1 KORINT 5 - DAÜLANGPÜ LAIHING (BSI)

Mükbongjuyungi Attoi Sheihtüknyeih

¹ Amphong khongkü mükbongjuyung, hapayü nevaipü am touei dangkao nenyubenüng dou– shennyak hüki laophülei nyüma mü nyunyüke shei hingshangi shah-om shuohteke.

² Ammi ha kü changmeinyüke! Hapakei dükpü shennyak am toueipü changtükhen nangkü am mongshangei deihhen nevaipü je?

³ Büm am mü nenyujao laangha kü ngei am mü omshi nyüpeih, hatü ngei am mü nyupü keiha,

⁴ henüng dou dükpü shennyak kü Jisu Khristalei men kü ngei shahphen shuohtüktih. Mechem am thaihen, jenei Shembüpa Jisulei ngan mü ngelei laangha omshi nyüpeih.

⁵ Hapa shennyakei phai mangtükhen shingvaishi ammi Satan kü shuohtüktuh; shejüang Shembüpalei nyih kü büpalei laangha yangaokhen.

⁶ Am changmeipeyü doumei nevai. Maanpü daw homei aan kemei paaidainyeih shei ammi nenyingnyu je?

⁷ Daw chang daütüktuh, shejüang amphongü daw neshihpü aan ja vaihen. Mehenangkü jenei Khrista, Hompü Mo mi cheha moila shuohteke.

⁸ Hanangkü jeni mang hatü nemeipü daw chang mü nevai, shejao jeni daw neshihpü daülangpü hatü shahhing aan mo moshah.

Mükbongjuyungpü kü Shahphenhen Vongbong

⁹ Ngelei lai kü ngei am kü mükbongjuyungpüthü mü tejemtei shei nyangphei.

¹⁰ Hapa kahdoknyü kübü nevaipü am mükbongjuyungpü, hahnempü, gühpü nevaijü lajei kü khümpüthü nang ngei ne-enyih. Hathü kübü yanhenü ammi chemjalak kü kahdoknyü kübü yanhen nyüke.

¹¹ Shejao shaang ngei am kü nyangpeyü vaipü jeihinaü nevaijü nyahinaü shei men kotü mükbongjuyungei, hahnemei, lajei kü khümei, ten epü hatü gühpüthü mü tejemtei shei epeih. Henüng keipü shennyak mü chemiyao tehah teying.

¹² Haolei nyupüthülei shahphenhen ngei mehe nadang? Konmongei nyupüthü kü ammi shahphenhen nevaipü je?

¹³ Haolei nyupüthü keyü Kahvangi shahphenhen. “Amphong khong kübü nemeipü shennyak changtüktuh.”