1 KORINT 4 - DAÜLANGPÜ LAIHING (BSI)

Phongshanthülei Chongphopü Dousho

¹ Hamphong keyü Khristalei chongphobüthü hatü Kahvangei shahjothü kü khei vaibüthü shei deihtuh.

² Anyei vaishi khei vaibüthüyü monglemaokpü vaihen vongbong.

³ Shejao ngei shingvaishi ammi nevaijü hangku shahphen shingei ngei kü shahphenhenü douha shei ngei deihnyeih. Ngei, ngei nyingiyao shah nephenhahnyih.

⁴ Ngei khüei ngei nyingi meheyao nyingei neshiü, shejao hapai shei ngei mang neshiü shei ne-eaokpih. Ngei kü shahphenpeyü Shembüpa hih.

⁵ Hanangkü ittükpü hepak mangngoi shekü shah tephen. Shembüpa yiüküpü dantuh. Büpai vangnyakei joshi nyupü vangngailei ngaikahen, hatü hangkulei mongdangei deihpü shakei ngaikahen. Hahepak kü peüi Kahvang leipü dupü-oupü danghen.

⁶ Jeihinaü hatü nyahinaüthü, am nanglei vaihen nangkü ngei hapayü Apollos henji kü lapei epeih, shejüang ammi henji homei, “Laihingei nyangei nyupü kü nyeishi tedai” shei epü nyinghen; shejüang am üpaiyao hüki hük khüei nechangmeihen.

⁷ Mih mü hayaoha kei am üpai lingpa? Ammi nedangpü kü angpü üpa nyüpa? Hatü ammi ha dangjü thintho hük nevaipü keiha mehekei ammi changmeinya?

⁸ Ammi napü peü dangteke! Am sheyü shemmei leiteke! Ham nevaijao am payü ongthü leidaiteke! Hamao am mü ong vaihen shingvaishi am peü ong nyemvai shei ngei deihnyeih.

⁹ Kahvangi ham phongshanthü keyü shompü shing shuohpükei deihnyüke. Jütüknüng deipü shennyak kü kahdoknyü, vangsho phongshanthü hatü hangkuthüi nyemveinüng hupükei leidaiteke.

¹⁰ Khristalei men kü hamphongü ngapathü kei, shejao amphongü Khrista kü longi nahshi nyüke. Hamphongü wong nekoh, shejao amphongü wong kohshi nyüke! Amü dhüm kohshi, hamphongü dhüm neshiü.

¹¹ Shaang thahshi keyü hamphongü aeiyeileyei ashakten ümtü, üphahtü bükhishem neshiüi nyüpeih,

¹² hatü hamei laki dou dükpai ham nyiudaiteke. Mechem ham kü thaüvaüphahen, hami moihimanshuohnyeih; mechem shüveiphahen, ham munennyeih;

¹³ mechem ham kü yaüphahen, hami bampai eshuohnyeih. Hamphongü shinnyih thahshi kahdoknyülei nyüphinya hatü dou peülei nühinam leidaiteke.

¹⁴ Ngei hapayü am veühühen shingvaishi nevai, shejao ngei bampü hapeüthü kü kei nyuhhen shingvaishi nyangnyüpeih.

¹⁵ Ammi Khrista kü yombüthü haja an nyujao ammei pathü longi nenyu. Hingmei shahjangmei homei Khrista Jisu kü ngei ammei pa leipeih.

¹⁶ Ngelei yangnyu lappü hük yahtuh shei ngei am kü khümnyeih.

¹⁷ Ha tata kü ngei am touei Shembüpa kü ngei bampü hatü monglempü hapeü Timoti shomphünyeih. Büpai am kü ngei attoi peülei jom kü shing peülei nyuhpükei Khrista kü ngelei lemthü am kü deihhen nangkü ephahen.

¹⁸ Shejao am hanei ami ngei am touei nepeikahen shei deihshi changmeinyüke.

¹⁹ Shejao Shembüpai mongjema ngei am touei lomi peikahen, hatü ngei hapa changmeipü shennyakthülei shah nevai, shejao jomei ngan yemei ngaihen.

²⁰ Mehenangkü Kahvang ongchingü shah kü nevai, shejao ngan kü nyüke.

²¹ Ngei am touei hanbhi noshi hi nevaijü inyainyempü laangha kü bampü mü peihahhüpa? Ammi mepapa lümpa?