ Adonijah hatü büpa mü nyupü yenpathü hahyingpü temei nyushi ngeü longi dan. Mechem Joabi amit ngeü danpa, büpai, “Chingnyülei mehe ngeü ang?” shei e.

⁴² Büpai hapa shah eyei nyushi ngongpa Abiatharlei cheha Jonathan ngoi. Adonijah-i, “Shükei, nüng keipü shennyak mei-i shahjangmei koshi shühen aokpeih” shei e.

⁴³ Jonathani Adonijah kü, “Nevai, jenei shembü David ongpai Solomon ong vaihütükteke.

⁴⁴ Ongpai büpa mü ngongpa Zadok, Nathan thibü, Jehoiadalei cheha Benaiah, Kereth hatü Peleth ami büpa ongpalei gadu kü uohütü,

⁴⁵ ngongpa Zadok hi Nathan thibü nyi-i Gihonei müei yiüei ong vaihen je, hatü jomi haleipü mongongmongleyei aongnyu khih, hanangkü chingnyü-ü leneiwongnyu khih.

⁴⁶ Solomoni sheyü ong uoshing kü uoshi nyüke.

⁴⁷ Nyeinya vaishi ongpalei chongphobüthüi David ongpa kü, ‘Nüngei Kahvangi Solomonei men, hatü büpalei ongching nüngei ongching mao nyeinya men-e hatü longpü nyemleihü!’ shei mongmei shah ehen peinyu khih, hatü ongpai büpalei lüngei aümei khümei,

⁴⁸ ‘Ngelei müki eeshi shinnyih ngei kü jeihen shennyak eehüpü kü Shembüpa, Israel Kahvangei men longtuh’ ” shei e.

⁴⁹ Hapa ejajü Adonijahlei yenthü peü nyemei laophü laophü yandaikem.

⁵⁰ Adonijah-i Solomon kü nyemei daiyei moidü vaungjung hük kü shoungteke.

⁵¹ Hahepak kü Solomon kü, “Adonijah-ü Solomon ongpa kü nyemei moidü vaungjung hük kü laki shoungtü nyükeja. Solomon ongpai shinnyih ngei nejütükpih shei nyemlahpha shei büpai enyüke” shei eshuohteke.

⁵² Solomoni jangei, “Büpa laophü nyingi shennyakmei kei nyuküjema büpalei shangjing leipü sholah hükao kahdokei nevühüpih, shejao büpai nemei-i dükjema dihen” shei e.

⁵³ Hapheikü Solomon ongpai shennyakthü shomei büpa moidü leipü müei lei. Adonijah-i Solomon ongpa touei peiyei aümei khüm hatü Solomoni büpa kü, “Shemei leidaituh” shei e.