1 KORINT 6 - DAÜLANGPÜ LAIHING (BSI)

Vaipüthü mü Shahkung Dükpü

¹ Mechem am khongkü hanei-i depülaopü vamhenshang, daülangpüthü touei deihen nangjei shahphen shingei Kahvang nenyingpüthü touei deinyu je?

² Daülangpüthüi kahdoknyülei shahphenhen shei ammi nenyingnyu je? Ammi kahdoknyülei shahphenhen vaijema, maanpü shahhidou shahphenhen neaokpü je?

³ Vangsho phongshanthülei shahphenhen shei ammi nenyingnyu je? Ashüanyong nangü ne-eshah.

⁴ Am mü dehilao maanpü nyujü ammi hapa shahphenhen attoi kü meheyao laphen neshiüpüthü jenyu je?

⁵ Ngei hapayü am nyemveü shei enyeih. Vaipü am hüki hük aa kübü shahphenhen amphong khongkü kon kohpü hükao nenyupü je?

⁶ Shejao vaipü am hüki vaipü am hük khüei shahphen shingei hatü nevaipü am touei dainyu je?

⁷ Hingmei meyü hüki hük khüei shahphen shingei daihenü amü aokpü nedangpü am leidainyüke. Nejiüi vaijao nyemdükphamam. Güh-ei vaijao nyemyahlangmam.

⁸ Ha nangjei ammi-üng laophülei jeihinaüthü kü nejiüi dükshuohnyüke, hatü gühlangshuohnyüke.

⁹ Ten dükpüthü Kahvang ongching nedangaokpih shei ammi nenyingpü je? Am telutelemhah! Iyjeiphailei, lajei khümpü, mükbongjuyung, baha büm yupüthü, bahai baha mü, nyühai nyüha mü mükbongjuyungpü,

¹⁰ gühpü, hahnempü, chokpümokpü, yaüeilungpü, hatü peileipüthü– hathü üpayao Kahvang ongching mükjüp nedangpih.

¹¹ Am haneiyü hapakei nyuteke. Shejao amphongü paütük, daütük hatü amphongü Shembüpa Jisu Khrista hatü jenei Kahvang Laangha men kü dahshakhüteke.

Nüngei Büm kü Kahvang Müknyinshekhanghütuh.

¹² “Ngei shingvaishi dou peü dükhen shahkungi mongei nyüke,” shejao dou peü nanglei nevai. “Ngei shingvaishi dou peü dükhen shahkungi mongei nyüke,” shejao mepaiyao ngei shak kü shembü nevaihüpih.

¹³ “Hahyingü shünyü shingvaishi hatü shünyü-ü hahying shingvaishi nyüke,” hatü Kahvangi nyiphen mahtükhen. Bümü iyjeiphailei shingvaishi nevai, shejao Shembüpa shingvaishi, hatü Shembüpayü büm shingvaishi nyüke.

¹⁴ Kahvangi Shembüpa yangei leishih, hatü büpalei ngani jenao yangei leiphahen.

¹⁵ Nüngei bümü Khristalei phaihan shei nenyingnyu je? Shejema ngei Khristalei phaihan yah-ei büm yupü amei phaihan leihühen je? Nevai!

¹⁶ Üpai büm yupü mü jemtei, pinnyü mü büm hük leinyeih shei ammi nenyingnyu je? Mehenangkü hapa eyei nyüke: “Nyiyü phai hük leihen.”

¹⁷ Shejao üpai Shembüpa mü mongjem, büpa mü laangha kü hük leidainyeih.

¹⁸ Iyjeiphailei tuhtüktuh! Shennyak hüki thahpü mang kemei büm kü hongei neshiü, shejao mükbongjuyungü laophülei büm khüei düknyüpeih.

¹⁹ Nevaijü nüngei bümü Kahvang leipü dangpü nüng kü nyupü Laangha Daülangpülei phopshem, hatü nüngei bümü nüng lompü nevai shei nenyingnyu je?

²⁰ Mehenangkü amphongü bhei shuohtü shakpeih; hanangkü ammei büm kü Kahvang müknyinshekhanghütuh.